વડોદરા શહેરના કમાટીબાગ ખાતે આવેલી ઐતિહાસિક ડૉ. બાબાસાહેબ આંબેડકર સંકલ્પ ભૂમિ માટે છેલ્લા એક દાયકામાં ફાળવવામાં આવેલી કરોડો રૂપિયાની ગ્રાન્ટનો હિસાબ માગવામાં આવ્યો છે. વર્ષ 2015 થી આજદિન સુધી સરકાર દ્વારા સંકલ્પ ભૂમિના વિકાસ માટે કરવામાં આવેલી વિવિધ ગ્રાન્ટ અને બજેટ જોગવાઈઓ અંગે સંપૂર્ણ પારદર્શિતા જાળવવાની માંગ સાથે મુખ્યમંત્રી ભૂપેન્દ્રભાઈ પટેલ સમક્ષ તાકીદની રજૂઆત કરવામાં આવી છે. રજૂઆતમાં સ્પષ્ટપણે જણાવ્યું છે કે સંકલ્પ ભૂમિ માત્ર એક સ્મારક નથી, પરંતુ ડૉ. બાબાસાહેબ આંબેડકરના જીવન, તેમના સંઘર્ષો અને ભારતના બંધારણીય મૂલ્યો સાથે જોડાયેલું એક પવિત્ર અને ઐતિહાસિક સ્થળ છે. આ સ્થળના વિકાસ માટે ખર્ચવામાં આવતા કરોડો રૂપિયાના જાહેર નાણાંમાં જનતાનો વિશ્વાસ અને પારદર્શિતા હોવી અત્યંત જરૂરી છે.
ફાળવાયેલા કરોડો રૂપિયાના આંકડા અને વણઉકેલાયેલા પ્રશ્નો
જાહેર થયેલી માહિતી અનુસાર, સંકલ્પ ભૂમિના વિકાસ માટે વર્ષ 2015 માં અંદાજે ₹10 કરોડની માતબર રકમની ફાળવણી કરવામાં આવી હતી. ત્યારબાદ સમયાંતરે ₹11 કરોડ અને ₹11.81 કરોડ તેમજ અન્ય વિવિધ વિકાસકામો માટે ₹16.42 કરોડ જેવી મોટી રકમોની ફાળવણી અંગેની માહિતી પણ પ્રકાશમાં આવી છે. આટલું જ નહીં, તાજેતરમાં ઓગસ્ટ 14, 2026 ના રોજ વધુ ₹36 લાખની વહીવટી મંજૂરી આપવામાં આવી હોવાનું પણ સામે આવ્યું છે.
પરંતુ સૌથી મોટો સવાલ એ છે કે આ તમામ રકમો એક જ મૂળ ફાળવણીના સુધારેલા અંદાજ છે કે પછી અલગ-અલગ તબક્કે આપવામાં આવેલી સ્વતંત્ર ગ્રાન્ટ છે? અત્યાર સુધીમાં આ ફાળવેલી રકમમાંથી વાસ્તવમાં કેટલા રૂપિયા ખર્ચાયા છે અને કયા ચોક્કસ કામો પાછળ ખર્ચવામાં આવ્યા છે, તે અંગે સરકાર કે સ્થાનિક વહીવટી તંત્ર દ્વારા કોઈ સ્પષ્ટતા કરવામાં આવી નથી.
આ પણ વાંચોઃ કહેવાતી ‘સંસ્કારી નગરી’એ જ્યારે ડો.આંબેડકરને ચોધાર આંસુએ રડાવ્યા..
