દિલ્હીના જંતર-મંતર પર આયોજિત મહાઆંદોલનમાં ભાગ લેવા મુંબઈથી દિલ્હી પહોંચેલા કોકરોચ જનતા પાર્ટી (CJP) ના સ્થાપક અભિજીત દિપકે, સહ-સંયોજક આશુતોષ રંકા અને સૌરવ દાસની દિલ્હી એરપોર્ટ પર વિમાનની અંદરથી જ પોલીસે અટકાયત કરી લીધી છે. વિમાન રનવે પર લેન્ડ થયું કે તુરંત જ દિલ્હી પોલીસના જવાનોએ પ્લેનની અંદર પ્રવેશ કરીને ત્રણેય નેતાઓને ઘેરી લીધા હતા.
આ ઘટનાક્રમ દરમિયાન અભિજીત દિપકેએ સોશિયલ મીડિયા પર ફેસબુક લાઈવ કરીને દેશવાસીઓને વાસ્તવિક સ્થિતિથી વાકેફ કર્યા હતા. સોશિયલ મીડિયા પર વાયરલ થઈ રહેલા વીડિયોમાં અભિજીત દિપકે અત્યંત આક્રમક અંદાજમાં પોલીસ અધિકારીઓને કહેતા સંભળાય છે:
“તમે જોઈ શકો છો કે આ દેશ કઈ દિશામાં જઈ રહ્યો છે. અમને ફ્લાઇટની અંદરથી જ અટકાયતમાં લેવામાં આવી રહ્યા છે; દેશમાં ઇન્દિરા ગાંધીની ઇમરજન્સી વખતે પણ ક્યારેય આવું બન્યું ન હતું. આ સીધી સરમુખત્યારશાહી છે, પરંતુ અમે તમારી જેલ કે ધરપકડથી જરાય ડરતા નથી અને તેના માટે સંપૂર્ણ તૈયાર છીએ.”
फ्लाइट से पैसेंजर उतरे भी नहीं थे कि दिल्ली पुलिस अभिजीत दीपके को डिटेन करने अंदर पहुंच गई। एयरपोर्ट की सुरक्षा का जिम्मा जिस CISF पर होता है, वो दूर तक नहीं दिख रही। https://t.co/d0FoWoeg0l
— Sachin Gupta (@Sachingupta) October 10, 2026
મહિલા પોલીસની કાર્યવાહી અને વિરોધ
અટકાયતની પ્રક્રિયા દરમિયાન ત્યારે નવો વિવાદ ઊભો થયો જ્યારે મહિલા પોલીસ અધિકારીઓ અભિજીત, સૌરવ અને આશુતોષને કસ્ટડીમાં લેવા આગળ આવી. આ અંગે CJP નેતાઓએ કાયદાકીય મર્યાદાઓનો હવાલો આપીને વિરોધ નોંધાવ્યો હતો અને માંગ કરી હતી કે તેમની સામે પુરુષ પોલીસ અધિકારીઓને જ મોકલવામાં આવે. એરપોર્ટ પર બનેલી આ ઘટનાને પગલે મુસાફરોમાં પણ ભારે અફરાતફરી સર્જાઈ હતી.
ધ્રુવ રાઠી અને રત્ના સિંહની અગાઉથી અટકાયત
આ ઘટના પહેલા જ જાણીતા ડિજિટલ ક્રિએટર અને પત્રકાર ધ્રુવ રાઠી તેમજ CJP ના કાનૂની બાબતોના વડા રત્ના સિંહની પણ દિલ્હી પ્રશાસન દ્વારા અટકાયત કરી લેવામાં આવી હોવાના અહેવાલો સામે આવ્યા છે. ચૂંટણી આયોગ અને સરકાર સામે અવાજ ઉઠાવતા પ્રભાવશાળી ચેહરાઓને દિલ્હી પહોંચતા પહેલા જ એક પછી એક નજરકેદ કે કસ્ટડીમાં લેવાના પોલીસના આ સઘન ઓપરેશનથી વિરોધનો સૂર વધુ ઉગ્ર બન્યો છે.
CJP નો સત્તાવાર દાવો અને બિનશરતી મુક્તિની માગ
કોકરોચ જનતા પાર્ટીએ આ મામલે એક સત્તાવાર અને આક્રમક અખબારી યાદી જારી કરીને દિલ્હી પોલીસની આ કાર્યવાહીને લોકશાહી મૂલ્યોનું ચીરહરણ ગણાવ્યું છે. CJP એ સ્પષ્ટ શબ્દોમાં કહ્યું છે કે:
“નાગરિકોની હિલચાલ અને વિરોધ નોંધાવવાની સ્વતંત્રતા (Freedom of Movement and Speech) પર આ સીધો હુમલો છે. સરકાર અને પોલીસ તંત્ર દ્વારા કરવામાં આવેલી આ અટકાયત ગેરકાયદેસર છે. અમે ત્રણેય નેતાઓ તેમજ ધ્રુવ રાઠીની તાત્કાલિક અને બિનશરતી મુક્તિની ઉગ્ર માગ કરીએ છીએ.”
દેશભરમાં આ એરપોર્ટ ડિટેન્શનના વીડિયો વાયરલ થતાં જ સોશિયલ મીડિયા પર પણ સરકાર વિરુદ્ધ આક્રોશ ફાટી નીકળ્યો છે.
