અમદાવાદ: ભારતીય બંધારણના શિલ્પી, પ્રખર અર્થશાસ્ત્રી અને સામાજિક ન્યાયના પ્રણેતા ડૉ. બાબાસાહેબ આંબેડકરની 14મી એપ્રિલે આવતી જન્મજયંતીને હવે ગણતરીના કલાકો જ બાકી છે. આ અવસરે સમગ્ર ગુજરાતમાં જાણે ઉત્સાહનું ઘોડાપૂર આવ્યું હોય તેવો માહોલ સર્જાયો છે. અમદાવાદના સારંગપુર સ્થિત બાબાસાહેબની પ્રતિમા હોય કે વડોદરાનું સંકલ્પ ભૂમિ, દરેક સ્થળે રોશનીનો ઝળહળાટ જોવા મળી રહ્યો છે. રાજ્યના તમામ મહાનગરો, નગરપાલિકાઓ અને છેવાડાના ગામડાઓ સુધી અત્યારે માત્ર એક જ ગુંજ સંભળાઈ રહી છે – ‘જય ભીમ’.
મધરાતે આતશબાજી સાથે કેક કપાશે
આજે રાત્રિના બરાબર 12 વાગ્યે જ્યારે તારીખ 14 એપ્રિલની શરૂઆત થશે, ત્યારે રાજ્યના ખૂણેખૂણે ભવ્ય આતશબાજી કરવામાં આવશે. અમદાવાદ, રાજકોટ, સુરત અને જામનગર જેવા શહેરોમાં મુખ્ય સર્કલો પર બહુજનો એકત્રિત થઈ કેક કટિંગ કરશે. આતશબાજીના રંગોથી આકાશ ભરાઈ જશે અને ડીજેના તાલે બાબા સાહેબના ગીતો પર યુવાધન ઝૂમી ઉઠશે. આ ઉજવણી માત્ર શહેરો પૂરતી મર્યાદિત નથી, પરંતુ પંચાયત સ્તરે પણ ગ્રામજનો દ્વારા ફટાકડા ફોડીને આ મહાન સપૂતના જન્મોત્સવને વધાવવાની તૈયારીઓ પૂર્ણ કરી લેવામાં આવી છે.
આ પણ વાંચો: અસામાજિક તત્વોએ ડો.આંબેડકરની પ્રતિમા પર ભગવા ઝંડા લગાવી દીધાં
શિક્ષણ અને સંસ્કારનો સંગમ થશે
બાબાસાહેબ આંબેડકરે હંમેશા “શિક્ષિત બનો, સંગઠિત બનો અને સંઘર્ષ કરો”નો સંદેશ આપ્યો હતો. આ સંદેશને ચરિતાર્થ કરવા માટે ગુજરાતના વિવિધ સંગઠનો દ્વારા આ વર્ષે અનોખી પહેલ કરવામાં આવી છે. રાજ્યભરમાં હજારો ગરીબ અને જરૂરિયાતમંદ વિદ્યાર્થીઓને ‘એજ્યુકેશન કિટ’નું વિતરણ કરવામાં આવશે. જેમાં નોટબુક, પેન, કમ્પાસ બોક્સ અને દફતર જેવી સામગ્રીનો સમાવેશ થાય છે. આ ઉપરાંત, અનેક જગ્યાએ પુસ્તક પ્રદર્શન અને બાબાસાહેબના જીવન પર આધારિત ક્વિઝ સ્પર્ધાઓનું આયોજન પણ કરવામાં આવ્યું છે, જેથી નવી પેઢી તેમના વિચારોથી માહિતગાર થાય.
સાંસ્કૃતિક કાર્યક્રમો અને શોભાયાત્રાઓ નીકળશે
ગુજરાતના સાંસ્કૃતિક વારસા સાથે બાબાસાહેબની વિચારધારાને વણી લેવા માટે ગામેગામ ભીમ ભજનો અને લોક ડાયરાના કાર્યક્રમો રાખવામાં આવ્યા છે. જૂનાગઢ, ભાવનગર અને ભુજમાં વહેલી સવારથી જ ભવ્ય શોભાયાત્રાઓ નીકળશે. જેમાં હાથી-ઘોડા અને શણગારેલી બગીઓ સાથે બાબાસાહેબની પ્રતિમાનું નગર ભ્રમણ કરાવવામાં આવશે. સમસ્ત બહુજન સમાજના લોકો પરંપરાગત વસ્ત્રો પહેરીને આ રેલીઓમાં જોડાશે. મહિલાઓ દ્વારા પણ ઠેર ઠેર રંગોળી સ્પર્ધાઓ અને મહિલા સંમેલનોનું આયોજન કરવામાં આવ્યું છે.
આ પણ વાંચો: 50 વર્ષ પહેલા અમદાવાદમાં 14મી એપ્રિલની ઉજવણીની પત્રિકા વાયરલ
નેતાઓ દલિતોના મત લેવા 14મી એપ્રિલ ઉજવશે
ગુજરાતમાં હાલ સ્થાનિક સ્વરાજ્યની ચૂંટણીનો માહોલ છે, ત્યારે મનુવાદી વિચારધારાના રાજકીય પક્ષો પણ દલિતોના મતો મેળવવા માટે 14મી એપ્રિલની ધામધૂમથી ઉજવણી કરી રહ્યાં છે. આ તરફ રાજ્ય સરકાર અને સ્થાનિક વહીવટી તંત્ર દ્વારા પણ આ દિવસની ઉજવણી માટે ખાસ વ્યવસ્થાઓ કરવામાં આવી છે. મુખ્યમંત્રી અને અન્ય મંત્રીઓ વિવિધ સ્થળોએ બાબાસાહેબની પ્રતિમાને પુષ્પાંજલિ અર્પણ કરશે. પોલીસ પ્રશાસન દ્વારા શોભાયાત્રાના રૂટ પર ચુસ્ત બંદોબસ્ત ગોઠવી દેવામાં આવ્યો છે જેથી શ્રદ્ધાળુઓને કોઈ તકલીફ ન પડે. સરકારી કચેરીઓને પણ શણગારવામાં આવી છે.
આમ, 14મી એપ્રિલે ગુજરાત ‘ભીમમય’ બનીને ડૉ. આંબેડકરના સમતાવાદી સમાજના સપનાને આગળ વધારવાનો સંકલ્પ લેશે. ઉજવણીનો આ ઉત્સાહ ચરમસીમાએ છે અને લોકોમાં ભારે ઉમંગ જોવા મળી રહ્યો છે.
આ પણ વાંચો: ડૉ.આંબેડકરની જન્મ જયંતીની ઉજવણી શા માટે જરૂરી છે?