મુખ્યમંત્રી સમક્ષ કરવામાં આવેલી સઘન માંગણીઓ
આ તમામ શંકાઓને દૂર કરવા સામાજિક કાર્યકર કાંતિલાલ પરમારે મુખ્યમંત્રી સમક્ષ માંગ કરી છે કે વર્ષ 2015 થી 2026 સુધી સંકલ્પ ભૂમિ માટે મંજૂર થયેલી, રિલીઝ કરાયેલી અને વાસ્તવમાં ખર્ચાયેલી રકમનું વર્ષવાર સ્ટેટમેન્ટ સત્તાવાર રીતે જાહેર કરવામાં આવે. વર્ષ 2015 ની ₹10 કરોડની ફાળવણી, ₹11.81 કરોડ અને ₹16.42 કરોડની ફાળવણી અંગેના તમામ સરકારી ઠરાવો (GR), વહીવટી મંજૂરીઓ, બજેટ હેડ અને થયેલા ખર્ચની ઝીણવટભરી વિગતો જાહેર થવી જોઈએ. 14 ઓગસ્ટની ₹36 લાખની મંજૂરી કયા બજેટ હેડમાંથી અને કયા હેતુ માટે આપવામાં આવી છે તે પણ સ્પષ્ટ કરવું જરૂરી છે.
આ ઉપરાંત, તેમણે સવાલ ઉઠાવ્યો છે કે આ રકમ અનુસૂચિત જાતિ વિકાસ યોજના (SCSP), સામાન્ય બજેટ, પ્રવાસન બજેટ કે અન્ય કોઈ વિશેષ થીમ ગ્રાન્ટમાંથી ફાળવવામાં આવી છે કે કેમ? આ અંગે તમામ વિકાસકામોના અંદાજો, ટેન્ડરની રકમ, કામ કરનાર કોન્ટ્રાક્ટરો અને તેમને ચૂકવાયેલી રકમની વિગતો લોકો સમક્ષ મૂકવામાં આવે.
ફાઇનાન્સિયલ ઓડિટ અને ભવિષ્યનો માસ્ટર પ્લાન
રજૂઆતમાં ભારપૂર્વક જણાવાયું છે કે માત્ર “કેટલા રૂપિયા ફાળવ્યા?” એ જાહેરાત પૂરતી નથી, પરંતુ “કેટલા રૂપિયા ખરેખર ખર્ચાયા?” અને કામની ગુણવત્તા કેવી રહી તે સૌથી મહત્વનો પ્રશ્ન છે. આ માટે વર્ષ 2015 થી 2026 સુધીના સમગ્ર ખર્ચનું કોઈ સ્વતંત્ર એજન્સી પાસે ફાઇનાન્સિયલ ઓડિટ અને ટેક્નિકલ ઓડિટ કરાવવાની માંગ કરાઈ છે. જો ફાળવેલી રકમમાંથી કોઈ રકમ બાકી રહી ગઈ હોય, લેપ્સ થઈ ગઈ હોય અથવા અન્ય કોઈ યોજનામાં ટ્રાન્સફર કરવામાં આવી હોય, તો તેની પારદર્શક વિગતો પણ જાહેર થવી જોઈએ. સંકલ્પ ભૂમિના ભવિષ્યના વિકાસ માટે એક સમયબદ્ધ માસ્ટર પ્લાન બનાવવાની પણ રજૂઆત કરાઈ છે.
મુખ્યમંત્રીને અપીલ કરવામાં આવી છે કે આ બાબતને ગંભીરતાથી લઈ સંબંધિત વિભાગોને સમયબદ્ધ તપાસનો આદેશ આપે અને જો કોઈ નાણાકીય અનિયમિતતા બહાર આવે તો કડક કાર્યવાહી કરવામાં આવે. આ રજૂઆતની નકલો સામાજિક ન્યાય અને અધિકારીતા વિભાગ, નાણા વિભાગ, વડોદરા મ્યુનિસિપલ કમિશનર અને જિલ્લા કલેક્ટરને પણ મોકલવામાં આવી છે.
આ પણ વાંચોઃ વડોદરા સંકલ્પ ભૂમિને વિશ્વસ્તરીય સ્મારક બનાવો, 23 કરોડના પેકેજની માંગ
