ભારતમાં દલિત સમાજના યુવાનોના પોલીસ કસ્ટડીમાં મોતની ઘટનાઓ સતત વધી રહી છે. આવી જ વધુ એક ઘટનામાં એક 26 વર્ષીય યુવકનું મોત થઈ ગયું છે. તમિલનાડુના શિવગંગા જિલ્લામાં 26 વર્ષીય દલિત યુવક આકાશના કરૂણ મોતના મામલે મદ્રાસ હાઈકોર્ટની મદુરાઈ બેન્ચ સમક્ષ અત્યંત ચોંકાવનારા દસ્તાવેજો રજૂ કરવામાં આવ્યા છે. આ કેસમાં સૌથી મહત્વનો વળાંક ત્યારે આવ્યો જ્યારે જ્યુડિશિયલ મેજિસ્ટ્રેટ સમક્ષ નોંધાયેલા રિમાન્ડ ઓર્ડરની વિગતો જાહેર થઈ. આ દસ્તાવેજ હવે કાયદાકીય રીતે આકાશનું મૃત્યુ પૂર્વેનું નિવેદન એટલે કે ‘ડાઈંગ ડિક્લેરેશન’ બની ગયું છે. સામાન્ય રીતે રિમાન્ડ ઓર્ડર એક પ્રક્રિયાગત દસ્તાવેજ હોય છે, પરંતુ આ કિસ્સામાં તેમાં મૃતકે પોતાની અંતિમ ક્ષણો પહેલા પોલીસ દ્વારા ગુજારવામાં આવેલા ત્રાસનું વિગતવાર વર્ણન કર્યું હતું, જે હવે પોલીસ વિભાગ માટે ગળાંમાંનું હાડકું બની શકે તેમ છે.
પથ્થરો વચ્ચે પગ ફસાવીને ભયાનક ત્રાસ ગુજાર્યો
આકાશે મેજિસ્ટ્રેટ સમક્ષ આપેલા નિવેદનમાં પોલીસની જે ક્રૂરતા વર્ણવી છે તે હૃદય કંપાવી દે તેવી છે. તેણે આક્ષેપ કર્યો હતો કે 6 માર્ચ 2026ના રોજ સાંજે સાદા ગણવેશમાં આવેલા અંદાજે 10 પોલીસ કર્મચારીઓએ તેને અને તેના સાથી આરોપી ગુનાને અટકાયતમાં લીધા હતા. ત્યારબાદ તેને એક અલગ વાહનમાં લઈ જઈ આંખો પર પટ્ટી બાંધી દેવામાં આવી હતી. આકાશે જણાવ્યું હતું કે પોલીસ અધિકારીઓએ તેના જમણા પગને બે મોટા પથ્થરોની વચ્ચે નિર્દયતાથી ફસાવી દીધો હતો અને તેના પર ભીનો કોથળો ઢાંકી દીધો હતો. ત્યારબાદ લોખંડના ભારે સળિયા વડે તેના પગ પર વારંવાર પ્રહાર કરવામાં આવ્યા હતા. આ અત્યાચાર એટલો ભયાનક હતો કે તેના પગના હાડકાંના ટુકડા થઈ ગયા હતા અને સ્થળ પર જ ભારે રક્તસ્ત્રાવ શરૂ થઈ ગયો હતો.
આ પણ વાંચો: પોલીસે કહ્યું હતું, ‘તારો છોકરો હાથમાં આવશે તો મારી નાખીશું’ અને એવું જ થયું!
