મહોબા: ઉત્તર પ્રદેશના મહોબા જિલ્લાના ઢિકવાહા ગામની સરકારી પ્રાથમિક શાળામાંથી એક અત્યંત શરમજનક ઘટના પ્રકાશમાં આવી છે. આ ઘટનાએ રાજ્ય સરકારના ‘પોષણયુક્ત આહાર’ના દાવાઓની પોલ ખોલી નાખી છે. સોશિયલ મીડિયા પર વાયરલ થયેલા આ વીડિયોમાં સ્પષ્ટ જોઈ શકાય છે કે, શાળાના રસોડામાં બાળકોને આપવામાં આવતા દૂધમાં પાણી નહીં, પરંતુ આખેઆખી પાણીની ડોલમાં માત્ર બે નાના દૂધના પેકેટ ભેળવીને બાળકોને પીરસવામાં આવી રહ્યું છે. આ વીડિયો વાયરલ થતાં જ સમગ્ર જિલ્લામાં અને શિક્ષણ જગતમાં હોબાળો મચી ગયો છે.
પ્રિન્સિપાલની હાજરીમાં જ ખેલાયો ભ્રષ્ટાચારનો ખેલ
વાયરલ થયેલા વીડિયોમાં દ્રશ્યો અત્યંત આઘાતજનક છે. વીડિયોમાં જોઈ શકાય છે કે શાળાની રસોઈયા છવીરાની, પ્રિન્સિપાલ મોનિકા સોનીની પ્રત્યક્ષ હાજરીમાં જ નળના પાણીથી ભરેલી ડોલ લાવે છે. ત્યારબાદ, તે દૂધના માત્ર બે પેકેટ કાપીને તે પાણીમાં ઠાલવે છે. પાણીનો રંગ સહેજ સફેદ થતા જ તેને દૂધ માની લેવામાં આવે છે. આશ્ચર્યની વાત તો એ છે કે, પ્રિન્સિપાલ પોતે ત્યાં ઉભા રહીને આ બધું જોઈ રહ્યા છે અને અત્યંત સહજતાથી બાળકોને ‘દૂધ’ પીવા માટે બોલાવે છે. જાણે માસૂમ બાળકોના હક પર તરાપ મારવી એ આ શાળામાં રોજિંદી પ્રક્રિયા હોય.
આ પણ વાંચો: નર્મદા અને છોટા ઉદેપુર જિલ્લામાં 713 આંગણવાડીઓના મકાન નથી
પ્રિન્સિપાલ શાળામાં ઉંઘતા જોવા મળ્યાં
આ મામલો માત્ર ખરાબ ભોજન પૂરતો સીમિત નથી. ગ્રામીણો દ્વારા જાહેર કરવામાં આવેલા અન્ય એક વીડિયોમાં પ્રિન્સિપાલ મોનિકા સોનીની કાર્યશૈલી પર ગંભીર સવાલો ઉભા થયા છે. આ વીડિયોમાં પ્રિન્સિપાલ ચાલુ શાળાના સમયે, જ્યારે બાળકોએ ભણવાનું હોય છે, ત્યારે વર્ગખંડમાં આરામથી ઘોરતા જોવા મળી રહ્યા છે. સ્થાનિકોનો આરોપ છે કે પ્રિન્સિપાલ મોટે ભાગે શાળામાં સુતા જ હોય છે અને બાળકોના શિક્ષણ પ્રત્યે તેમને કોઈ જ ગંભીરતા નથી. આ ઘટના દર્શાવે છે કે કેવી રીતે જવાબદાર પદ પર બેઠેલા વ્યક્તિઓ પોતાની ફરજ પ્રત્યે બેદરકાર છે.
