સાબરકાંઠા જિલ્લામાં સાર્વત્રિક વરસાદ: સૌથી વધુ ઈડરમાં 7.5 ઈંચ

હવામાન વિભાગની આગાહી પ્રમાણે સાબરકાંઠા જિલ્લામાં ભારે અને સાર્વત્રિક વરસાદ નોંધાયો છે. જિલ્લામાં સૌથી વધુ 7.5 ઈંચ વરસાદ ઈડર પંથકમાં નોંધાયો છે. અહીં બુધવારની મોડી રાત્રે ભારે વરસાદ શરૂ થયો હતો. જે આજે બપોર પછી પણ ચાલુ છે. ભારે વરસાદને કારણે અનેક વિસ્તારો જળબંબાકાર થઈ ગયા હતા. ઈડરમાં વરસાદી માહોલ જામ્યો હતો અને ગુરુવારની વહેલી સવારથી બપોર સુધીમાં આશરે સાડા સાત ઈંચ વરસાદ ખાબક્યો હતો. જ્યારે વડાલીમાં એક ઈંચ, ખેડબ્રહ્મામાં 5 ઈંચ, વિજયનગરમાં પોણો ઈંચ, હિંમતનગરમાં ૩ ઈંચ, વડાલીમાં ૪ ઈંચ જ્યારે પ્રાંતિજ અને તલોદમાં ૨-૨ ઈંચ વરસાદ પડ્યો છે.

આ તરફ ભારે વરસાદને પગલે ઈડરના કડીયાદરા ગામના રામનગર વિસ્તારમાં વરસાદી પાણી ભરાઈ જતા સ્થાનિકોને ભારે હાલાકીનો સામનો કરવો પડ્યો હતો.અનેક ઘરોમાં ઢીંચણ સમા પાણી ભરાઈ ગયા હતા અને ઘરવખરી તથા અનાજનો જથ્થો પણ પલળી ગયો હતો. વરસાદી પાણી ઘરોમાં ઘૂસી જતા સ્થાનિકોને આખી રાત પરિવાર સાથે ખાટલા પર બેસી રહીને જાગરણ કરવું પડ્યું હતું. અગાઉ પણ સ્થાનિકોએ ત્રણ વખત આવી પરિસ્થિતિનો સામનો કર્યો છે. આ મામલે ગ્રામ પંચાયતથી લઈને તાલુકા તંત્રને વારંવાર રજૂઆતો કરાઈ છે, છતાં વરસાદી પાણીના ભરાવાનું કોઈ યોગ્ય નિરાકરણ લાવવામાં આવતું નથી. જેના કારણે સ્થાનિકોમાં તંત્ર પ્રત્યે રોષ પણ જોવા મળી રહ્યો છે.

કડીયાદરાના રામનગર વિસ્તારમાં વરસાદી પાણી ક્યાંથી આવ્યું?

ઈડરના ચોટાસણ અને ચોરીવાડ વિસ્તારનું પાણી રોડ મારફતે રામનગરના આશરે ૩૦ થી ૪૦ ઘરોમાં પહોંચ્યું હતું. જેને પરિણામે આંગણવાડી કેન્દ્રની દીવાલ નમી ગઈ હતી અને એક કૂવો પણ ધરાશાયી થયો છે તેવું જાણવા મળ્યું છે. જ્યારે વરસાદ બંધ થતાં પાણી ઓસરી ગયું છે પરંતુ લોકોની મુશ્કેલીઓ યથાવત છે. ત્યારે તંત્ર આ મામલે કોઈ ચોક્કસ નિકાલ લાવે તેવું લોકો ઈચ્છી રહ્યા છે.

