દુનિયાના અન્ય દેશોમાં જ્યાં લોકોની જિંદગી કેવી રીતે બહેતર બનાવી શકાય તેને લઈને સંશોધનો થઈ રહ્યાં છે, ત્યારે આપણા કથિત વિશ્વગુરુ ભારત દેશમાં જાતિવાદી તત્વો અને ટોળાં કાયદો હાથમાં લઈને ગમે તેને તાલીબાની સજા ફટકારીને વિકૃત આનંદ લે છે. આવી જ એક ઘટના ઝારખંડના પાટનગર રાંચીમાંથી સામે આવી છે. જ્યાં બે આદિવાસી મહિલાઓને ટોળાએ ચોર સમજીને તેમનું મોં કાળું કરી શેરીઓમાં ફેરવી હતી. આ ઘટનાએ સમગ્ર રાજ્યમાં ચકચાર મચાવી દીધી છે.
મામલો શું હતો?
ઘટના ઝારખંડની રાજધાની રાંચીના સદર પોલીસ સ્ટેશન વિસ્તાર હેઠળના ભાભાનગર રોડ નંબર 5 પર બની હતી. અહીં બે આદિવાસી મહિલાઓને ચોરીની આશંકામાં ઉશ્કેરાયેલા ટોળાએ મોં કાળું કરી, તેમના ગળામાં જૂતા અને ચપ્પલનો હાર પહેરાવીને આખા મહોલ્લામાં ફેરવી હતી. આટલેથી જ ન અટકીને, આરોપીઓએ મહિલાઓ સાથે નિર્દયતાથી મારપીટ પણ કરી હતી.
આ પણ વાંચો: દલિત યુટ્યુબર મુકેશ મોહનને 50 કરોડની માનહાનિ નોટિસ ફટકારાઈ
સતત 4 દિવસ સુધી બંનેને ટોર્ચર કરાઈ
પ્રાપ્ત માહિતી અનુસાર, પીડિત મહિલાઓ ભાભાનગર વિસ્તારમાં ભાડાના મકાનમાં રહીને મજૂરીકામ કરી પોતાનું ગુજરાન ચલાવતી હતી. તેમના પર કોઈ વસ્તુની ચોરી કરવાનો પાયાવિહોણો આરોપ લગાવીને કેટલાક અસામાજિક તત્વોએ હોબાળો મચાવ્યો હતો. આ અત્યાચાર કોઈ એક દિવસની ઘટના નહોતી, પરંતુ ૨૬ માર્ચ, ૨૦૨૬ થી શરૂ કરીને સતત ચાર દિવસ સુધી આ મહિલાઓનું શારીરિક અને માનસિક શોષણ કરવામાં આવ્યું હતું. આરોપીઓએ એટલી હદે દાદાગીરી કરી હતી કે આસપાસના રહીશોને પણ ધમકી આપી હતી કે જો કોઈ આ ઘટનાનો વીડિયો ઉતારશે અથવા ફોટો પાડશે, તો તેની હાલત પણ ખરાબ કરવામાં આવશે. માનવતા તો ત્યારે મરી પરવારી જ્યારે ભીડમાં ઉભેલા લોકો તમાશો જોતા રહ્યા અને કોઈએ પણ આ મહિલાઓને બચાવવા માટે આગળ આવવાની હિંમત દાખવી નહીં.
