ambedkar jayanti 2026: સમગ્ર દેશમાં આજે ભારતરત્ન અને બંધારણના ઘડવૈયા ડો. બાબાસાહેબ આંબેડકરની 135મી જન્મજયંતીની હર્ષોલ્લાસ સાથે ઉજવણી કરવામાં આવી રહી છે. આ અવસરે વનથળ ગામ મુકામે દલિત સમાજ અને ગ્રામજનો દ્વારા એક પ્રેરણાદાયી અને ભવ્ય કાર્યક્રમનું આયોજન કરવામાં આવ્યું હતું. વનથળના રહીશોએ આ વર્ષની ઉજવણીને માત્ર ઉત્સવ પૂરતી સીમિત ન રાખતા, તેને શિક્ષણ અને સામાજિક ઉત્થાન સાથે જોડીને એક નવી મિસાલ કાયમ કરી છે. 14 એપ્રિલ 2026, મંગળવારના રોજ ગામમાં ભવ્ય શોભાયાત્રા કાઢવાની સાથે ‘માતા સાવિત્રીબાઈ ફૂલે પુસ્તકાલય’નું ઉદઘાટન કરીને શૈક્ષણિક ક્રાંતિનો શંખનાદ કરવામાં આવ્યો છે.
શિક્ષણના વ્યાપ માટે પુસ્તકાલયનો પ્રારંભ
બાબાસાહેબ આંબેડકર હંમેશા કહેતા કે “શિક્ષણ એ સિંહણનું દૂધ છે”, આ સૂત્રને સાર્થક કરવાના હેતુથી વનથળ ગામમાં લાઈબ્રેરીનું નિર્માણ કરવામાં આવ્યું છે. આ પુસ્તકાલયનું નામ ભારતના પ્રથમ મહિલા શિક્ષિકા અને સ્ત્રી શિક્ષણના પ્રણેતા માતા સાવિત્રીબાઈ ફૂલેના નામ પરથી રાખવામાં આવ્યું છે. કાર્યક્રમની શરૂઆત સવારે 9:00 વાગ્યે મહાપુરુષોના સ્મરણ સાથે થઈ હતી.
આ પણ વાંચો: સયાજીરાવ ગાયકવાડ: જેમના શાસનમાં ‘પ્રજા ધર્મ’ એ જ ‘રાજ ધર્મ’ હતો
સૌ પ્રથમ ડો. બાબાસાહેબ આંબેડકર, મહાત્મા જ્યોતિબા ફૂલે અને માતા સાવિત્રીબાઈ ફૂલેના ફોટાને વિધિવત રીતે ફૂલહાર અને અર્ચન કરવામાં આવ્યું હતું. ત્યારબાદ, ગામના સરપંચશ્રીના હસ્તે રિબન કાપીને પુસ્તકાલયનું ઉદઘાટન કરવામાં આવ્યું હતું. આ પ્રસંગે ગ્રામજનોએ સંકલ્પ કર્યો હતો કે ગામનો પ્રત્યેક યુવાન અને બાળક આ લાઈબ્રેરીનો ઉપયોગ કરી ઉચ્ચ શિક્ષણ પ્રાપ્ત કરશે.
ડીજેના તાલે ભવ્ય શોભાયાત્રા નીકળી
પુસ્તકાલયના ઉદઘાટન બાદ વનથળ બસ સ્ટેન્ડથી ભવ્ય શોભાયાત્રાની શરૂઆત કરવામાં આવી હતી. આ શોભાયાત્રામાં ડીજેના નાદ અને બાબા સાહેબના જયઘોષ સાથે મોટી સંખ્યામાં યુવાનો અને મહિલાઓ જોડાયા હતા. રેલી વનથળ બસ સ્ટેન્ડથી શરૂ થઈ ગામની મુખ્ય શેરીઓ અને ચોકમાં ફરી હતી. આખું ગામ વાદળી રંગે રંગાયું હતું. ગ્રામજનોએ ઠેર-ઠેર રેલીનું સ્વાગત કર્યું હતું અને મહાનાયકના વિચારોને જન-જન સુધી પહોંચાડવાનો પ્રયાસ કર્યો હતો. આ રેલી ગામના વિવિધ વિસ્તારોમાં ભ્રમણ કરીને પરત વનથળ બસ સ્ટેન્ડ ખાતે પહોંચી હતી, જ્યાં તેનું ગરિમાપૂર્ણ સમાપન કરવામાં આવ્યું હતું.
નવી ક્રાંતિનો ઉદય
વનથળમાં આયોજિત આ કાર્યક્રમ માત્ર પ્રતીકાત્મક નહોતો, પરંતુ સામાજિક પરિવર્તનનો એક ભાગ હતો. લાઈબ્રેરીના માધ્યમથી ગામમાં વાંચન સંસ્કૃતિ વિકસે અને વિદ્યાર્થીઓને સ્પર્ધાત્મક પરીક્ષાઓની તૈયારી માટે સાહિત્ય ઉપલબ્ધ થાય તેવી વ્યવસ્થા કરવામાં આવી છે. આયોજકોએ જણાવ્યું હતું કે, બાબા સાહેબના સપનાનું ભારત બનાવવા માટે શિક્ષણ અનિવાર્ય છે અને આ પુસ્તકાલય તે દિશામાં પ્રથમ ડગલું છે. ગામના તમામ વર્ગોએ સાથે મળીને આ નવી ક્રાંતિને વધાવી લીધી હતી અને કાર્યક્રમને સફળ બનાવવામાં સહયોગ આપ્યો હતો.
આ પણ વાંચો: Mahad Satyagraha: સવાલ પાણીનો નહીં માનવાધિકાર સ્થાપનાનો હતો
