ઉત્તર પ્રદેશના બુલંદશહર જિલ્લાના ગનોરા શેખ ગામમાં એક ચોંકાવનારી ઘટના બની છે, જ્યાં પરસ્પર સન્માનની ભાવના દાખવવા છતાં એક દલિત પરિવાર પર હિંસક હુમલો કરવામાં આવ્યો હતો. આ ઘટના ડીજે વગાડવા જેવી સામાન્ય બાબતે શરૂ થઈ હતી, પરંતુ તે જલ્દીથી જાતિગત ભેદભાવ અને હિંસામાં પરિવર્તિત થઈ ગઈ હતી. હાલમાં પોલીસે આ મામલે ગામના સરપંચ સહિત 12 લોકોની ધરપકડ કરીને જેલમાં મોકલી આપ્યા છે.
મામલો શું હતો?
ગનોરા શેખ ગામમાં રહેતા આકાશ કુમારના ઘરે તાજેતરમાં એક બાળકની કિલકારી ગુંજી હતી. આ ખુશીના પ્રસંગે પરિવાર દ્વારા ‘નામકરણ સંસ્કાર’ (છઠ્ઠી) નો કાર્યક્રમ રાખવામાં આવ્યો હતો. આ પ્રસંગે સગાસંબંધીઓ અને ગ્રામજનોને આમંત્રણ આપવામાં આવ્યું હતું. ઉત્સાહ વધારવા માટે પરિવારે ગામમાં એક ડીજે (DJ) પણ મંગાવ્યું હતું. દિવસ દરમિયાન વાતાવરણ ખૂબ જ આનંદમય હતું અને મહેમાનો સંગીતના તાલે ઝૂમી રહ્યા હતા.
આ પણ વાંચો: ‘મંગળવારે જો મટનની દુકાન ખોલી તો તારી દુકાન સળગાવી દઈશ…’
નમાઝ દરમિયાન ડીજે બંધ કર્યું હોવા છતાં હુમલો
આકાશ કુમારના જણાવ્યા અનુસાર, સાંજના સમયે જ્યારે ગામની નજીકની મસ્જિદમાં નમાજ પઢવાનો સમય થયો, ત્યારે દલિત પરિવારે સામાજિક સૌહાર્દ અને ધાર્મિક સન્માન જાળવવા માટે સ્વેચ્છાએ ડીજે બંધ કરી દીધું હતું. પરિવારે નમાજ પૂર્ણ થાય ત્યાં સુધી શાંતિ જાળવી રાખી હતી. જોકે, જેવી નમાજ પૂર્ણ થઈ અને પરિવારે ફરીથી ખુશીમાં ગીતો વગાડવાનું શરૂ કર્યું, કે તરત જ પડોશમાં રહેતા એક મુસ્લિમ સમાજના 15 થી 20 લોકોનું ટોળું લાકડીઓ, ડંડા અને ધારદાર હથિયારો સાથે આકાશના ઘરે ધસી આવ્યું હતું.
મહિલાઓ અને મહેમાનો પર પણ હુમલો કરાયો
ટોળાએ ત્યાં પહોંચતાની સાથે જ અપશબ્દો બોલવાનું શરૂ કર્યું હતું. આકાશનો આરોપ છે કે હુમલાખોરોએ જાતિસૂચક ગાળો આપી હતી અને કહ્યું હતું કે “તમારી હિંમત કેવી રીતે થઈ કે અહીં ડીજે વગાડો છો?” જ્યારે પરિવારે સમજાવવાનો પ્રયત્ન કર્યો, ત્યારે ટોળાએ હુમલો કરી દીધો હતો. હુમલાખોરોએ ઘરમાં હાજર વૃદ્ધો અને યુવાનોને તો માર્યા જ, પરંતુ ત્યાં આવેલી મહિલાઓ સાથે પણ અત્યંત ખરાબ વર્તન અને છેડતી કરી હતી. તોફાની તત્વોએ ઘરમાં રાખેલા ઘરવખરીના સામાનની તોડફોડ કરી હતી અને ડીજેની સિસ્ટમ પણ તોડી નાખી હતી. આ હુમલાને કારણે કાર્યક્રમમાં અફરાતફરી મચી ગઈ હતી અને મહેમાનો જીવ બચાવવા આમ-તેમ ભાગવા લાગ્યા હતા.
આ પણ વાંચો: “આ લોકો મોદીને ગાળો આપે છે” કહી ભાજપ સાંસદે મુસ્લિમોના ધાબળા પરત લઈ લીધાં
પોલીસે સરપંચ સહિતના આરોપીઓ સામે ગુનો નોંધ્યો
ઘટનાની ગંભીરતાને જોતા સ્થાનિક પોલીસ સ્ટેશનના એસએચઓ (SHO) નીરજ મલિક તુરંત પોલીસ કાફલા સાથે ઘટનાસ્થળે પહોંચ્યા હતા. પોલીસે પીડિત પરિવારને સુરક્ષા પૂરી પાડી હતી અને તપાસ હાથ ધરી હતી. પોલીસે ગામના પ્રધાન (સરપંચ) મોઈન ખાન, મતલૂબ અલી, મોહમ્મદ આદિલ, અકરમ ખાન અને અન્ય લોકો વિરુદ્ધ ગંભીર કલમો હેઠળ ગુનો નોંધ્યો છે.
આરોપીઓ વિરુદ્ધ ભારતીય દંડ સંહિતાની દંગા કરવા (Rioting), ઈજા પહોંચાડવી અને સૌથી મહત્વની એવી SC-ST (પિડિતો વિરુદ્ધ અત્યાચાર નિવારણ) એક્ટ હેઠળ એફઆઈઆર (FIR) દાખલ કરવામાં આવી છે. અત્યાર સુધીમાં 12 મુખ્ય આરોપીઓની ધરપકડ કરવામાં આવી છે. પોલીસનું કહેવું છે કે હજુ પણ કેટલાક આરોપીઓ ફરાર છે, જેમને પકડવા માટે પોલીસની અલગ-અલગ ટીમો દરોડા પાડી રહી છે.
ગનોરા શેખ ગામમાં હાલમાં ભારેલા અગ્નિ જેવી સ્થિતિ છે, જોકે પોલીસ બંદોબસ્તને કારણે શાંતિ જળવાયેલી છે. ઉચ્ચ પોલીસ અધિકારીઓએ ગામની મુલાકાત લીધી છે અને લોકોને કાયદો હાથમાં ન લેવા અપીલ કરી છે. આ ઘટનાએ ફરી એકવાર ગ્રામીણ વિસ્તારોમાં પ્રવર્તતા જાતિગત ભેદભાવ અને ધાર્મિક અસહિષ્ણુતાના મુદ્દાને ચર્ચામાં લાવી દીધો છે.
આ પણ વાંચો: કેરળમાં નોકરીના માત્ર 4 મહિનામાં દલિત પૂજારીએ રાજીનામું આપ્યું