મુખ્ય સૂત્રધારો પકડાયા, 15ની ઓળખ શરુ
આ અત્યંત ગંભીર મામલે જ્યારે સ્થાનિક મહિલા સંગઠનો સંગઠિત થયા અને પીડિતાઓને બચાવી ત્યારે સત્ય બહાર આવ્યું હતું. સદર પોલીસ સ્ટેશનમાં ફરિયાદ નોંધાયા બાદ પોલીસે તાત્કાલિક એક્શન લીધા છે. પોલીસે આ અમાનવીય કૃત્યના મુખ્ય સૂત્રધાર ગણાતા પંકજ અને સનાતન નામના બે વ્યક્તિઓની ધરપકડ કરી લીધી છે. રાંચીના પોલીસ વડા (SSP) એ આ મામલે કડક વલણ અપનાવતા જણાવ્યું છે કે, “કોઈપણ સંજોગોમાં ભીડને કાયદો હાથમાં લેવાની મંજૂરી આપી શકાય નહીં.” પોલીસે હાલમાં તે વીડિયો ફૂટેજ પણ કબજે કર્યા છે જેમાં મહિલાઓને અપમાનિત કરવામાં આવી રહી હતી. આ ફૂટેજના આધારે અન્ય 10 થી 15 લોકોની ઓળખ કરવાની પ્રક્રિયા ચાલુ છે, જેઓ આ હિંસક ભીડનો હિસ્સો હતા.
આ પણ વાંચો: ગુજરાતમાં હવે યુવાનો ભાગીને આંતરજ્ઞાતિય લગ્નો નહીં કરી શકે?
આદિવાસી સંગઠનોમાં ભારે રોષ, આંદોલનની ચીમકી
આ ઘટના સામે આવ્યા બાદ ઝારખંડના વિવિધ આદિવાસી સંગઠનોમાં ભારે આક્રોશ ફાટી નીકળ્યો છે. આદિવાસી હિતરક્ષક સમિતિ, આદિવાસી સેન્ગેલ અભિયાન અને વિવિધ મહિલા ઉત્થાન મંડળોએ રાંચીના અલ્બર્ટ એક્કા ચોક ખાતે ભેગા થઈને વિરોધ પ્રદર્શન શરૂ કર્યા છે. સંગઠનોની માંગ છે કે આરોપીઓ પર SC/ST એક્ટ હેઠળ કડક કલમો લગાવીને કેસ ચલાવવામાં આવે. આદિવાસી નેતાઓએ સરકારને અલ્ટીમેટમ આપ્યું છે કે જો આગામી 48 કલાકમાં તમામ દોષિતોની ધરપકડ કરવામાં નહીં આવે અને પીડિત મહિલાઓને વળતર આપવામાં નહીં આવે, તો સમગ્ર રાજ્યમાં ‘ઝારખંડ બંધ’નું એલાન આપવામાં આવશે. આ આંદોલનને કારણે રાજકીય ગરમાવો પણ વધી ગયો છે અને વિપક્ષે સરકાર પાસે સુરક્ષા મુદ્દે જવાબ માંગ્યો છે.
કાયદો વ્યવસ્થા સામે સવાલો ઉઠ્યાં
આ ઘટના ફરી એકવાર એ સવાલ ઉભો કરે છે કે શું આપણો સમાજ ખરેખર શિક્ષિત થઈ રહ્યો છે? જ્યારે દેશમાં પોલીસ અને ન્યાયતંત્ર અમલમાં છે, ત્યારે સામાન્ય નાગરિકો કેવી રીતે ન્યાયાધીશ બનીને કોઈની આબરૂના ધજાગરા ઉડાડી શકે? આદિવાસી મહિલાઓ પ્રત્યેનો આ દૃષ્ટિકોણ અને આચરવામાં આવેલી અમાનવીય હિંસા માત્ર એક ગુનો નથી, પણ તે સામાજિક પતનનું પ્રતીક છે. રાંચીની આ ઘટનાએ સાબિત કર્યું છે કે કાયદાનો ડર ઓછો થઈ રહ્યો છે. સરકારે માત્ર ધરપકડ કરીને સંતોષ માનવાને બદલે આવા કિસ્સાઓમાં દાખલારૂપ સજા કરવી જોઈએ જેથી ભવિષ્યમાં ભીડતંત્ર લોકશાહી પર હાવી ન થઈ જાય.
આ પણ વાંચો: પોલીસે દલિત યુવકને પટ્ટાથી માર મારી વીજળીના ઝાટકા આપ્યા!
