Dalit News: જાતિવાદી તત્વો સામે જ્યારે પોલીસ તમામ પુરાવાઓ આપવા છતાં પણ કાર્યવાહી ન કરે ત્યારે સામાન્ય માણસ માટે જીવવું દુષ્કર બની જતું હોય છે. આવી જ એક ઘટનામાં બે દલિત યુવકોએ જાતિવાદી તત્વોના ત્રાસથી ડરીને ગામની પાણીની ટાંકી પર ચડીને જીવ બચાવવો પડ્યો હતો.
મામલો મહિલાઓ માટે નરક ગણાતા રાજસ્થાનનો છે. અહીંના બીકાનેર જિલ્લાના કાકડા ગામમાં જાતિવાદી તત્વોના હુમલાનો શિકાર બનેલા બે દલિત યુવકોએ જીવ બચાવવા અને ન્યાય મેળવવા માટે ગામની ટાંકી પર ચડી જવું પડ્યું હતું. બંને યુવકોએ જ્યારે જોયું કે પોલીસ તંત્ર ગુનેગારોને પકડવાને બદલે મૌન સેવી રહ્યું છે, ત્યારે તેમણે ન્યાય મેળવવા માટે પોતાનો જીવ જોખમમાં મૂક્યો હતો અને બીકાનેરના સ્વર્ણ જયંતિ નગર સ્થિત પાણીની ટાંકી પર ચઢી ગયા હતા.
મામલો શું હતો?
આ ઘટનાની મૂળ કાકડા ગામમાં થોડા દિવસો પહેલા બનેલી એક ઘટનામાં રહેલા છે. ગામના કેટલાક પ્રભુત્વ ધરાવતા જાતિવાદી તત્વોએ આ દલિત યુવકોને રસ્તામાં રોકી, તેમની સાથે કારણ વિના મારામારી કરી હતી. પીડિતોનો આક્ષેપ છે કે હુમલાખોરોએ માત્ર શારીરિક ઈજા જ નહોતી પહોંચાડી, પરંતુ જાતિસૂચક ગાળો ભાંડીને તેમના આત્મસન્માનને પણ ઠેસ પહોંચાડી હતી.
આ પણ વાંચો: 34 વર્ષ પહેલા ફેક એન્કાઉન્ટર થયું, આદિવાસી મહિલાએ ન્યાય માટે જમીન વેચી દીધી
એટ્રોસિટીની ફરિયાદ છતાં કાર્યવાહી નહીં
ઘટના બાદ પીડિતોએ હિંમત ભેગી કરીને જસરાસર પોલીસ સ્ટેશનમાં એસસી/એસટી (SC/ST) એક્ટ હેઠળ ફરિયાદ નોંધાવી હતી. સામાન્ય રીતે આવા સંવેદનશીલ કિસ્સાઓમાં ત્વરિત કાર્યવાહીની અપેક્ષા હોય છે, પરંતુ અહીં ચિત્ર ઉલટું હતું. દિવસો વીતવા છતાં પોલીસે એક પણ આરોપીની ધરપકડ કરી નહોતી. યુવકોનો આક્ષેપ છે કે આરોપીઓ રાજકીય વગ અને સામાજિક વર્ચસ્વ ધરાવતા હોવાથી પોલીસ તેમને છાવરી રહી હતી. પોલીસની આ ઢીલી નીતિને કારણે બંને યુવકો પર જીવનું જોખમ ઉભું થયું હતું. આથી બંને યુવકો ગામની પાણીની ટાંકી પર ચઢીને બેસી ગયા હતા.
પાણીની ટાંકી પર સત્યાગ્રહ: “ન્યાય નહીં તો મોત”
બિકાનેરના સ્વર્ણ જયંતિ નગરની ગગનચુંબી પાણીની ટાંકી પર જ્યારે લોકોએ બે યુવકોને જોયા, ત્યારે સમગ્ર વિસ્તારમાં અફરાતફરી મચી ગઈ હતી. યુવકો હાથમાં બેનરો અને ન્યાયની માંગ સાથે ટાંકીની સૌથી ઉપરની સીડી સુધી પહોંચી ગયા હતા. તેમણે નીચે ઉતરવાની સ્પષ્ટ ના પાડી દીધી અને માંગ કરી કે જ્યાં સુધી જિલ્લા કલેક્ટર અને એસપી (SP) પોતે આવીને આરોપીઓની ધરપકડની ખાતરી ન આપે ત્યાં સુધી તેઓ નીચે ઉતરશે નહીં. આ દરમિયાન મોટી સંખ્યામાં દલિત સંગઠનો અને સ્થાનિક લોકો પણ ટાંકીની નીચે એકઠા થઈ ગયા હતા અને પોલીસ વિરોધી સૂત્રોચ્ચાર કર્યા હતા.
આ પણ વાંચો: ભૂંડે પટેલના ખેતરમાંથી પાણી પીતા દલિત પિતા-પુત્ર પર હુમલો
તંત્રમાં દોડધામ મચી ગઈ
ઘટનાની ગંભીરતા જોતા જયુપી (જયનારાયણ વ્યાસ કોલોની) પોલીસ સ્ટેશનના અધિકારીઓ અને વહીવટી તંત્રના પ્રતિનિધિઓ ઘટનાસ્થળે પહોંચ્યા હતા. પરિસ્થિતિ એટલી તણાવપૂર્ણ હતી કે નીચે ગાદલા પાથરવામાં આવ્યા હતા અને એમ્બ્યુલન્સ તૈનાત કરવામાં આવી હતી. અધિકારીઓએ લાઉડસ્પીકર દ્વારા યુવકોને વારંવાર વિનંતી કરી હતી કે તેઓ કાયદો હાથમાં ન લે અને નીચે ઉતરે.
આખરે પોલીસ તંત્રે નમતું જોખવું પડ્યું
કલાકો સુધી ચાલેલા આ હાઈવોલ્ટેજ ડ્રામા બાદ, પોલીસના ઉચ્ચ અધિકારીઓએ પીડિતોના પરિવારજનો અને સામાજિક આગેવાનોની હાજરીમાં લેખિત ખાતરી આપી છે. પોલીસે જણાવ્યું છે કે હુમલાખોરો સામે કડક કલમો હેઠળ કાર્યવાહી કરવામાં આવશે અને આગામી 24 થી 48 કલાકમાં તેમની ધરપકડ કરી લેવામાં આવશે. આ ખાતરી બાદ બંને યુવકો સુરક્ષિત રીતે નીચે ઉતર્યા હતા. હાલ કાકડા ગામમાં શાંતિ સમિતિની બેઠક બોલાવવામાં આવી છે અને કોઈ અનિચ્છનીય બનાવ ન બને તે માટે પોલીસ પેટ્રોલિંગ વધારી દેવામાં આવ્યું છે.
આ પણ વાંચો: પોલીસે દલિત યુવકને પટ્ટાથી માર મારી વીજળીના ઝાટકા આપ્યા!
