રામજીની નગરી અયોધ્યામાં માનવતાને શર્મસાર કરતી એક ઘટના સામે આવી છે. ઈનાયત નગર પોલીસ સ્ટેશન વિસ્તારમાં એક દલિત કિશોરી જ્યારે પોતાના સંબંધીને ત્યાં લગ્ન પ્રસંગમાં હાજરી આપવા ગઈ હતી, ત્યારે જ તેની સાથે આ અઘટિત ઘટના બની હતી. લગ્નના હર્ષોલ્લાસ વચ્ચે અચાનક કિશોરી ગુમ થઈ જતાં પરિવારમાં ફફડાટ વ્યાપી ગયો હતો. મોડી રાત્રે બનેલી આ ઘટનાએ સમગ્ર વિસ્તારમાં ચકચાર મચાવી દીધી હતી.
સગીરા શૌચક્રિયા માટે ગઈ અને ગુમ થઈ
ઘટનાની વિગત મુજબ, કિશોરી લગ્ન સમારોહ દરમિયાન પોતાની એક પરિચિત યુવતી સાથે શૌચક્રિયા માટે બહાર નીકળી હતી. આ દરમિયાન તે શંકાસ્પદ સંજોગોમાં ગાયબ થઈ ગઈ હતી. જ્યારે ઘણી વાર સુધી તે પરત ન ફરી, ત્યારે તેના પરિવારે તેની શોધખોળ શરૂ કરી હતી. લગ્ન સ્થળ અને આસપાસના વિસ્તારોમાં તપાસ કરવા છતાં તેનો કોઈ પત્તો મળ્યો ન હતો. આખરે, પરિવારે સમય સૂચકતા વાપરી સ્થાનિક પોલીસનો સંપર્ક સાધ્યો હતો.
આ પણ વાંચો: સુપ્રીમના જજે કહ્યું, ‘સરકાર વિરુદ્ધ ચુકાદો આપો તો બદલી થાય છે!’
બહેનપણીની પૂછપરછમાં થયો મોટો ખુલાસો
પોલીસ ઘટનાસ્થળે પહોંચી ત્યારે સૌથી પહેલી શંકા તે યુવતી પર ગઈ જે કિશોરીની સાથે હતી. પોલીસે જ્યારે તેની કડકાઈથી પૂછપરછ કરી, ત્યારે સત્ય બહાર આવ્યું હતું. તે યુવતીએ કબૂલાત કરી હતી કે તેનો એક પરિચિત યુવક ત્યાં આવ્યો હતો અને કિશોરીને પોતાની સાથે બળજબરીથી લઈ ગયો હતો. આ મહત્વની કડી મળતા જ પોલીસે સર્વેલન્સ ટીમ અને સ્થાનિક બાતમીદારોની મદદથી આરોપીનું લોકેશન ટ્રેસ કરવાનું શરૂ કર્યું હતું.
24 કલાકમાં પોલીસને સફળતા મળી
અયોધ્યા પોલીસે આ મામલાની ગંભીરતાને સમજીને તાત્કાલિક અલગ-અલગ ટીમો બનાવી હતી. સર્વેલન્સની મદદથી પોલીસે કિશોરીને શોધી કાઢી હતી અને આરોપીને દબોચી લીધો હતો. કિશોરીને હેમખેમ છોડાવી તેનું તબીબી પરીક્ષણ (મેડિકલ એક્ઝામિનેશન) કરાવવામાં આવ્યું હતું. ત્યારબાદ કોર્ટમાં તેના નિવેદનો પણ નોંધવામાં આવ્યા હતા, જેમાં તેણે પોતાની સાથે થયેલા અત્યાચારની વિગતો જણાવી હતી.
આ પણ વાંચો: સવર્ણ યુવતી દલિત યુવક સાથે લગ્ન કરવાની હતી, અચાનક લાશ મળી
કડક કલમો હેઠળ ગુનો દાખલ કરાયો
આ મામલે પોલીસ ક્ષેત્ર અધિકારી અજય કુમાર સિંહે જણાવ્યું હતું કે, પીડિત પરિવારની ફરિયાદના આધારે આરોપી વિરુદ્ધ ભારતીય ન્યાય સંહિતાની દુષ્કર્મની કલમો ઉપરાંત પૉક્સો (POCSO) એક્ટ અને SC-ST એક્ટ હેઠળ ગંભીર ગુનો નોંધવામાં આવ્યો છે. સગીરા પર થયેલા અત્યાચારને પગલે પોલીસ આરોપી વિરુદ્ધ કડક પુરાવા એકત્ર કરી રહી છે જેથી તેને કડકમાં કડક સજા અપાવી શકાય. હાલ આરોપીને ન્યાયાલયમાં રજૂ કર્યા બાદ જેલ હવાલે કરી દેવામાં આવ્યો છે.
આ પણ વાંચો: બારડોલીમાં પ્રેમ પ્રકરણમાં આદિવાસી પરિવારને બાંધીને સરઘસ કાઢ્યું
