Ahmedabad Plane Crash મામલે AI ના બે પૂર્વ કર્મચારીઓનો મોટો ધડાકો

Ahmedabad Plane Crash ની દુર્ઘટનાએ સમગ્ર દેશને હચમચાવી નાખ્યો છે. આ દુર્ઘટનામાં 270થી વધુ લોકોના મોત થયા હતા. હવે ઘટનાના એક અઠવાડિયા પછી એર ઇન્ડિયાના બે વરિષ્ઠ ફ્લાઇટ એટેન્ડન્ટ્સે કંપની પર ગંભીર આરોપો લગાવ્યા છે. તેમણે આ મુદ્દે વડા પ્રધાન નરેન્દ્ર મોદીને પત્ર લખીને જણાવ્યું છે કે અમદાવાદ અકસ્માતના એક વર્ષ પહેલા બંનેએ બોઇંગ 787 ડ્રીમલાઇનરમાં ટેકનિકલ ખામી વિશે એરલાઇનને જાણ કરી હતી.

ટાઈમ્સ ઓફ ઇન્ડિયાના અહેવાલ મુજબ, બંને એટેન્ડન્ટ્સે પીએમ મોદીને લખેલા પત્રમાં દાવો કર્યો હતો કે એરલાઇન્સે ન માત્ર તેમની ચિંતાઓને ફગાવી દીધી હતી, પરંતુ તેમનું નિવેદન બદલવાનું પણ કહ્યું હતું. નિવેદન બદલવાનો ઇનકાર કરવા બદલ એરલાઇન્સે તેમને હાંકી કાઢ્યા હતા.

14 મે 2024ના રોજ ખામી સર્જાઈ હતી

રિપોર્ટમાં કહેવામાં આવ્યું છે કે બંને ફ્લાઈટ અટેન્ડન્ટે આરોપ લગાવ્યો હતો કે તેમણે ડ્રીમલાઇનરના દરવાજામાં ખામી હોવાની જાણ કરી હતી. રિપોર્ટ અનુસાર, ૧૪ મે, ૨૦૨૪ ના રોજ, મુંબઈ-લંડન B787 (VT-ANQ) ઓપરેટિંગ ફ્લાઇટ AI-129 ને હીથ્રો ખાતે ડોક કરવામાં આવી હતી અને બધા મુસાફરોને નીચે ઉતારી દેવામાં આવ્યા હતા.

આ પણ વાંચો: અમદાવાદ પ્લેન ક્રેશમાં દેવીપૂજક કિશોર મૃત્યુ પામ્યો છતાં વળતર ન મળ્યું

પત્રમાં કહેવામાં આવ્યું છે કે દરવાજો ખોલવા માટે જવાબદાર બે ફ્લાઇટ એટેન્ડન્ટ્સે ચેકલિસ્ટ કર્યું હતું કે તે મેન્યુઅલ સ્થિતિમાં છે કે નહીં. પરંતુ દરવાજો ખોલતાની સાથે જ સ્લાઇડ રાફ્ટ તૈનાત થઈ ગઈ. અહીં એ યાદ રાખવું જોઈએ કે, જ્યારે દરવાજો ઓટોમેટિક મોડમાં ખોલવામાં આવે છે ત્યારે સ્લાઇડ રાફ્ટ તૈનાત થઈ જાય છે. તેમણે કહ્યું કે પાઇલટ અને કેબિન-ઇન-ચાર્જે લેખિતમાં આ ખામીની પુષ્ટિ કરી હતી.

એર ઇન્ડિયાએ મામલાને દબાવી દીધો

ફ્લાઇટ એટેન્ડન્ટ્સે તેમના પત્રમાં લખ્યું હતું કે, “અમે ઉચ્ચ અધિકારીઓને કહ્યું હતું પરંતુ તેમણે સમસ્યા ઉકેલવાને બદલે નિવેદન બદલવા માટે અમારા પર દબાણ કરવાનું શરૂ કર્યું હતું.” પત્રમાં આરોપ મૂકવામાં આવ્યો છે કે એર ઇન્ડિયા અને નાગરિક ઉડ્ડયન મહાનિર્દેશાલય (DGCA) એ 14 મે, 2024 ની ઘટના અને ડ્રીમલાઇનરની ખામીઓ સંબંધિત અન્ય ઘટનાઓને પણ દબાવી દીધી હતી. તેમણે આરોપ લગાવ્યો હતો કે સલામતીના મુદ્દાઓની ગંભીરતા છતાં, DGCA એ ફક્ત અનૌપચારિક તપાસ શરૂ કરી હતી અને ત્યારથી કોઈ રિપોર્ટ શેર કરવામાં આવ્યો નથી.

અમદાવાદ પ્લેન ક્રેશમાં 270 લોકોના મોત થયા

દરમિયાન, અમદાવાદ પ્લેન ક્રેશ દુર્ઘટનામાં લગભગ 270 લોકોના મોત થયાના એક અઠવાડિયા પછી પણ, અધિકારીઓ હજુ પણ અકસ્માતનું કારણ શોધવાનો પ્રયાસ કરી રહ્યા છે. એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) ની એક ટીમે 12 જૂનના રોજ થયેલા અકસ્માતની તપાસ શરૂ કરી છે. નોંધનીય છે કે ક્રેશ થયેલા એર ઇન્ડિયા બોઇંગ 787-8 ડ્રીમલાઇનર વિમાનમાં 242 લોકો સવાર હતા, જેમાં 12 ક્રૂ સભ્યોનો સમાવેશ થાય છે. વિમાન અમદાવાદના મેઘાણી નગર વિસ્તારમાં એક મેડિકલ હોસ્ટેલ સંકુલમાં ક્રેશ થયું હતું. વિમાન ક્રેશ થયા બાદ આગ લાગતા મુસાફરો, ક્રૂ મેમ્બરો અને આસપાસના લોકો સહિત લગભગ 270 લોકો મૃત્યુ પામ્યા હતા.

એર ઇન્ડિયાએ અકસ્માત અંગે શું કહ્યું?

એર ઇન્ડિયાના સીઇઓ અને મેનેજિંગ ડિરેક્ટર કેમ્પબેલ વિલ્સને ગુરુવારે જણાવ્યું હતું કે ક્રેશ થયેલ બોઇંગ 787-8 ડ્રીમલાઇનર સારી સ્થિતિમાં હતું. તેમણે કહ્યું કે તેની છેલ્લી મોટી તપાસ જૂન 2023 માં કરવામાં આવી હતી અને આગામી તપાસ ડિસેમ્બર 2025 માં સુનિશ્ચિત થયેલ છે. તેમણે એક નિવેદનમાં કહ્યું, “વિમાન અને એન્જિન બંનેની નિયમિત તપાસ કરવામાં આવી હતી અને તેમાં પહેલાં કોઈ સમસ્યા જોવા મળી ન હતી.”

હવે જ્યારે એર ઈન્ડિયાના જ બે પૂર્વ કર્મચારીઓએ કંપનીના દાવાઓની પોલ ખોલી નાખી છે ત્યારે કોણ ખોટું બોલી રહ્યું છે તે સમજવું મુશ્કેલ છે. જો આ મામલે વધુ તપાસ થાય તો ચોક્કસ ચોંકાવનારી માહિતી સામે આવી શકે છે.

આ પણ વાંચો: ઉત્તરાખંડમાં હેલિકોપ્ટર ક્રેશ થયું, પાઇલટ સહિત 7 લોકોના મોત