Dalit News: પંજાબના જલંધર જિલ્લામાં ફિલ્લોર તાલુકા હેઠળ આવતા ગોરાયા શહેરમાંથી એક અત્યંત નિંદનીય અને આઘાતજનક ઘટના સામે આવી છે. સોશિયલ મીડિયા પર વાયરલ થયેલા એક વીડિયોએ સમગ્ર દેશમાં ભારે આક્રોશ ફેલાવ્યો છે. આ ઘટનામાં કેટલાક નરાધમોએ પોતાના ક્ષણિક મનોરંજન અને વિકૃત માનસિકતા સંતોષવા માટે એક ૨૩ વર્ષીય દલિત મંદબુદ્ધિ યુવકને પોતાનો શિકાર બનાવ્યો હતો. આ યુવકની માનસિક સ્થિતિ નબળી હોવાનો ફાયદો ઉઠાવી તેની સાથે જે પ્રકારનું અમાનવીય કૃત્ય કરવામાં આવ્યું છે, તેણે સંસ્કારી સમાજ સામે અનેક ગંભીર સવાલો ઉભા કર્યા છે.
દારૂ પીવડાવી કૂતરા સાથે અકુદરતી કામ કરાવ્યું
મળતી માહિતી મુજબ, આરોપીઓએ આ યુવકને પહેલા લાલચ આપી પટાવ્યો હતો. ત્યારબાદ તેને દારૂ પીવડાવી નશો કરાવ્યો હતો, આટલું ઓછું હોય તેમ, તેને ૨૦૦ રૂપિયાની નજીવી રકમ આપી લલચાવવામાં આવ્યો હતો. ત્યારબાદ જે બન્યું તે જાણીને કોઈ પણ પથ્થર હૃદયના માણસની આંખોમાં આંસુ આવી જાય. નરાધમોએ આ મંદબુદ્ધિ યુવક પાસે પરાણે એક કૂતરા સાથે અત્યંત વાંધાજનક અને શરમજનક અકુદરતી કામ કરાવ્યું હતું. આટલી ક્રૂરતા બાદ પણ આરોપીઓ અટક્યા નહોતા, તેઓએ આ સમગ્ર ઘૃણાસ્પદ ઘટનાનો મોબાઈલ કેમેરામાં વીડિયો ઉતાર્યો હતો અને તેને સોશિયલ મીડિયા પર વાયરલ કરી પીડિતની ગરિમાને ઠેસ પહોંચાડી હતી.
આ પણ વાંચો: ગાંધીજી સ્થાપિત મજૂર મહાજન સંઘે મજૂરો પાસેથી કરોડોની ‘ખંડણી’ વસૂલી!
સ્થાનિકો અને સામાજિક કાર્યકરો યુવકની મદદે આવ્યા
જેવો આ વીડિયો ઇન્ટરનેટ પર પ્રસારિત થયો, ગોરાયા વિસ્તારના લોકોમાં ભારે રોષની લાગણી જોવા મળી. આ મામલે સ્થાનિક સમાજસેવકોએ ઘટનાને સખત શબ્દોમાં વખોડી કાઢી હતી. સ્થાનિકોએ જણાવ્યું હતું કે, કોઈ અસહાય અને મંદબુદ્ધિ યુવક સાથે આવું કૃત્ય કરવું એ જાનવર જેવી માનસિકતા છે. તેમણે માંગ કરી છે કે આ કૃત્યમાં સંડોવાયેલા તમામ આરોપીઓ સામે એટ્રોસિટી એક્ટ સહિતની કડક કલમો હેઠળ ગુનો દાખલ થવો જોઈએ જેથી ભવિષ્યમાં કોઈ આવી નીચ હરકત ન કરી શકે.
કૂતરાનો માલિક અને સ્થાનિક નેતા આરોપી
સૂત્રો દ્વારા પ્રાપ્ત થતી વિગતો અનુસાર, આ કેસમાં બે મુખ્ય શખ્સોના નામ સામે આવી રહ્યા છે. ચર્ચા મુજબ, તેમાંથી એક વ્યક્તિ તે કૂતરાનો માલિક છે જેનો ઉપયોગ આ કૃત્યમાં કરવામાં આવ્યો હતો, જ્યારે બીજો શખ્સ ગોરાયા વિસ્તારનો કોઈ નવો બનેલો રાજકીય નેતા હોવાનું કહેવાય છે. જોકે, પોલીસ દ્વારા તપાસ પૂરી ન થાય ત્યાં સુધી સત્તાવાર રીતે કોઈ નામ જાહેર કરવામાં આવ્યા નથી, પરંતુ લોકોમાં આ બાબતે ગણગણાટ વધી રહ્યો છે.
આ પણ વાંચો: આખા ગામના બ્રાહ્મણો પર એટ્રોસિટીની ફરિયાદ’ થઈ તે હકીકત છે?
પોલીસે શું કહ્યું?
ઘટનાની ગંભીરતાને પારખીને પોલીસ વહીવટીતંત્ર તુરંત એક્શનમાં આવ્યું છે. ડીએસપી ભરત મસીહે આ અંગે સ્પષ્ટતા કરતા કહ્યું છે કે, સોશિયલ મીડિયા પર વાયરલ થયેલો આ વીડિયો તેમના ધ્યાન પર આવ્યો છે અને આ પ્રકારની વિકૃત ઘટના જરા પણ ચલાવી લેવામાં આવશે નહીં. તેમણે ખાતરી આપી છે કે કાયદો પોતાનું કામ કરશે અને દોષિતોને જેલના સળિયા પાછળ ધકેલવામાં આવશે.
એક આરોપી ઝડપાયો, એક હજુ ફરાર
વધુમાં, ગોરાયા પોલીસ સ્ટેશનના ઇન્ચાર્જ સિકંદર વિર્કે માહિતી આપી છે કે, પોલીસે પ્રાથમિક તપાસ પૂર્ણ કર્યા બાદ આ મામલે વિધિવત ગુનો નોંધી લીધો છે. પોલીસે તાત્કાલિક પગલાં ભરીને આ કેસમાં સંડોવાયેલા એક મુખ્ય આરોપીની ધરપકડ પણ કરી લીધી છે. અન્ય આરોપીઓની શોધખોળ માટે પોલીસની અલગ-અલગ ટીમો કાર્યરત છે. પોલીસ તપાસ કરી રહી છે કે આ વીડિયો શૂટ કરનાર અને વાયરલ કરનાર લોકો કોણ હતા. પીડિત યુવક દલિત જ્ઞાતિનો હોવાથી અને મંદબુદ્ધિ હોવાથી આ કેસમાં વધુ કડક કાયદાકીય જોગવાઈઓ લાગુ કરવામાં આવી છે.
આ પણ વાંચો: વાસણાના દલિત યુવકની આત્મહત્યાના 80 દિવસ પછી પણ આરોપીઓ ફરાર
