ઝારખંડની ચાઈબાસા સદર હોસ્પિટલમાં એક ચોંકાવનારી ઘટના સામે આવી છે. અહીં થેલેસેમિયાથી પીડિત 7 માસૂમ બાળકોને HIV સંક્રમિત લોહી ચઢાવી દેવામાં આવતા 5 બાળકો HIV પોઝિટિવ બની ગયા છે. આ ઘટનાથી સરકાર અને આરોગ્ય વિભાગમાં ખળભળાટ મચી ગયો છે. મુખ્યમંત્રી હેમંત સોરેને તાત્કાલિક કાર્યવાહી કરી જવાબદાર અધિકારીઓને સસ્પેન્ડ કર્યા છે અને આ મામલાની તપાસનો આદેશ આપ્યો છે. થેલેસેમિયાથી પીડિત સાત બાળકોનું બ્લડ ટ્રાન્સફ્યુઝન કરાવ્યા બાદ HIV પોઝિટિવ આવ્યાની ઘટનાએ ઝારખંડની આરોગ્ય વ્યવસ્થા પર પ્રશ્નો ઉભા કર્યા છે.
7 વર્ષના બાળકનો HIV પોઝિટિવ રિપોર્ટ આવ્યો
આ મામલો ત્યારે પ્રકાશમાં આવ્યો જ્યારે 7 વર્ષના થેલેસેમિયાગ્રસ્ત બાળકના પરિવારે હોસ્પિટલની બ્લડ બેંક પર આરોપ લગાવ્યો. 13 સપ્ટેમ્બર, 2025 ના રોજ બાળકને બ્લડ ટ્રાન્સફ્યુઝન આપવામાં આવ્યું હતું, પરંતુ 18 ઓક્ટોબરના રોજ ફોલો-અપ ટેસ્ટમાં HIV ટેસ્ટ પોઝિટિવ આવ્યો. પરિવારે બ્લડ બેંકના ટેકનિશિયન પર બેદરકારીનો આરોપ લગાવતા ફરિયાદ નોંધાવી હતી. શનિવારે, રાંચીની પાંચ સભ્યોની તબીબી ટીમે તપાસ હાથ ધરી હતી, જેમાં છ વધુ થેલેસેમિયા બાળકોનો HIV રિપોર્ટ પોઝિટિવ આવ્યો હતો. આ બાળકોને દર 15-30 દિવસે રક્તદાનની જરૂર પડતી હતી. ડેપ્યુટી કમિશનર ચંદન કુમારે જણાવ્યું હતું કે બાળકોના અલગ અલગ બ્લડ ગ્રુપને કારણે ચેપ એક જ દાતાથી નહીં, પરંતુ અલગ અલગ રીતે ફેલાયો હોય તેવું લાગે છે.
આ પણ વાંચો: ગ્રાહકે કહ્યું, ‘અમે નીચી જાતિના લોકોના હાથે બનેલી ચા પીવા માંગતા નથી’
મુખ્યમંત્રી હેમંત સોરેને અધિકારીઓને સસ્પેન્ડ કર્યા
મુખ્યમંત્રી હેમંત સોરેને આ ગંભીર બાબત પર કડક વલણ અપનાવ્યું છે. તેમણે ચાઈબાસા સદર હોસ્પિટલના સિવિલ સર્જન, HIV યુનિટના ઇન્ચાર્જ ડૉક્ટર અને સંબંધિત ટેકનિશિયનને તાત્કાલિક સસ્પેન્ડ કરવાનો આદેશ આપ્યો છે. સરકારે એવો પણ નિર્ણય લીધો છે કે અસરગ્રસ્ત બાળકોની સારવાર સંપૂર્ણપણે રાજ્ય સરકારના ખર્ચે થશે. વધુમાં, દરેક અસરગ્રસ્ત પરિવારને ₹2 લાખની સહાય મળશે. મુખ્યમંત્રીએ જણાવ્યું હતું કે થેલેસેમિયા ધરાવતા બાળકોમાં HIV ચેપ અત્યંત પીડાદાયક અને ચિંતાજનક છે. તેમણે આરોગ્ય પ્રધાન ઇરફાન અંસારીને કડક સૂચનાઓ પણ આપી છે કે રાજ્યમાં નબળી આરોગ્ય વ્યવસ્થા ચલાવી લેવામાં આવશે નહીં.
આરોગ્યમંત્રીએ શું કહ્યું?
