સુરેન્દ્રનગરમાં ડો.આંબેડકર એકતા કપ ક્રિકેટ ટુર્નામેન્ટ યોજાઈ

સુરેન્દ્રનગર ખાતે જિલ્લા પ્રાથમિક શિક્ષક ઉત્કર્ષ મંડળ દ્વારા ’ડો.બાબા સાહેબ આંબેડકર એકતા કપ ક્રિકેટ ટુર્નામેન્ટ’નું હાલમાં જ સમાપન થયું હતું. સી.યુ. શાહ સ્પોર્ટસ કલબ ગ્રાઉન્ડ સુરેન્દ્રનગર ખાતે યોજાયેલી આ ટુર્નામેન્ટનું ઉદ્ઘાટન સુરેન્દ્રનગરના કલેકટર રાજેન્દ્રકુમાર પટેલના હસ્તે કરવામાં આવ્યું હતું. આ પ્રસંગે સુરેન્દ્રનગરના મ્યુનિસિપલ કમિશનર નવનાથ ગવ્હાણે, જિલ્લા શિક્ષણ અને તાલીમ ભવન સુરેન્દ્રનગરના પ્રાચાર્ય ડો. સી. ટી. ટુડીયા, સમગ્ર શિક્ષા સુરેન્દ્રનગરના ઓફીસર ડી. બી. સોલંકી વગેરે મહાનુભાવો ઉપસ્થિત રહ્યા હતા.

આ પણ વાંચો: લાયકાત હોવા છતાં દલિત હોવાને કારણે તેઓ કદી કેપ્ટન ન બની શક્યાં

આ ટુર્નામેન્ટમાં સુરેન્દ્રનગર જિલ્લાના ૧૦ તાલુકાની ટીમો વચ્ચે જોરદાર ટક્કર જોવા મળી હતી. ફાઈનલ મેચ લીંબડી અને ચોટીલાની ટીમો વચ્ચે રમાઇ હતી. જેમાં પ્રથમ બેટીંગ કરતાં ચોટીલાની ટીમે ૭ ઓવરમાં ૭૦ રન બનાવ્યા હતા. રનચેજ કરવા ઉતરેલી લીંબડીની ટીમ ૫૫ રન જ બનાવી શકતા ચોટીલાની ટીમ વિજેતા બની હતી. કાર્યક્રમ દરમિયાન સી.યુ. શાહ હોસ્પિટલ સુરેન્દ્રનગરની સહાયતાથી નેત્રરોગ નિદાન કેમ્પ પણ આયોજિત કરવામાં આવ્યો હતો.

આ તકે શ્રેષ્ઠ અધ્યાપક સન્માન – અચલા એવોર્ડથી સન્માનિત અધ્યાપક ડો. સી.ટી. ટુંડીયાનું વિશેષ બહુમાન કરવામાં આવ્યું હતું. ટુર્નામેન્ટ કન્વીનર દીપક પરમાર – સ્માઇલી બોયને સંગઠન દ્વારા ‘આઈકોનિક મેમ્બર એવોર્ડ આપી સન્માનિત કરવામાં આવ્યા હતા. ટુર્નામેન્ટમાં કલેકટરેલખતરની ટીમ તરફથી રમી જિલ્લાની તમામ ટીમોને પ્રોત્સાહિત કર્યા હતા. વિજેતા ટીમને ડો. નિકુંજ અમીન – સી. યુ. શાહ હોસ્પિટલ સુરેન્દ્રનગરના વરદ હસ્તે ટ્રોફી એનાયત કરવામાં આવી હતી.

આ સફળ આયોજન બદલ સુરેન્દ્રનગર જિલ્લા પ્રાથમિક શિક્ષક ઉત્કર્ષ મંડળ પ્રમુખ અશોક જાદવ, મહામંત્રી ટી. જી. મકવાણાએ તમામ તાલુકા સંગઠન ટીમને અભિનંદન પાઠવ્યા હતા.

(અહેવાલ કુસુમબેન ડાભી-સુરેન્દ્રનગર)

આ પણ વાંચો: દલિત પરિવાર પર ટોળાંનો હુમલો, સાત લોકો ગંભીર રીતે ઘાયલ