છઠ પૂજા દરમિયાન 83 લોકોના ડૂબી જવાથી મોત, 14 હજુ ગુમ

ભારતમાં ધાર્મિક મેળાવડાઓ, બાબાઓના કાર્યક્રમોમાં ભેગી થતી ભીડમાં દર વર્ષે અનેક લોકો મોતને ભેટે છે. ઉત્તર ભારતમાં હાલમાં જ છઠ પૂજા દરમિયાન આવું જ બન્યું છે. મળતી માહિતી મુજબ છઠ પૂજા તહેવાર દરમિયાન ઝારખંડમાં 25 અને બિહારમાં 83 લોકોના ડૂબવાની અલગ અલગ ઘટનાઓમાં મોત થઈ ગયા છે. મૃતકોમાં ઘણાં બાળકોનો પણ સમાવેશ થાય છે.

આઘાતની વાત એ છે કે, મોટાભાગના મૃતકો બાળકો અને કિશોરો છે. પટનામાં 14 લોકો ડૂબી ગયા છે. નાલંદા અને વૈશાલીમાં 8, ઔરંગાબાદ અને સારણમાં 3-3, રોહતાસ, બેગુસરાય અને ગોપાલગંજમાં 2-2, ભોજપુર, સિવાન, બક્સર અને કૈમુરમાં 1-1 અને કોસી, સીમાંચલ અને પૂર્વ બિહાર જિલ્લામાં 29 લોકોના મોત થયા છે, જેમાં 14 લોકો હજુ પણ ગુમ છે.

ક્યાં કેટલા લોકોના મોત થયા?

દૈનિક જાગરણના એક રિપોર્ટ મુજબ, ઉત્તર બિહારમાં ઘાટ પર ડૂબવાથી 14 લોકોના મોત થયા હતા. આમાંથી 35 લોકોના મોત 27 ઓક્ટોબર, 2025ના રોજ અને 53 લોકોના મોત 28 ઓક્ટોબર, 2025ના રોજ થયા હતા. સોમવારે નવગછિયા પોલીસ સ્ટેશનના નવતોલિયા ગામમાં ગંગાની ઉપનદીમાં સ્નાન કરતી વખતે 4 બાળકોના મોત થયા હતા, જ્યારે 2 બાળકો હજુ પણ ગુમ છે. આ બધા બાળકો છઠ ઘાટની સફાઈ અને સજાવટમાં મદદ કરી રહ્યા હતા.

આ પણ વાંચો: 10 વર્ષમાં SC-ST સામેના ગુનાઓમાં 46 અને 91 ટકાનો વધારો થયો!

અનેક જગ્યાએ લોકો પાણીમાં ડૂબી ગયા

આ સિવાય ખાગરિયા અને ભાગલપુરમાં નવ-નવ, મધેપુરામાં પાંચ, બાંકા, સહરસા અને પૂર્ણિયામાં બે-બે અને લખીસરાયમાં એક વ્યક્તિ ડૂબી ગઈ હતી. ઉત્તર બિહારમાં છઠ પૂજા દરમિયાન વિવિધ સ્થળોએ ડૂબી જવાની ઘટનાઓમાં ચૌદ લોકોના મોત થયા હતા, જ્યારે એક છોકરી ગુમ છે. સોમવારે નવ અને મંગળવારે પાંચ લોકોના મોત થયા હતા. આમાં મધુબનીના પાંચ, દરભંગાના બે, સમસ્તીપુર અને સીતામઢીના ત્રણ-ત્રણ અને મોતીહારીનો એક વ્યક્તિનો સમાવેશ થાય છે. સોમવારે દરભંગામાં છઠ ભક્ત ડૂબી ગયો હતો.

અન્ય એક મીડિયા રિપોર્ટ મુજબ, દક્ષિણ બિહારમાંથી 34, કોસી-સીમાંચલ અને પૂર્વ બિહારમાંથી 30 અને ઉત્તર બિહારમાંથી 19 લોકોના મોત નોંધાયા છે. આમાંથી મોટાભાગના લોકોના મોત છઠ ઘાટ તૈયાર કરતી વખતે, સ્નાન કરતી વખતે અથવા ઊંડા પાણીમાં ઉભા રહીને પ્રાર્થના કરતી વખતે થયા હતા.

મૃતકોને સરકારે વળતરની જાહેરાત કરી

હાલમાં, NDRF અને SDRF ટીમો સતત શોધ કામગીરીમાં રોકાયેલી છે. વધતી જતી ઘટનાઓને ધ્યાનમાં રાખીને, રાજ્ય સરકારે તમામ જિલ્લાઓ પાસેથી વિગતવાર અહેવાલો માંગ્યા છે. આપત્તિ વ્યવસ્થાપન વિભાગે જણાવ્યું હતું કે મૃતકોના પરિવારોને પ્રત્યેક રૂ. 4 લાખનું વળતર આપવાની પ્રક્રિયા શરૂ કરવામાં આવી છે. જિલ્લા વહીવટીતંત્રને ઊંડા પાણીવાળા તમામ મુખ્ય ઘાટો અને બેરિકેડ વિસ્તારોમાં સુરક્ષા વધુ મજબૂત બનાવવા માટે પણ સૂચના આપવામાં આવી છે.

આ પણ વાંચો: જો ભગવાન ઈચ્છશે તો હું ફરીથી આવું કરીશ’, CJI પર જૂતું ફેંકનાર રાકેશ કિશોર

ગંગાનું જળ સ્તર વધી જતા ઘાટ ઉંડા થઈ ગયા

પટણા જિલ્લા વહીવટીતંત્રે જણાવ્યું હતું કે આ વર્ષે ગંગા નદીનું પાણીનું સ્તર સામાન્ય કરતા વધારે હતું, જેના કારણે ઘણી જગ્યાએ ઘાટના કાંઠા ઉંડા થઈ ગયા હતા. સલામતી માટે પોલીસ દળો અને ડાઇવર્સ તૈનાત કરવા છતાં અકસ્માતો અટકાવી શકાયા નથી.

સીએમ, મંત્રીઓએ ટ્વિટ કરી સંવેદના વ્યક્ત કરી

બીજી તરફ આ મામલે મુખ્યમંત્રી અને ઘણા મંત્રીઓએ ટ્વીટ કરીને મૃતકો પ્રત્યે સંવેદના વ્યક્ત કરી છે અને પરિવારોને શક્ય તમામ સહાયની ખાતરી આપી છે. દરમિયાન, સામાજિક કાર્યકરો અને સ્થાનિક સંગઠનોએ ભવિષ્યમાં આવી દુર્ઘટનાઓને રોકવા માટે છઠ ઘાટ પર સલામતી જાગૃતિ અભિયાન ચલાવવાની અપીલ કરી છે.

આ પણ વાંચો: RSS પર પ્રતિબંધ મૂકવા મહારાષ્ટ્રમાં હજારો બહુજનો રસ્તા પર ઉતર્યા