મહારાષ્ટ્રના થાણે જિલ્લામાં અંબરનાથ મ્યુનિસિપલ કાઉન્સિલમાં એક અનોખું અને આશ્ચર્યજનક રાજકીય ગઠબંધન ઉભરી આવ્યું છે. ભાજપ અને કોંગ્રેસે સાથે મળીને એકનાથ શિંદે જૂથની શિવસેનાને સંપૂર્ણપણે ઉથલાવીને સત્તા કબજે કરી લીધી છે. આ ઘટનાક્રમે રાજ્યના રાજકારણમાં વ્યાપક ચર્ચા જગાવી છે, કારણ કે રાજ્ય સ્તરે ભાજપ અને શિંદેની શિવસેના ગઠબંધનમાં ભાગીદાર છે.
મીડિયા રિપોર્ટ મુજબ, તાજેતરમાં યોજાયેલી મ્યુનિસિપલ કાઉન્સિલની ચૂંટણીમાં, ભાજપે 16 બેઠકો, કોંગ્રેસે 12 બેઠકો અને અજિત પવાર જૂથના એનસીપીને 4 બેઠકો મળી હતી. કેટલાક અપક્ષોએ પણ જીત મેળવી હતી. એકલા ભાજપ પાસે બહુમતીનો અભાવ હતો, તેથી તેણે સ્થાનિક સ્તરે મેયર પદ માટે કોંગ્રેસ અને એનસીપી સાથે ગઠબંધન કર્યું.
આ પણ વાંચો: ‘સવર્ણો અમારા અધિકારો છીનવે છે, અલગ મતદાર યાદી આપો’
આ ગઠબંધનને કુલ 32 કાઉન્સિલરો (ભાજપ 16 + કોંગ્રેસ 12 + એનસીપી 4) ના સમર્થન સાથે સ્પષ્ટ બહુમતી મળી. ગઠબંધનને કારણે, ભાજપના ઉમેદવાર તેજશ્રી કરંજુલે મેયર પદ પર વિજય મેળવ્યો. આનાથી અંબરનાથમાં ઘણા વર્ષોથી સત્તા પર રહેલ શિવસેનાના શાસનનો અંત આવ્યો છે.
શિવસેનામાં આ મામલે ભારે નારાજગી જોવા મળી છે. શિંદે જૂથના ધારાસભ્ય બાલાજી કિનિકરે તેને “અપવિત્ર ગઠબંધન” ગણાવ્યું. તેમણે કહ્યું, “કોંગ્રેસ મુક્ત ભારતની વાત કરનાર પક્ષ હવે કોંગ્રેસ સાથે ગઠબંધનમાં શાસન કરી રહ્યો છે. આ શિવસેના સાથે વિશ્વાસઘાત છે.”
આ પણ વાંચો: જૂનાગઢ કૉંગ્રેસ પ્રમુખના જાતિવાદથી કંટાળી કાર્યકરે ફિનાઈલ પીધી!
બીજી તરફ, ભાજપના ઉપપ્રમુખ ગુલાબરાવ કરંજુલે પાટીલે પ્રતિક્રિયા આપી છે કે, શિવસેના સાથે ગઠબંધન કરવું પાપ હોત, કારણ કે શિવસેના છેલ્લા 25 વર્ષથી ભ્રષ્ટાચારના આરોપોનો સામનો કરી રહી છે. તેમણે દાવો કર્યો હતો કે મહાયુતિ સાથે ગઠબંધન બનાવવાના પ્રયાસો કરવામાં આવ્યા હતા, પરંતુ શિંદે જૂથ તરફથી કોઈ સકારાત્મક પ્રતિભાવ મળ્યો નહોતો.
અંબરનાથ મ્યુનિસિપલ કાઉન્સિલમાં ભાજપ-કોંગ્રેસ ગઠબંધન દ્વારા વર્તમાન સત્તા સંઘર્ષનો ઉકેલ આવ્યો છે. જોકે, તેનાથી મહારાષ્ટ્રના રાજકીય પરિદૃશ્યમાં નવો તણાવ પેદા થયો છે. આ ગઠબંધન રાજકીય મજબૂરી છે કે વિવાદાસ્પદ સમાધાન છે તે અંગે ચર્ચા અને અટકળો ચાલી રહી છે. અંબરનાથ કોંગ્રેસના શહેર પ્રમુખ પ્રદીપ પાટિલનો સંપર્ક કરવાનો પ્રયાસ કરવામાં આવ્યો હતો, પરંતુ તેમનો સંપર્ક થઈ શક્યો ન હતો.
આ પણ વાંચો: બજરંગ દળના ગુંડાઓએ બર્થ ડે પાર્ટીમાં ઘૂસી મુસ્લિમ યુવકોને ફટકાર્યા!
