યુપીનો ‘ઉમાશંકર પાંડે’ કેવી રીતે ‘સ્વામી અવિમુક્તેશ્વરાનંદ’ બન્યો?

હિંદુત્વવાદીઓ જેમને હિંદુ હૃદયસમ્રાટ તરીકે ઓળખાવે છે તેવા નરેન્દ્ર મોદી અને યોગી આદિત્યનાથની સરકારના રાજમાં એક હિંદુ, અને એ પણ પોતાને શંકરાચાર્ય ગણાવતા સ્વામીને, પ્રયાગરાજના માઘ મેળામાં ગંગા સ્નાન કરતા રોકવામાં આવ્યા તે મુદ્દો હાલ બરાબરનો ચગેલો છે. વાત છે સ્વામી અવિમુક્તેશ્વરાનંદ અને યોગી સરકાર વચ્ચેના ઘર્ષણની. પણ આપણે જાણવું છે, યુપીના એક ગામડામાંથી આવેલો ઉમાશંકર પાંડે નામનો એક છોકરો કેવી રીતે અવિમુક્તેશ્વરાનંદ સ્વામી બની ગયો.

પ્રયાગરાજના માઘ મેળામાં સ્વામી અવિમુક્તેશ્વરાનંદનો પ્રયાગરાજ મેળા વહીવટ સાથે ઉગ્ર સંઘર્ષ ચાલુ છે. દરમિયાન, સ્વામી અવિમુક્તેશ્વરાનંદ ઉત્તર પ્રદેશના મુખ્યમંત્રી યોગી આદિત્યનાથ સામે પણ અવાજ ઉઠાવ્યો છે. મુખ્યમંત્રી પર હુમલો કરતા તેમણે તેમની સરખામણી મુઘલ સમ્રાટ ઔરંગઝેબ સાથે કરી. અગાઉ, મુખ્યમંત્રી યોગીએ કોઈનું નામ લીધા વિના, ધર્મ વિરુદ્ધ કામ કરનારા કોઈપણને ‘કાલનેમી’ ગણાવ્યા હતા. એવું કહેવાય છે કે યોગીનું આ નિવેદન સ્વામી અવિમુક્તેશ્વરાનંદ માટે હતું.

માઘ સ્નાન સમારોહ અને પછી નોટિસને લઈને સ્વામી અવિમુક્તેશ્વરાનંદ અને મેળા વહીવટ વચ્ચે વિવાદ થયો હતો. એવો આરોપ છે કે પ્રયાગરાજ માઘ મેળા ઓથોરિટીએ પહેલા સ્વામી અવિમુક્તેશ્વરાનંદને પાલખીમાં બેસીને સ્નાન કરવા જતા અટકાવ્યા હતા. ત્યારબાદ, “શંકરાચાર્ય” પદવી પરના તેમના દાવા અંગે સ્પષ્ટતા માંગતી કાનૂની નોટિસ ફટકારવામાં આવી હતી. નોટિસમાં પૂછવામાં આવ્યું હતું કે સુપ્રીમ કોર્ટમાં મામલો પેન્ડિંગ છે ત્યારે તેમના નામ આગળ ‘શંકરાચાર્ય’ શબ્દનો ઉપયોગ કેમ કરવામાં આવી રહ્યો હતો.

આ પણ વાંચો: બંધારણીય હોદ્દા પર ન હોવા છતા કથાકારને ‘ગાર્ડ ઓફ ઓનર’ અપાયું

મેળા ઓથોરિટીએ સ્વામી અવિમુક્તેશ્વરાનંદને જવાબ આપવા માટે 24 કલાકનો સમય આપ્યો હતો. હકીકતમાં, ઓક્ટોબર 2022 માં, સુપ્રીમ કોર્ટે જ્યોતિષ પીઠમાં કોઈપણ નવા “પટ્ટાભિષેક” પર પ્રતિબંધ મૂક્યો હતો. સ્વામી અવિમુક્તેશ્વરાનંદે એ વખતે એક મીડિયા ઈન્ટરવ્યૂમાં યોગી સરકારની આકરી ટીકા કરી હતી. તેમણે કહ્યું હતું કે, “ઇતિહાસમાં અમને સંભળાવવામાં આવ્યું છે કે ઔરંગઝેબ નામનો એક માણસ હતો, જે ખૂબ જ ખરાબ હતો, કારણ કે તેણે મંદિરો અને મૂર્તિઓનો નાશ કર્યો હતો. અમારા મનમાં એવી ધારણા બની ગઈ કે જે કોઈ પણ મંદિરો અને મૂર્તિઓનો નાશ કરે છે તે ઔરંગઝેબ છે અને તે ખરાબ હોય છે.”

