Tribal News: દેશમાં સ્ત્રી સુરક્ષાના મોટા દાવાઓ અને કડક કાયદાઓ વચ્ચે પણ આદિવાસી દીકરીઓ પર થતા અત્યાચારોની ઘટનાઓ ચિંતાજનક રીતે વધી રહી છે. આવી જ એક ચોંકાવનારી ઘટના ઝારખંડના લાતેહાર જિલ્લાના મહુઆડાંઢ પોલીસ સ્ટેશન વિસ્તારમાંથી સામે આવી છે. જ્યાં એક સગીર આદિવાસી બાળકી સાથે પાંચ યુવકોએ મળીને ગેંગરેપ કર્યો હતો. ચોંકાવનારી બાબત એ છે કે, આરોપીઓમાં 3 સગીર છે. આ ઘટના માત્ર એક ગુનો નથી, પરંતુ આદિવાસી વિસ્તારોમાં દીકરીઓ કેટલી અસુરક્ષિત છે તેનો પુરાવો છે.
મામલો શું હતો
આ હૃદયદ્રાવક ઘટના શનિવારની વહેલી સવારે બની હતી. મહુઆડાંઢ પોલીસ સ્ટેશન વિસ્તારની રહેવાસી એક સગીર આદિવાસી બાળકી ગામમાં આયોજિત એક લગ્ન સમારોહમાં હાજરી આપવા આવી હતી. આ જ સમારોહમાં પાંચ યુવકો પણ જાનૈયા તરીકે સામેલ થવા આવ્યા હતા. લગ્નની ધામધૂમ અને આનંદના માહોલ વચ્ચે, સવારે અંદાજે 3:00 થી 4:00 વાગ્યાના અરસામાં આ પાંચેય નરાધમોએ નિર્દોષ સગીરાને એકલી જોઈ તેનું અપહરણ કર્યું હતું.
આરોપીઓ તેને પરાણે નજીકના ગાઢ જંગલમાં ખેંચી ગયા હતા, જ્યાં પાંચેયે વારાફરતી સગીરા પર સામૂહિક દુષ્કર્મ ગુજાર્યું હતું. આ અત્યાચાર બાદ પીડિતાને ગંભીર હાલતમાં અને જીવન-મરણ વચ્ચે ઝોલા ખાતી સ્થિતિમાં જંગલમાં જ છોડીને તમામ આરોપીઓ ત્યાંથી ફરાર થઈ ગયા હતા. ભયભીત અને લોહીલુહાણ હાલતમાં પીડિતાએ હિંમત ભેગી કરી કોઈક રીતે પોતાના ઘરે પહોંચી પરિવારજનોને આ ભયાનક આપવીતી જણાવી હતી.
આ પણ વાંચો: જામનગરમાં નાસ્તાની માથાકૂટમાં દલિત યુવકનું નાક તોડી નાખ્યું
પોલીસે પાંચેય આરોપીઓને ઝડપી પાડ્યા
ઘટનાની જાણ થતા જ આદિવાસી સમાજમાં ભારે રોષ ફાટી નીકળ્યો હતો. પીડિતાના પરિવારજનો તુરંત પોલીસ સ્ટેશન પહોંચ્યા હતા અને લેખિત ફરિયાદ નોંધાવી હતી. મહુઆડાંઢ પોલીસ સ્ટેશનના પ્રભારી મનોજ કુમારે આ મામલાની ગંભીરતાને સમજીને તત્કાલ સર્ચ ઓપરેશન શરૂ કર્યું હતું. પોલીસે ગણતરીના કલાકોમાં જ પાંચેય આરોપીઓને શોધી કાઢ્યા હતા.
પાંચ આરોપીઓ પૈકી ત્રણ સગીર
ચોંકાવનારી બાબત એ છે કે પકડાયેલા પાંચ આરોપીઓમાંથી ત્રણ આરોપીઓ પોતે જ સગીર વયના છે. પોલીસે બે પુખ્ત વયના આરોપીઓની ધરપકડ કરી તેમને જેલના સળિયા પાછળ ધકેલી દીધા છે, જ્યારે ત્રણ સગીર આરોપીઓને કાયદાકીય પ્રક્રિયા પૂર્ણ કર્યા બાદ ન્યાયિક કસ્ટડીમાં મોકલવામાં આવ્યા છે. પોલીસ હાલ આ મામલે સઘન તપાસ કરી રહી છે અને પીડિતાના મેડિકલ રિપોર્ટ્સ અને નિવેદનોના આધારે કેસને મજબૂત બનાવી રહી છે.
આદિવાસી દીકરીઓ પર વધતું જોખમ
લાતેહારની આ ઘટના કોઈ છૂટીછવાઈ ઘટના નથી. છેલ્લા કેટલાક સમયથી ઝારખંડ, છત્તીસગઢ અને ઓડિશા જેવા રાજ્યોમાં આદિવાસી દીકરીઓ વિરુદ્ધ હિંસાના ગ્રાફમાં ધરખમ વધારો થયો છે. આંકડાકીય વિશ્લેષણ દર્શાવે છે કે ગુનેગારો ઘણીવાર આદિવાસી યુવતીઓની ભૌગોલિક એકલતા અને નબળી સામાજિક-આર્થિક સ્થિતિનો ગેરલાભ ઉઠાવે છે. ખાસ કરીને લગ્ન કે મેળા જેવા જાહેર પ્રસંગોમાં પણ હવે આ દીકરીઓ સુરક્ષિત રહી નથી તે અત્યંત શરમજનક છે.
આ પણ વાંચો: પ્લોટ વિવાદમાં દલિતો પર ખૂની હુમલો, હાથ-પગ ભાંગી નાખ્યા
આ કેસમાં સગીર વયના આરોપીઓની સંડોવણી એ સમાજ માટે સૌથી મોટો ખતરો છે. તે દર્શાવે છે કે નવી પેઢીમાં નૈતિક મૂલ્યોનું પતન થઈ રહ્યું છે અને કાયદાનો કોઈ જ ડર રહ્યો નથી. આદિવાસી વિસ્તારોમાં શિક્ષણ અને જાગૃતિના અભાવનો ફાયદો ઉઠાવીને અપરાધીઓ બેફામ બની રહ્યા છે.
દીકરીઓની સુરક્ષાને લઈને સવાલો ઉઠ્યાં
પીડિતાની માતાની અરજી પર પોલીસે જે ત્વરિત કાર્યવાહી કરી છે તે પ્રશંસનીય છે, પરંતુ ન્યાય ત્યારે જ ગણાશે જ્યારે આ નરાધમોને કઠોરતમ સજા મળે. સમાજ તરીકે આપણે આત્મમંથન કરવાની જરૂર છે કે જ્યારે એક આદિવાસી દીકરી પોતાના જ ગામમાં કે લગ્ન પ્રસંગમાં સુરક્ષિત નથી, ત્યારે આપણે પ્રગતિશીલ ભારતની કઈ વ્યાખ્યા કરી રહ્યા છીએ? આદિવાસી વિસ્તારોમાં માત્ર પોલીસ ચોકીઓ વધારવાથી નહીં, પરંતુ સામાજિક માનસિકતા બદલવા અને કાયદાના કડક અમલથી જ આ દીકરીઓને સુરક્ષા મળી શકશે.
આ પણ વાંચો: દલિત સગીરાને ખેતરની ઓરડીમાં ગોંધી આખી રાત દુષ્કર્મ આચર્યું
