PSI-LRD ની 13,591 જગ્યાઓ માટે શારીરિક કસોટીની તારીખ જાહેર

ગુજરાતમાં પોલીસની વર્દી પહેરવાનું સપનું સેવતા યુવાનો માટે અત્યંત મહત્વના સમાચાર સામે આવ્યા છે. ગુજરાત પોલીસ ભરતી બોર્ડ દ્વારા પોલીસ ભરતી (Police Recruitment) ની શારીરિક કસોટીની તારીખ સત્તાવાર રીતે જાહેર કરી દેવામાં આવી છે. રાજ્યભરમાં પોલીસ સબ ઇન્સ્પેક્ટર (PSI) અને લોકરક્ષક દળ (LRD) ની કુલ 13,591 ખાલી જગ્યાઓ ભરવા માટે આગામી 21 જાન્યુઆરીથી મેદાની કસોટીનો પ્રારંભ થશે.

21 જાન્યુઆરીથી દોડ અને શારીરિક માપદંડોની ચકાસણી થશે

ગુજરાત પોલીસ વિભાગમાં વર્ગ 3 સંવર્ગ હેઠળ થનારી આ મેગા ભરતી માટે લાખો ઉમેદવારો દિવસ રાત મહેનત કરી રહ્યા હતા. આખરે તેમની આતુરતાનો અંત આવ્યો છે. ગુજરાત પોલીસ ભરતી બોર્ડ (Gujarat Police Recruitment Board) દ્વારા કરવામાં આવેલી જાહેરાત મુજબ, PSI અને LRD બંને કેડર માટે સંયુક્ત રીતે શારીરિક કસોટી યોજવામાં આવશે. રાજ્યના વિવિધ જિલ્લાઓમાં નક્કી કરાયેલા પોલીસ હેડક્વાર્ટર અને ગ્રાઉન્ડ્સ પર 21 જાન્યુઆરીથી દોડ અને અન્ય શારીરિક માપદંડોની ચકાસણી શરૂ થશે.

આ પણ વાંચો: નાતાલમાં બજરંગ દળના કાર્યકરોએ શાળા, મોલમાં તોફાન મચાવ્યું

13,591 જગ્યા માટે લાખો ઉમેદવારો મેદાનમાં

આ વખતની ભરતી પ્રક્રિયા ખૂબ જ વિશાળ છે. કુલ 13,591 જગ્યાઓ (Vacancies) ભરવામાં આવનાર છે, જેમાં પોલીસ કોન્સ્ટેબલ અને PSI કક્ષાના પદોનો સમાવેશ થાય છે. આ ભરતી માટે રાજ્યભરમાંથી જબરદસ્ત પ્રતિસાદ મળ્યો છે અને મોટી સંખ્યામાં ઓનલાઈન અરજીઓ આવી છે. હવે લાખો ઉમેદવારો મેદાનમાં પોતાની શારીરિક ક્ષમતા પુરવાર કરવા ઉતરશે. ભરતી પ્રક્રિયામાં સંપૂર્ણ પારદર્શિતા જળવાઈ રહે તે માટે બોર્ડ કટિબદ્ધ છે.

ભૂતકાળના અનુભવોને ધ્યાનમાં રાખીને આ વખતે શારીરિક કસોટીમાં અત્યાધુનિક ટેકનોલોજીનો ઉપયોગ કરવામાં આવશે.

આ પણ વાંચો:  ગુજરાત પોલીસમાં 13,591 પોસ્ટ પર સીધી ભરતીની જાહેરાત

જેમ કે, RFID ચિપ, જે દોડ દરમિયાન સમયની ચોકસાઈ માટે દરેક ઉમેદવારને રેડિયો ફ્રિકવન્સી આઈડેન્ટિફિકેશન ચિપ આપવામાં આવશે. સમગ્ર મેદાન અને પ્રક્રિયા પર સીસીટીવી કેમેરાની બાજ નજર રહેશે. આ વ્યવસ્થાને કારણે કોઈ પણ પ્રકારની ગેરરીતિને અવકાશ રહેશે નહીં.

સત્તાવાર વેબસાઈટ પરથી કોલ લેટર ડાઉનલોડ કરી શકાશે

ઉમેદવારો ટૂંક સમયમાં જ સત્તાવાર વેબસાઈટ પરથી પોતાના કોલ લેટર ડાઉનલોડ કરી શકશે. ભરતી બોર્ડે તમામ ઉમેદવારોને ખાસ અપીલ કરી છે કે સોશિયલ મીડિયા પર ચાલતી પાયાવિહોણી અફવાઓ પર ધ્યાન ન આપવું. માત્ર અધિકૃત વેબસાઈટ પર આવતી સૂચનાઓને જ સાચી માનવી. જે ઉમેદવારો આ શારીરિક કસોટીમાં સફળ થશે, તેઓ જ આગળની લેખિત પરીક્ષા માટે ક્વોલિફાય ગણાશે.

ગુજરાત પોલીસ ભરતી બોર્ડની જાહેરાત ક્રમાંકઃ GPRB/202526/1 અન્વયે પો.સ.ઇ. કેડર અને લોકરક્ષક કેડરની શારીરિક કસોટી તા.૨૧/૦૧/૨૦૨૬ના રોજથી શરૂ થનાર છે. જેના કોલલેટર ડાઉનલોડ કરવા અંગેની વિગતો હવે પછી જણાવવામાં આવશે. જેની ઉમેદવારોએ નોંધ લેવી.

— Gujarat Police Recruitment Board Official (@GPRB_GNR) January 3, 2026

આ પણ વાંચો: ‘LRD પરીક્ષામાં દોડના માર્ક કાઢી નખાતા SC-ST-OBC ને અન્યાય’