તેમણે આગળ કહ્યું હતું કે, “હવે, ધારણા રચાયા પછી, અમે કાશીમાં સેંકડો મંદિરો અને મૂર્તિઓને તોડી પાડીને તેને કાટમાળમાં ફેંકી દેતા જોઈ છે. અમે પૂછ્યું, “આ કોણ કરી રહ્યું છે?” તો ખબર પડી કે તે પીએમ નરેન્દ્ર મોદી અને સીએમ યોગી આદિત્યનાથ કરી રહ્યા હતા. તેથી, અમારા યુવા મનમાં પહેલેથી જ જે ધારણા બની ગઈ હતી તે એ હતી કે મૂર્તિઓ અને મંદિરોનો નાશ કરનાર કોઈપણ ઔરંગઝેબ હોય છે, તો મૂર્તિ અને મંદિરો આ લોકોએ તોડી છે, તો તેઓ ઔરંગઝેબ નહીં તો બીજું શું છે?”

પ્રયાગરાજના માઘ મેળામાં સ્નાન કરવાથી તેમને રોકવામાં આવ્યા સામે વાંધો વ્યક્ત કરતા, સ્વામી અવિમુક્તેશ્વરાનંદે મુઘલોનો પણ ઉલ્લેખ કર્યો. તેમણે કહ્યું કે, જો દરેક હિંદુ અહીં આવીને સ્નાન કરી શકે છે, તો શું તમે પ્રતિબંધ ઉઠાવી લેનારા અને સામાન્ય હિન્દુ જનતાને સંગમમાં સ્નાન કરવાની તક આપનારા શંકરાચાર્યોને ગંગામાં સ્નાન કરતા રોકીને મુઘલ બનશો? અને જો તેઓ મુઘલ બની જાય, તો શું શંકરાચાર્યો અટકી જશે? શંકરાચાર્ય મુઘલો દ્વારા રોકવામાં આવ્યા છતાં પણ રોકાયા ન હતા, તે તમારા રોક્યા રોકાઈ જશે?

આ પણ વાંચો: ‘પહેલા પ્રેમમાં પડે, પછી વહેમમાં પડે અને છેલ્લે ડેમમાં પડે…’

કોણ છે સ્વામી અવિમુક્તેશ્વરાનંદ?

મોદી અને યોગી સામે જેમને પહેલેથી જ વાંધો છે તે સ્વામી અવિમુક્તેશ્વરાનંદ કેવી રીતે શંકરાચાર્ય બન્યા તે પણ જાણીએ. શંકરાચાર્ય સ્વામી સ્વરૂપાનંદ સરસ્વતીનું 11 સપ્ટેમ્બર, 2022 ના રોજ અવસાન થયું. તેઓ દ્વારકામાં શારદા પીઠ અને બદ્રીનાથમાં જ્યોતિષ પીઠના વડા હતા. તેમના મૃત્યુ પછી, સ્વામી અવિમુક્તેશ્વરાનંદને જ્યોતિષ પીઠના વડા તરીકે નિયુક્ત કરવામાં આવ્યા હતા અને સ્વામી સદાનંદને શારદા પીઠના વડા તરીકે નિયુક્ત કરવામાં આવ્યા હતા.

અવિમુક્તેશ્વરાનંદનો જન્મ 15 ઓગસ્ટ, 1969ના રોજ ઉત્તર પ્રદેશના પ્રતાપગઢ જિલ્લાના બ્રાહ્મણપુર ગામમાં થયો હતો. તેમનું નામ ઉમાશંકર પાંડે હતું. ગામની પ્રાથમિક શાળા ભણીને તેમણે આગળનો અભ્યાસ વડોદરાની મહારાજા સયાજી રાવ યુનિવર્સિટીમાં કર્યો હતો. ત્યારબાદ તેઓ સંસ્કૃતનો અભ્યાસ કરવા વારાણસી ગયા અને સંપૂર્ણાનંદ સંસ્કૃત યુનિવર્સિટીમાં અભ્યાસ પૂર્ણ કર્યો. કાશીમાં જ તેઓ સ્વામી સ્વરૂપાનંદ સરસ્વતીને મળ્યા. વર્ષ 2000 માં તેમણે સ્વામી સ્વરૂપાનંદ સરસ્વતી પાસેથી દીક્ષા લીધી અને તેમના શિષ્ય બન્યા. ત્યારબાદ તેમનું નામ ઉમાશંકર પાંડેથી બદલીને સ્વામી અવિમુક્તેશ્વરાનંદ કરવામાં આવ્યું.

