‘સુપ્રીમ કોર્ટ સરકારના દબાણમાં છે, ‘સુપ્રીમ’ કહેવડાવાને લાયક નથી!’

જમિયત ઉલેમા-એ-હિંદ(Jamiat Ulema-e-Hind)ના રાષ્ટ્રીય પ્રમુખ મૌલાના મહમૂદ મદની(Maulana Mahmud Madani)એ સુપ્રીમ કોર્ટ(Supreme Court) પર સીધો હુમલો કર્યો છે. શનિવારે ભોપાલમાં સંગઠનની ગવર્નિંગ બોડીની બેઠકને સંબોધતા તેમણે કહ્યું કે “જો બંધારણનો સંપૂર્ણ અમલ નહીં થાય, તો આ સંસ્થા હવે સુપ્રીમ કોર્ટ કહેવાને લાયક રહેશે નહીં” કોર્ટ હાલમાં “સરકારી દબાણ હેઠળ કામ કરી રહી છે.”

એનડીટીવીના અહેવાલ મુજબ, મૌલાના મદનીએ સેંકડો પ્રતિનિધિઓને સંબોધતા કહ્યું કે દેશમાં ઇસ્લામ અને મુસ્લિમો સામે નફરત ફેલાવવાના પ્રયાસો તીવ્ર બન્યા છે. તેમણે આરોપ લગાવ્યો કે જેહાદની પવિત્ર ઇસ્લામિક વિભાવનાને જાણી જોઈને વિકૃત કરવામાં આવી રહી છે અને આતંકવાદ સાથે જોડી દેવામાં આવી રહી છે. “‘લવ જેહાદ’, ‘લેન્ડ જેહાદ’ અને ‘સ્પિટ જેહાદ’ જેવા શબ્દો ફક્ત મુસ્લિમોને બદનામ કરવા માટે બનાવવામાં આવી રહ્યા છે. ઇસ્લામમાં જેહાદનો અર્થ અન્યાય અને જુલમ સામે સંઘર્ષ થાય છે. જ્યાં પણ જુલમ હશે, ત્યાં જેહાદ થશે.”

આ પણ વાંચો: મેવાણીએ કહ્યું, ‘દારૂ-જુગારમાંથી કમાતા હોય તેના પટ્ટા ઉતરશે જ!’

તેમણે કહ્યું કે દેશભરમાં મુસ્લિમોને તેમના ધાર્મિક પોશાક, ઓળખ અને જીવનશૈલીના કારણે નિશાન બનાવવામાં આવી રહ્યા છે. શિક્ષણ, રોજગાર અને સામાજિક પ્રગતિમાં અવરોધો ઉભા થઈ રહ્યા છે. બુલડોઝર ઓપરેશન, મોબ લિંચિંગ, આર્થિક બહિષ્કાર અને નફરતી અભિયાન મુસ્લિમોમાં અસુરક્ષાની ભાવના વધારી રહ્યા છે. ધર્માંતરણ કાયદાઓએ નમાઝ પઢવા અને ધર્મ શીખવવાને પણ ગુનો બનાવી દીધા છે, જો કે કેટલીક સંસ્થાઓને ખૂલ્લી છૂટ આપી દેવામાં આવી છે.

વકફ મિલકતોમાં સરકારી દખલગીરી સામે સખત વાંધો ઉઠાવતા મદનીએ કહ્યું, “વકફ મુસ્લિમો દ્વારા બનાવવામાં આવેલ ટ્રસ્ટ છે; તેમાં દખલગીરી સહન કરવામાં આવશે નહીં.”

વર્તમાન વાતાવરણને “ખતરનાક” ગણાવતા મૌલાનાએ ચેતવણી આપી હતી કે જો આ ચાલુ રહેશે, તો દેશની શાંત બહુમતી વસ્તી નફરત ફેલાવનારાઓ તરફ વળી શકે છે, જે રાષ્ટ્રીય એકતા માટે ગંભીર ખતરો છે. તેમણે મુસ્લિમ યુવાનોને નિરાશા છોડી દેવા, સતર્ક રહેવા અને તેમના બંધારણીય અધિકારોનું રક્ષણ કરવા અપીલ કરી.

આ પણ વાંચો: ગુજરાતી દલિત સાહિત્ય અકાદમીએ એક સાથે 10 પુસ્તકોનું લોકાર્પણ કર્યું

ભાજપે મદનીના નિવેદનની નિંદા કરી

ભાજપે તરત જ મૌલાના મદનીના નિવેદનોનો વળતો જવાબ આપ્યો હતો. મધ્યપ્રદેશના સહકાર, રમતગમત અને યુવા કલ્યાણ મંત્રી વિશ્વાસ કૈલાશ સારંગે કહ્યું, “જે વ્યક્તિ ભારતની હવામાં શ્વાસ લે છે અને ભારતનું પાણી પીવે છે, તે વંદે માતરમ પર સવાલ ઉઠાવે છે, તો તે બંધારણીય વ્યવસ્થાનું અપમાન છે. મદનીજી લાંબા સમયથી સાંપ્રદાયિક રાજકારણ રમી રહ્યા છે. બંધારણનું અપમાન કર્યા પછી, હવે સુપ્રીમ કોર્ટ પર હુમલો કરવો ખૂબ જ દુર્ભાગ્યપૂર્ણ છે.”

ભાજપના ધારાસભ્ય રામેશ્વર શર્માએ બાબરનામા અને અકબરનામાનો ઉલ્લેખ કરતા કહ્યું, “મુઘલ શાસકોએ પોતે તેમના ગ્રંથોમાં મંદિરોના વિનાશનો ઉલ્લેખ કર્યો હતો. જો આજે અદાલતો મંદિરોનો પુનઃસ્થાપન કરી રહી છે, તો તેમાં શું ખોટું છે?”

આ પણ વાંચો: ‘RSS ના માણસોને બહુ ચરબી કૂદી રહી છે’, બોટાદ કેસમાં મેવાણી આક્રમક

તેમણે મૌલાના મદનીને સલાહ આપતા કહ્યું, “જો તમે ઇસ્લામને બદનામ ન કરવા માંગતા હો, તો તમારા બાળકોને લવ જેહાદ અને લેન્ડ જેહાદ જેવા કૃત્યોથી દૂર રહેવાનું શિક્ષણ આપો.”

જોકે, આવા નિવેદનો આપનારા ભાજપના નેતાઓ જાણતા નથી કે લવ જેહાદ અને લેન્ડ જેહાદનો ઇસ્લામ સાથે કોઈ સંબંધ નથી. આ શબ્દો ઉગ્રવાદીઓ દ્વારા બનાવવામાં આવ્યા હતા. મૌલાના મદનીએ તેમના ભાષણમાં આ સ્પષ્ટ કર્યું અને જણાવ્યું કે ઇસ્લામમાં કેટલી પ્રકારની જેહાદ હોય છે. મૌલાના મદનીના આ નિવેદનોથી રાજકીય તણાવ વધ્યો છે, અને આગામી દિવસોમાં આ વિવાદ વધુ વકરે તેવી શક્યતા છે.

આ પણ વાંચો: જ્યારે ટોળાએ 116 મુસ્લિમોની હત્યા કરી ઉપર ફુલાવર વાવી દીધું!