પોલીસની ધમકી અને પુરાવા છુપાવવાનો પ્રયાસ
પોલીસે માત્ર શારીરિક અત્યાચાર જ નહોતો ગુજાર્યો, પરંતુ આ ગુનાને અકસ્માતમાં ખપાવવાનો પણ પ્રયાસ કર્યો હતો. આકાશે તેના નિવેદનમાં ખુલાસો કર્યો હતો કે લોહીલુહાણ હાલતમાં જ્યારે તેને હોસ્પિટલ લઈ જવામાં આવી રહ્યો હતો, ત્યારે પોલીસ કર્મચારીઓએ તેને ગંભીર ધમકી આપી હતી. તેને આદેશ આપવામાં આવ્યો હતો કે જો ડોક્ટર કે મેજિસ્ટ્રેટ પૂછે તો તેણે એવું કહેવું કે તે મેલાપાલઈ પુલ પરથી પડી જવાથી ઈજાગ્રસ્ત થયો છે. આ નિવેદન સાબિત કરે છે કે પોલીસ પોતાના પાપ છુપાવવા માટે સત્તાનો દુરુપયોગ કરી રહી હતી. શરૂઆતમાં પોલીસ પ્રશાસને દાવો કર્યો હતો કે આકાશને શ્વાસ લેવામાં તકલીફ થતી હતી, પરંતુ તેના પોસ્ટમોર્ટમ રિપોર્ટ અને પૂર્વ નિવેદને પોલીસના આ દાવાઓની પોલ ખોલી નાખી છે.
મજબૂત પુરાવા છતાં એકેય પોલીસ અધિકારીની ધરપકડ નહીં
આ મામલે હ્યુમન રાઈટ્સ ડિફેન્ડર અને પીપલ્સ વોચના એક્ઝિક્યુટિવ ડાયરેક્ટર હેન્રી ટિપાગ્નેએ મીડિયા સાથેની વાતચીતમાં જણાવ્યું હતું કે આ દસ્તાવેજ શિવગંગામાં પોલીસ ટોર્ચરને સાબિત કરતો સૌથી મજબૂત પુરાવો છે. મદ્રાસ હાઈકોર્ટે આ ઘટનાની ગંભીર નોંધ લઈને એસસી-એસટી અત્યાચાર નિવારણ અધિનિયમ હેઠળ ગુનો નોંધવાનો કડક આદેશ આપ્યો છે.
આ પણ વાંચો: કેરળ કેવી રીતે ગરીબી મુક્ત રાજ્ય બન્યું, રહસ્ય શું છે?
હાલમાં આ કેસની તપાસ સીબી-સીઆઈડી (CB-CID) ને સોંપવામાં આવી છે. જોકે, આશ્ચર્ય અને આઘાતની વાત એ છે કે આટલા મજબૂત પુરાવા હોવા છતાં, અત્યાર સુધી કોઈ પણ જવાબદાર પોલીસ અધિકારી કે કર્મચારીની ધરપકડ કરવામાં આવી નથી કે તેમને ફરજ પરથી મોકૂફ કરવામાં આવ્યા નથી.
મૃતકના પરિવારે ન્યાયની માંગ કરી
મૃતક આકાશની ધરપકડ એક સામાન્ય ઝઘડા બાદ કરવામાં આવી હતી, જેમાં તેના પર હત્યાના પ્રયાસનો આરોપ હતો. જોકે, કાયદાકીય પ્રક્રિયા પૂર્ણ થાય તે પહેલા જ પોલીસની લાઠીઓએ તેનો જીવ લઈ લીધો. તેના પરિવારજનોએ આક્ષેપ કર્યો છે કે આકાશ દલિત હોવાથી તેની સાથે આવું અમાનવીય વર્તન કરવામાં આવ્યું છે. શિવગંગા અને મદુરાઈમાં આ ઘટનાને પગલે દલિત સંગઠનોમાં ભારે રોષ જોવા મળી રહ્યો છે. હાઈકોર્ટની દેખરેખ હેઠળ ચાલી રહેલી આ તપાસમાં જો દોષિત પોલીસકર્મીઓ સામે કડક કાર્યવાહી નહીં થાય, તો આગામી દિવસોમાં રાજ્યભરમાં ઉગ્ર આંદોલનની ચીમકી આપવામાં આવી છે. આ કેસ ફરી એકવાર પોલીસ કસ્ટડીમાં થતા મોતના ગંભીર પ્રશ્નને દેશના નકશા પર લઈ આવ્યો છે.
આ પણ વાંચો: ભાજપ નેતાએ દલિત પરિવારને માર મારી ત્રણ રાઉન્ડ ફાયરિંગ કર્યું