બાગેશ્વર ધામના ધીરેન્દ્ર શાસ્ત્રીને પડકાર ફેંક્યો હતો

વર્ષ 2023માં, સ્વામી અવિમુક્તેશ્વરાનંદે ઉત્તરાખંડના જોશીમઠની ડૂબતી જમીન અંગે સુપ્રીમ કોર્ટમાં જાહેર હિતની અરજી દાખલ કરી હતી. તેમણે ચમત્કારના દાવાઓ કરતા કથાકાર ધીરેન્દ્ર શાસ્ત્રીનું નામ લીધા વિના, તેને ચમત્કાર કરવાનો પડકાર ફેંક્યો હતો. તેમણે કહ્યું કે ચમત્કારો કરનારાઓએ જોશીમઠ આવીને જમીનને ધસી જતી અટકાવી બતાવે, તો હું તેમના ચમત્કારને માનીશ. 2023માં તેમણે ધર્મ સેન્સર બોર્ડ બનાવ્યું હતું. આ બોર્ડની રચના શાહરૂખખાનની ફિલ્મ “પઠાણ” ના “બેશરમ રંગ” ગીતમાં દીપિકા પાદુકોણે પહેરેલી ભગવા રંગની બિકીનીના સામે કરાઈ હતી.

આ પણ વાંચો: ‘સ્વામીનારાયણ, બ્રહ્માકુમારી, ઈસ્કોન વગેરે ફ્રોડ સંપ્રદાયો છે!’ : શંકરાચાર્ય

રમખાણોમાં અવિમુક્તેશ્વરાનંદ પર કેસ પણ થયા છે

અવિમુક્તેશ્વરાનંદે 4 જૂન 2022ના રોજ જ્ઞાનવાપી સંકુલમાં પૂજાની જાહેરાત કરી હતી. પોલીસ દ્વારા રોકવામાં આવ્યા બાદ, તેઓ 108 કલાક માટે ભૂખ હડતાળ પર ઉતર્યા હતા. શંકરાચાર્ય સ્વામી સ્વરૂપાનંદ સરસ્વતીની વિનંતી પર તેમણે ઉપવાસ સમાપ્ત કર્યા. ડિસેમ્બર 2022 માં, સ્વામી અવિમુક્તેશ્વરાનંદે 2015 ના એક તીર્થયાત્રા દરમિયાન રમખાણો, આગચંપી, સરકારી સંપત્તિને નુકસાન પહોંચાડવા અને હત્યાના પ્રયાસના કેસમાં આત્મસમર્પણ કર્યું. જોકે, ન્યાયિક કસ્ટડીમાં થોડા કલાકો બાદ તેમને જામીન મળી ગયા. આ પછી, સ્વામી અવિમુક્તેશ્વરાનંદે આ કેસને કેટલાક “અધર્મી લોકો” દ્વારા કરવામાં આવેલ કાવતરું ગણાવ્યું.

અવિમુક્તેશ્વરાનંદ બૌદ્ધ ધર્મના કટ્ટર વિરોધી છે

કથિત શંકરાચાર્ય અવિમુક્તેશ્વરાનંદ બૌદ્ધ ધર્મના કટ્ટર વિરોધી છે. જાન્યુઆરી 2023 માં તેઓ દેહરાદૂન એરપોર્ટના સ્તંભો પર બૌદ્ધ ધર્મના મંત્રો લખેલા જોઈને ગુસ્સે થયા હતા. તેમણે અગાઉ બધા સ્તંભો પર બૌદ્ધ મંત્રો લખેલા હોવાનો વાંધો ઉઠાવ્યો હતો. તેમણે પાછળથી સ્પષ્ટતા કરી હતી કે તેઓ બૌદ્ધ ધર્મના વિરોધી નથી, પરંતુ શું સ્તંભો પર “જય બદ્રી વિશાલ” અથવા “જય કેદાર બાબા” ન લખી શકાય? એકવાર, છિંદવાડાના એક મંદિરમાં સાંઈ બાબાની પ્રતિમા જોઈને અવિમુક્તેશ્વરાનંદ ગુસ્સે થયા હતા. તેમણે તેમના શિષ્યોને પૂછ્યું કે રામ-કૃષ્ણ મંદિરમાં સાંઈ બાબાની શું કામ છે? આવા કટ્ટર હિંદુત્વવાદી અવિમુક્તેશ્વરાનંદની હિંદુત્વવાદી સરકારના રાજમાં જ ભારે હેરાનગતિ થઈ રહી છે.

આ પણ વાંચો: ઢોંગી બાબા ચૈતન્યાનંદ સ્વામીએ 17 છોકરીઓનું શોષણ કર્યું! FIR નોંધાઈ