રવિવારે, આરોગ્ય પ્રધાન ઇરફાન અન્સારીએ જણાવ્યું હતું કે સરકારે આ બાબતને ખૂબ જ ગંભીરતાથી લીધી છે અને ઉચ્ચ સ્તરીય તપાસનો આદેશ આપ્યો છે. તપાસ દરમિયાન, થેલેસેમિયાથી પીડિત એક બાળક HIV પોઝિટિવ હોવાની પુષ્ટિ થઈ હતી. આ પછી, સિવિલ સર્જન, HIV યુનિટના ઇન્ચાર્જ અને સંબંધિત ટેકનિશિયનોને તાત્કાલિક સસ્પેન્ડ કરવામાં આવ્યા હતા. તેમણે જણાવ્યું હતું કે, “મેં એક ઉચ્ચ સ્તરીય તપાસ સમિતિની રચના કરી છે અને તેને એક અઠવાડિયામાં સંપૂર્ણ તપાસ અહેવાલ રજૂ કરવાનો નિર્દેશ આપ્યો છે. એ પણ સ્પષ્ટપણે કહેવામાં આવ્યું છે કે તપાસમાં ખાતરી કરવામાં આવે કે લોહીનો પુરવઠો બ્લડ બેંકમાંથી આપવામાં આવ્યો હતો કે બહારથી.”
આ પણ વાંચો: બોટાદની દલિત સગીરા પર રેપ કરનારને કોર્ટે 20 વર્ષની સજા કરી
ઝારખંડ હાઇકોર્ટે સરકારની આકરી ઝાટકણી કાઢી
ઝારખંડ હાઇકોર્ટે 26 ઓક્ટોબર, 2025 ના રોજ આ બાબતની સ્વતઃ નોંધ લીધી હતી. કોર્ટે આરોગ્ય વિભાગ પાસેથી સંપૂર્ણ અહેવાલ માંગ્યો છે અને ચાઇબાસા સિવિલ સર્જન ડૉ. સુશાંતો માજી અને રાજ્યના આરોગ્ય સચિવને નોટિસ ફટકારી છે. દરમિયાન, રાજ્ય સરકારે ત્રણ સભ્યોની સ્થાનિક તપાસ સમિતિની રચના કરી છે, જે ટૂંક સમયમાં સરકારને પોતાનો તપાસ અહેવાલ સુપરત કરશે. આ સમગ્ર ઘટના થેલેસેમિયા જેવા રોગો માટે વારંવાર રક્તદાનની પ્રક્રિયામાં સાવધાની રાખવાની જરૂરિયાત દર્શાવે છે. આરોગ્ય નિષ્ણાતો કહે છે કે આવી ઘટનાઓને રોકવા માટે, રક્ત તપાસ પ્રક્રિયાને વધુ કડક બનાવવી જરૂરી છે.
चाईबासा में थैलेसीमिया पीड़ित बच्चों का संक्रमित होना अत्यंत पीड़ादायक है।
राज्य में स्थित सभी ब्लड बैंक का ऑडिट कराकर पांच दिनों में रिपोर्ट सौंपने का काम करे स्वास्थ्य विभाग। स्वास्थ्य प्रक्रिया में लचर व्यवस्था किसी भी हालत में बर्दाश्त नहीं की जाएगी।
स्वास्थ्य मंत्री श्री…— Hemant Soren (@HemantSorenJMM) October 26, 2025
ચાઈબાસા જિલ્લામાં હાલ 515 HIV દર્દીઓ
આરોગ્ય સેવાઓના નિયામક ડૉ. દિનેશ કુમારે જણાવ્યું હતું કે હાલમાં તે સ્પષ્ટ નથી કે બાળકોમાં ચેપ કેવી રીતે ફેલાયો. તેમને ચેપગ્રસ્ત રક્ત ચઢાવવામાં આવ્યું હતું કે અન્ય કોઈ માધ્યમથી ચેપ લાગ્યો હતો તે નક્કી કરવા માટે તપાસ ચાલી રહી છે. તેમણે જણાવ્યું હતું કે ચાઈબાસા જિલ્લામાં હાલમાં 515 HIV સંક્રમિત દર્દીઓ છે, જ્યારે 56 બાળકો થેલેસેમિયાથી પીડાય છે. ટીમે બ્લડ બેંક, PICU વોર્ડ અને પ્રયોગશાળાનું નિરીક્ષણ કર્યું, સંબંધિત કર્મચારીઓની મુલાકાત લઈને તમામ સ્ટાફ અને ડોકટરોને તપાસ હેઠળ લાવવા સૂચનાઓ આપવામાં આવી છે.
આ પણ વાંચો: દલિત વિદ્યાર્થી બ્રાહ્મણના ટિફિનને અડી જતા માર માર્યો
Users Today : 1724