દલિત સગીરાને દુકાનદારે ઝાડ સાથે બાંધી ઢોર માર માર્યો

દલિતો જાણે માણસ જ ન હોય તેમ જાતિવાદી તત્વો તેમની સાથે પશુઓ કરતા પણ બદ્દતર વ્યવહાર કરતા ખચકાતા નથી. જાતિવાદનો ગઢ ગણાતા યુપીમાંથી આવી જ એક હૃદયદ્રાવક ઘટના સામે આવી છે. અહીંના દેવરિયા જિલ્લાના તરકુલવા પોલીસ સ્ટેશન વિસ્તાર હેઠળના મિશ્રૌલી ચોરીના આરોપમાં એક દલિત સગીરાને તાલિબાની સજા આપવામાં આવી હતી. આ સમગ્ર ઘટનાનો વીડિયો સોશિયલ મીડિયા પર વાયરલ થયા બાદ પોલીસ વિભાગમાં દોડધામ મચી ગઈ હતી. પોલીસે ત્વરિત કાર્યવાહી હાથ ધરી મુખ્ય આરોપીની ધરપકડ કરી લીધી છે અને કાયદેસરની કાર્યવાહી શરૂ કરી છે.

ઘટના શું હતી?

પ્રાપ્ત વિગતો અનુસાર, મિશ્રૌલીના રહેવાસી હરિકેશ ગુપ્તાની ગામમાં જ કરિયાણાની દુકાન આવેલી છે. હરિકેશ ગુપ્તાએ ગામની જ એક દલિત સગીરા પર પોતાની દુકાનમાંથી ચોરી કરવાનો આરોપ લગાવ્યો હતો. ચોરીની શંકાના આધારે આરોપીએ કાયદો પોતાના હાથમાં લીધો અને સગીરાને પકડી પાડી હતી.

પરિવારજનો અને ગ્રામજનો દ્વારા મળતી માહિતી મુજબ, આરોપી હરિકેશ ગુપ્તાએ ક્રૂરતાની તમામ હદો પાર કરી દીધી હતી. તેણે પહેલા સગીરાના વાળ પકડીને તેને આખા ગામમાં ફેરવી હતી જેથી તેનું જાહેરમાં અપમાન થઈ શકે. ત્યારબાદ આરોપી સગીરાને ખેંચીને પોતાના ઘરની બહાર લઈ ગયો હતો, જ્યાં આવેલા લીમડાના ઝાડ સાથે તેને દોરડા વડે બાંધી દીધી હતી. ઝાડ સાથે બાંધ્યા બાદ આરોપીએ સગીરાને લાકડીઓ અને ઢોર માર માર્યો હતો.

પોલીસે આરોપીને ઝડપી પાડ્યો

જ્યારે આ અમાનવીય કૃત્ય આચરવામાં આવી રહ્યું હતું, ત્યારે ત્યાં હાજર કોઈ સ્થાનિક વ્યક્તિએ પોતાના મોબાઈલ ફોનમાં આ સમગ્ર ઘટનાનો વીડિયો રેકોર્ડ કરી લીધો હતો. આ દરમિયાન કોઈ જાગૃત નાગરિકે તાત્કાલિક ડાયલ-112 પર ફોન કરીને પોલીસને આ અંગેની જાણ કરી હતી. માહિતી મળતાની સાથે જ પોલીસ કાફલો ઘટનાસ્થળે દોડી ગયો હતો અને ઝાડ સાથે બંધાયેલી પીડિત સગીરાને મુક્ત કરાવી તેને સુરક્ષિત કસ્ટડીમાં લીધી હતી. આ ઘટનાનો વીડિયો સોશિયલ મીડિયા પ્લેટફોર્મ પર વાયરલ થતાં જ વહીવટી તંત્ર એક્શનમાં આવ્યું હતું. પોલીસના ઉચ્ચ અધિકારીઓએ આ મામલાને ગંભીરતાથી લીધો અને તાત્કાલિક તપાસના આદેશ આપ્યા હતા.

આ પણ વાંચોઃ દલિત સગીરાને ટોળાએ ‘જાદુગરણી’ કહી ઝાડ સાથે બાંધીને મારી

देवरिया में दलित किशोरी के साथ बर्बरता।⚠️

उत्तर प्रदेश के देवरिया जिले के तरकुलवा क्षेत्र से एक दिल दहला देने वाली घटना सामने आई है। यहाँ के मिश्रौली गांव में एक किराना दुकानदार, हरिकेश गुप्ता ने चोरी के मामूली शक में एक दलित किशोरी के साथ अमानवीय व्यवहार किया। आरोपी ने न केवल… pic.twitter.com/oJ8mX47SlC

— प्रीतम कुमार बौद्ध (@Pritamkrbauddh) June 1, 2026

સત્તાવાર નિવેદન અને કાનૂની સ્થિતિ

આ મામલે માહિતી આપતા નગર ક્ષેત્રાધિકારી (CO) સંજય કુમાર રેડ્ડીએ જણાવ્યું કે, સોશિયલ મીડિયા પર વાયરલ થયેલા વીડિયોની તાત્કાલિક નોંધ લેવામાં આવી છે. પીડિતાના પરિવારની ફરિયાદ અને વીડિયોના આધારે આરોપી હરિકેશ ગુપ્તા વિરુદ્ધ સંબંધિત ગંભીર ધારાઓ હેઠળ ગુનો નોંધવામાં આવ્યો છે. પોલીસે ત્વરિત કાર્યવાહી કરીને મુખ્ય આરોપી હરિકેશ ગુપ્તાની ધરપકડ કરી લીધી છે અને હાલ તેની કડક પૂછપરછ કરવામાં આવી રહી છે.

પોલીસ પ્રશાસને સ્પષ્ટ શબ્દોમાં ચેતવણી આપી છે કે કોઈપણ નાગરિકને કાયદો પોતાના હાથમાં લેવાનો અધિકાર નથી. જો કોઈ વ્યક્તિ ગુનાહિત પ્રવૃત્તિમાં સંડોવાયેલી હોવાની શંકા હોય, તો તેની જાણ તાત્કાલિક નજીકના પોલીસ સ્ટેશનમાં કરવી જોઈએ. હાલમાં પોલીસ દ્વારા પીડિત સગીરા અને તેના પરિવારજનોના નિવેદનો નોંધવાની પ્રક્રિયા ચાલી રહી છે. તપાસમાં જે પણ નવા તથ્યો સામે આવશે તેના આધારે આગળની કડક કાનૂની કાર્યવાહી કરવામાં આવશે. ઘટનાને પગલે ગામમાં પ્રવર્તતા તણાવપૂર્ણ માહોલને જોતા શાંતિ અને વ્યવસ્થા જાળવવા માટે પોલીસની વિશેષ ટીમ સતત પેટ્રોલિંગ કરી રહી છે.

આ પણ વાંચોઃ કડીની દલિત સગીરાને પીંખી નાખનાર 6 નરાધમોને આજીવન કેદની સજા