જામનગર: જામનગર જિલ્લાના સિક્કા (દિગ્વિજય ગ્રામ) ખાતે તારીખ 04 ફેબ્રુઆરી, 2026ના રોજ એક ઐતિહાસિક અને પ્રેરણાદાયી કાર્યક્રમ સંપન્ન થયો હતો. બારમતી પંથના સ્થાપક ધણી અને મૂળનિવાસી સમાજ સુધારક માતંગ સાહેબના જન્મદિન નિમિત્તે સ્વયમ્ સૈનિક દળ (SSD) દ્વારા વિવિધ સામાજિક કાર્યક્રમોનું આયોજન કરવામાં આવ્યું હતું. આ પ્રસંગે ગામના એક મુખ્ય ચોકને ‘ધણી માતંગ સાહેબ ચોક’ તરીકે નામ આપીને તેમના વારસાને અમર બનાવવાનો પ્રયાસ કરવામાં આવ્યો હતો.
ચોકનું નામાભિધાન અને ગૌરવપૂર્ણ સલામી અપાઈ
કાર્યક્રમની શરૂઆતમાં સ્વયમ્ સૈનિક દળના શિસ્તબદ્ધ સૈનિકો દ્વારા મહાનાયક ધણી માતંગ સાહેબની પ્રતિમા અને છબીને ગાર્ડ ઓફ ઓનર આપી સલામી આપવામાં આવી હતી. ત્યારબાદ ગામના નિર્ધારિત ચોકનું નામ વિધિવત રીતે ધણી માતંગ સાહેબના નામે જાહેર કરવામાં આવ્યું હતું. આ નામાભિધાન પાછળનો મુખ્ય હેતુ આવનારી પેઢી આ મહાન વિભૂતિના જીવન અને કાર્યોથી પરિચિત થાય તેવો રહ્યો છે. ઉપસ્થિત જનમેદનીએ ‘ધણી માતંગ સાહેબ અમર રહો’ના નારા સાથે વાતાવરણને ગુંજવી દીધું હતું.
આ પણ વાંચો: ઈંટો ઉપાડતી માતાના પુત્રને કેલિફોર્નિયા યુનિ.એ 75 લાખની સ્કોલરશીપ આપી
માતંગ સાહેબના જીવન પર વક્તાઓએ પ્રવચનો આપ્યાં
આ અવસરે એક વિશાળ સભાનું આયોજન કરવામાં આવ્યું હતું. સભામાં મુખ્ય વક્તાઓએ બારમતી પંથના સ્થાપક અને આધ્યાત્મિક ક્રાંતિના પ્રણેતા ધણી માતંગ સાહેબના જીવન વિશે ઊંડાણપૂર્વક પ્રકાશ પાડ્યો હતો. વક્તાઓએ જણાવ્યું હતું કે, માતંગ સાહેબે સદીઓ પહેલા સમાજમાં વ્યાપેલી અંધશ્રદ્ધા અને કુરિવાજો સામે લડત આપી હતી અને મૂળનિવાસી સમાજને જાગૃત કરવાનું ભગીરથ કાર્ય કર્યું હતું. તેમણે આપેલા ઉપદેશો આજે પણ સામાજિક સમાનતા અને એકતા માટે એટલા જ સુસંગત છે.
કેક કટીંગ કરીને ઉત્સાહભેર ઉજવણી કરવામાં આવી
જન્મજયંતિની ઉજવણીના ભાગરૂપે સમૂહમાં કેક કટીંગ કરવામાં આવ્યું હતું. સ્વયમ્ સૈનિક દળના હોદ્દેદારો અને ગ્રામજનોએ હર્ષોલ્લાસ સાથે મીઠાઈ વહેંચીને એકબીજાને શુભેચ્છાઓ પાઠવી હતી. આ ઉજવણી માત્ર એક ઉત્સવ ન બની રહેતા સામાજિક જાગૃતિનું માધ્યમ બની રહી હતી. કાર્યક્રમમાં ઉપસ્થિત યુવાનોને ધણી માતંગ સાહેબના પદચિહ્નો પર ચાલીને શિક્ષિત અને સંગઠિત બનવા માટે આહવાન કરવામાં આવ્યું હતું.
આ પણ વાંચો: ડૉ.આંબેડકર અને સાવરકર વચ્ચે કેવો સંબંધ હતો?
સ્વયમ્ સૈનિક દળ (SSD) સમગ્ર કાર્યક્રમનું આયોજન કર્યું
આ સમગ્ર આયોજનને સફળ બનાવવામાં સ્વયમ્ સૈનિક દળના કાર્યકરોએ ભારે જહેમત ઉઠાવી હતી. SSD દ્વારા આ તકે પ્રતિજ્ઞા લેવામાં આવી હતી કે સમાજના મહાનાયકોનો સાચો ઇતિહાસ ઘર-ઘર સુધી પહોંચાડવામાં આવશે. સિક્કા ગામના અગ્રણીઓએ આ પહેલને વધાવી લેતા જણાવ્યું હતું કે, ચોકનું નામાભિધાન થવાથી ગામની ઓળખમાં એક નવું ગૌરવવંતું છોગું ઉમેરાયું છે.
આ કાર્યક્રમમાં સિક્કા અને આસપાસના વિસ્તારોમાંથી મોટી સંખ્યામાં અનુયાયીઓ અને સામાજિક કાર્યકરો ઉપસ્થિત રહ્યા હતા. કાર્યક્રમના અંતે સૌએ સમૂહમાં માનવતાવાદી મૂલ્યોના જતન માટે સંકલ્પ લીધો હતો.
આ પણ વાંચો: સિક્કામાં SSD દ્વારા માતા ફાતિમા શેખનો જન્મદિવસ ઉજવાયો
*આદરણીય માતંગ સાહેબનાં જન્મ દિવસ પર હાર્દિક શત્ શત્ નમન અને માતંગ પંથકને ખુબ ખુબ અભિનંદન!