ગોરલમાં કારનું ટાયર ખાડામાં પડતા એન્જિનને નુકસાન

ઈડર પંથકમાં વરસાદે ધબધબાટી બોલાવી છે ત્યારે મળતી માહિતી મુજબ ગોરલ ગામના રાકેશ પ્રજાપતિ કાર લઈને ઘરે જતા હતા તે દરમિયાન વરસાદી પાણીના કારણે રસ્તા પરનો ખાડો ન દેખાતા કારનું આગળનું ટાયર ખાડામાં પડ્યું હતું. જેને લઈને કારના એન્જીનના ભાગે નુકશાન પહોંચું હતું. લોકોનું કહેવું છે કે થોડા સમય પહેલા ગોરલ ગામમાં સાબરમતી ગેસની પાઈપ લાઈન નાખવામાં આવી હતી, જેને લઈને ગામમાં જ્યાં ત્યાં ખાડા ખોદી તેનું રીપેરીંગ પણ કરાયું નથી. જેના કારણે આ વરસાદની સીઝનમાં ગામમાં જ્યાં ત્યાં ખાડા પડી ગયા છે.

આ પ ણવાંચો:  લુખ્ખા તત્વોએ દલિત યુવકને ઢોર માર મારી રેતીમાં દાટી દીધો

ઈડરમાં જલારામ મંદિર પાસે આવેલો અંડર બ્રિજ ભરાઈ ગયો

ભારે વરસાદને પગલે ઈડર જલારામ મંદિર પાસે આવેલ અંડર બ્રિજમાં વરસાદી પાણી આવતા છલોછલ ભરાઈ ગયો હતો. અંડર બ્રિજનું કામ હાલમાં પ્રગતિમાં છે, જેથી રેલવેનું કામ કરતી એજન્સી દ્વારા લોકોને અવરજવર કરવા માટે રસ્તાનું ડાયવર્ઝન પણ આપાયું છે.

ભારે વરસાદને પગલે ગુરુવારે શાળાઓમાં રજા જાહેર કરાઈ

સાબરકાંઠા જિલ્લામાં ઈડર, વડાલી અને ખેડબ્રહ્માની પ્રાથમિક શાળામાં રજા રખાઈ હતી. જિલ્લા પ્રાથમિક શિક્ષણ અધિકારીએ બાળકોની સલામતીના ભાગરૂપે આ નિર્ણય જાહેર કર્યો હતો. જ્યારે ભારે વરસાદ ધરાવતા વિસ્તારમાં શાળાઓના આચાર્ય પરિસ્થિતિ મુજબ રજા જાહેર કરી શકશે શિક્ષકો અને આચાર્યોને શાળામાં હાજર રહેવાની સૂચના અપાઈ હતી.

ઈડરની ગૌવાવ અને ભેંસકા નદી બીજીવાર બે કાંઠે વહી

ઈડરના કડિયાદરા અને બડોલી વચ્ચેથી પસાર થતી ગૌવાવ નદીમાં પણ પાણી આવ્યું છે. જ્યારે કાનપુર અને રેવાસ વચ્ચે આવેલી ભેંસકા નદી પણ બે કાંઠે વહી હતી. આ બંને નદીઓ આ ચોમાસામાં બીજી વાર બે કાંઠે વહી છે. જેને પગલે ગુહાઈ જળાશયમાં પાણીની નોંધપાત્ર આવક જોવા મળી હતી.

ભારે વરસાદને પગલે જિલ્લાના જળાશયોમાં પાણીની આવક નોંધાઈ

ભારે વરસાદને પગલે સાબરકાંઠા જિલ્લાના જળાશયોમાં પણ સારી આવક નોંધાઈ છે. જેમાં ધરોઈ જળાશયમાં સૌથી વધુ ૫૯,૧૬૬ ક્યુસેક, હાથમતી જળાશયમાં ૧,૦૨૦ ક્યુસેક, ગુહાઈ જળાશયમાં ૭૨૭ ક્યુસેક અને હરણાવ જળાશયમાં ૫૦૦ ક્યુસેક પાણીની આવક નોંધાઈ છે. હવામાન વિભાગે હજુ પણ વરસાદની આગાહી કરી હોવાથી આગામી દિવસોમાં આ જળાશયોમાં વધુ પાણીની આવક થાય તેવી શક્યતા છે.

આ પ ણવાંચો: વાસણાના જય ભીમ ટ્યુશન કલાસીસ ખાતે ‘બહુજન ક્રાંતિ કસોટી’ યોજાઈ