આંધ્રપ્રદેશના વિજયનગરમ જિલ્લામાંથી માણસાઈ પરથી વિશ્વાસ ઉઠી જાય તેવી એક ઘટના સામે આવી છે. ગામ સુધી પાકો રસ્તો ન હોવા અને ભારે વરસાદને કારણે એમ્બ્યુલન્સ સહિતનાં વાહનો પહોંચી ન શકતાં એક માતાએ પોતાની 12 વર્ષની બીમાર દીકરીને ખભા પર ઉઠાવીને આશરે 7 KM સુધી પગપાળા મુસાફરી કરી હતી. ત્યારબાદ રસ્તા પર પહોંચીને ઓટો દ્વારા દીકરીને હોસ્પિટલ લઈ જવામાં આવી હતી.
આ ઘટના શ્રૃંગવરપુકોટા મંડળની દારાપર્થી પંચાયત હેઠળ આવેલા આદિવાસી ગામ પલ્લાપુ દુગ્ગડાની છે. અહીં રહેતાં જન્ની સુકરમ્મા અને કન્નૈયાની 12 વર્ષની દીકરી સંપૂર્ણ બીમાર પડી હતી. તેની તબિયતને કારણે તાત્કાલિક સારવારની જરૂર હતી. પરિવાર માટે સૌથી મોટો પડકાર દીકરીને હોસ્પિટલ સુધી પહોંચાડવાનો હતો, કારણ કે ભારે વરસાદને પગલે ગામ તરફ જતો માર્ગ વાહનો માટે અવરોધરૂપ બન્યો હતો.
7 KM સુધી દીકરીને ખભે ઉઠાવી
ગામ સુધી એમ્બ્યુલન્સ કે અન્ય વાહન પહોંચી શકે તેવી સ્થિતિ ન હોવાથી માતા જન્ની સુકરમ્માએ જાતે જ દીકરીને ખભા પર ઉઠાવીને નીકળવાનો નિર્ણય કર્યો. તે આશરે 7 KM સુધી પહાડી વિસ્તાર અને મુશ્કેલ રસ્તા પર પગપાળા ચાલીને પહાડીની તળેટી સુધી પહોંચ્યાં હતાં.
આ પણ વાંચો: સગી બહેનની હત્યા કરીને પણ જાતિનો ઘમંડ કેમ જાળવવો છે?
ત્યાંથી તે ઓટો દ્વારા દીકરીને દક્ષિણ કોટાના એક ખાનગી હોસ્પિટલમાં પહોંચાડી હતી. હોસ્પિટલમાં દીકરીની સારવાર કરાવ્યા બાદ માતા તેને ફરી એ જ રીતે ખભા પર ઉઠાવીને ઘરે પરત લાવ્યાં હતાં.
માતા દ્વારા દીકરીને સારવાર અપાવવા માટે કરવામાં આવેલી આ મહેનતની વાત સામે આવતાં સ્થાનિક લોકો ભાવુક થયા છે. જોકે આ ઘટના માત્ર એક માતાની હિંમતની વાત નથી, પરંતુ ગામમાં રસ્તા અને આરોગ્યસેવાની ઉપલબ્ધતા સામે ઊભા થયેલા ગંભીર પ્રશ્નો તરફ પણ ધ્યાન દોરે છે.
આ પણ વાંચો: અરવલ્લીના ભેંસાવાડામાં 6 પટેલોએ દલિત યુવક પર હુમલો કર્યો
8 વર્ષ પહેલાં મંજૂર થયા હતા રૂ. 4.90 કરોડ
મળતી માહિતી મુજબ, પલ્લાપુ દુગ્ગડા ગામ સુધી રસ્તો બનાવવા માટે આશરે 8 વર્ષ પહેલાં પ્રધાનમંત્રી ગ્રામ સડક યોજના હેઠળ 6.5 KM લાંબા માર્ગના નિર્માણ માટે રૂ. 4.90 કરોડ મંજૂર કરવામાં આવ્યા હતા. રસ્તાનું કામ શરૂ પણ કરવામાં આવ્યું હતું, પરંતુ વન વિભાગ દ્વારા આપવામાં આવેલી સમયમર્યાદા પૂર્ણ થતાં બાંધકામનું કામ અધવચ્ચે અટકી ગયું હતું. ત્યારથી ગામના લોકો રસ્તાની રાહ જોઈ રહ્યા છે. રસ્તાનું કામ અધૂરું રહેતાં વરસાદની ઋતુમાં સ્થિતિ વધુ મુશ્કેલ બની જાય છે. ભારે વરસાદને કારણે વાહનો ગામ સુધી પહોંચી શકતાં નથી અને સામાન્ય અવરજવર પણ મુશ્કેલ બને છે.
ખર્ચ વધ્યો, મંજૂરીની રાહમાં રસ્તાનું કામ
રસ્તાનું બાંધકામ અટકી ગયા બાદ સમય જતાં નિર્માણ ખર્ચમાં વધારો થયો હતો. અહેવાલ મુજબ, રસ્તાના કામ માટે અંદાજિત ખર્ચમાં રૂ. 65 લાખનો વધારો થયો છે. અધિકારીઓ દ્વારા નવા ખર્ચના અંદાજ સાથે દરખાસ્ત મોકલવામાં આવી હોવા છતાં હજુ સુધી જરૂરી મંજૂરી મળી નથી. આના કારણે રસ્તાનું બાકી કામ શરૂ થઈ શક્યું નથી. પરિણામે ગામના લોકોને રોજિંદા જીવનમાં અવરજવર માટે મુશ્કેલીઓનો સામનો કરવો પડે છે.
આ પણ વાંચો: દલિત યુવકની PHD સ્કોલરશીપ સરકારે અટકાવતા વિવાદ
ઈમરજન્સીમાં હોસ્પિટલ પહોંચવું મુશ્કેલ
સ્થાનિક ગ્રામજનોનું કહેવું છે કે રસ્તાના અભાવે સૌથી વધુ મુશ્કેલી બીમાર વ્યક્તિઓ, વૃદ્ધો અને બાળકોને પડે છે. સામાન્ય દિવસોમાં પણ વાહનવ્યવહારની સમસ્યા રહે છે, જ્યારે વરસાદ પડે ત્યારે ગામ સુધી વાહનો પહોંચવા મુશ્કેલ બની જાય છે. ખાસ કરીને કોઈ વ્યક્તિની તબિયત અચાનક બગડે અથવા તાત્કાલિક સારવારની જરૂર પડે ત્યારે પરિવારજનો માટે દર્દીને હોસ્પિટલ પહોંચાડવો મોટો પડકાર બની જાય છે.
ગ્રામજનોની માંગ છે કે સંબંધિત અધિકારીઓ અને તંત્ર અટકેલું રસ્તાનું બાંધકામ વહેલી તકે પૂર્ણ કરાવે, જેથી ગામને વાહનવ્યવહારની સુવિધા મળી શકે અને ભવિષ્યમાં કોઈ બીમાર વ્યક્તિને સારવાર માટે આટલી મુશ્કેલ મુસાફરી ન કરવી પડે.
આ પણ વાંચો: ડો. હર્ષ આપઘાત-એટ્રોસિટી કેસમાં 2 મહિલા ડોક્ટરની ધરપકડ