“Two half-litre milk packet poured in a bucket of water”
Visuals from UP’s Mahoba where children are being served water mixed with milk during mid-day meal at a government school. pic.twitter.com/18b2TEL6Nu
— Piyush Rai (@Benarasiyaa) February 13, 2026
ગ્રામીણોનો આક્રોશ, ભ્રષ્ટાચારના આક્ષેપો લાગ્યા
ઢિકવાહા ગામના વાલીઓ અને ગ્રામીણોમાં આ વીડિયો જોઈને ભારે રોષ જોવા મળી રહ્યો છે. ગ્રામીણોનું કહેવું છે કે, સરકાર બાળકોના પોષણ માટે લાખો રૂપિયાનું બજેટ ફાળવે છે, પરંતુ અહીં શાળાનો સ્ટાફ પોતાનું ખિસ્સું ભરવા માટે માસૂમ બાળકોના મોઢામાંથી કોળિયો છીનવી રહ્યો છે. બાળકોને આપવામાં આવતું ભોજન પણ હલકી ગુણવત્તાનું હોય છે અને નિયમ મુજબનું મેનૂ ક્યારેય પાળવામાં આવતું નથી. ગ્રામીણોએ માંગ કરી છે કે માત્ર તપાસ જ નહીં, પણ આવા ભ્રષ્ટ કર્મચારીઓને તાત્કાલિક અસરથી સસ્પેન્ડ કરવામાં આવે.
તંત્ર દ્વારા તપાસના આદેશ
આ શરમજનક ઘટનાની ગંભીરતાને ધ્યાને લેતા મહોબાના બેઝિક શિક્ષણ અધિકારી (BSA) રાહુલ મિશ્રાએ તપાસના આદેશ આપ્યા છે. તેમણે મીડિયા સાથેની વાતચીતમાં જણાવ્યું હતું કે, “સોશિયલ મીડિયા પર વાયરલ થયેલા વીડિયોની નોંધ લેવામાં આવી છે. બ્લોક શિક્ષણ અધિકારીને સ્થળ પર જઈને વિગતવાર અહેવાલ તૈયાર કરવા સૂચના આપી છે. વીડિયોની સત્યતા તપાસ્યા બાદ પ્રિન્સિપાલ અને રસોઈયા વિરુદ્ધ કડક ખાતાકીય અને કાયદાકીય કાર્યવાહી કરવામાં આવશે. બાળકોના પોષણ સાથે કોઈ પણ પ્રકારની બાંધછોડ ચલાવી લેવામાં આવશે નહીં.”
યુપીનું મધ્યાહન ભોજન મોડેલ
વીડિયો મહોબાની ઢીકવાહા પ્રાથમિક શાળાનો છે. રસોઈયા પ્રિન્સિપાલની હાજરીમાં નળના પાણીથી ભરેલી ડોલ લાવે છે. દૂધના બે પેકેટ કાપીને તેમાં ઠાલવે છે. પાણીનો રંગ સહેજ સફેદ થતા જ તેને દૂધ માની નિર્દોષ બાળકોને પીવા બોલાવાય છે. #middaymeal #upgovt pic.twitter.com/s6YAMsTqdU— Naresh Makwana (@nareshmakwana) February 13, 2026
આ પણ વાંચો: ગુજરાતમાં આંગણવાડીના બાળકોના રૂ.242 કરોડ તંત્રે વાપર્યા જ નહીં
ભષ્ટાચારીઓ ગરીબ બાળકોનું દૂધ પણ છીનવી ગયા!
આ ઘટના ફરી એકવાર સાબિત કરે છે કે સરકારી યોજનાઓ ભલે ગમે તેટલી સારી હોય, પરંતુ તેના અમલીકરણમાં રહેલી ખામીઓ અને સ્થાનિક સ્તરે ચાલતો ભ્રષ્ટાચાર તેને નિષ્ફળ બનાવે છે. મધ્યાહન ભોજન જેવી સંવેદનશીલ યોજનામાં પણ જો આટલી હદે બેદરકારી રાખવામાં આવતી હોય, તો સરકારી શાળાઓમાં ભણતા ગરીબ બાળકોનું ભવિષ્ય શું હશે? શું તપાસના નામે માત્ર આશ્વાસન આપવામાં આવશે કે પછી બાળકોને તેમનો હક મળશે, તે હવે જોવાનું રહેશે.
આ પણ વાંચો: રસોઈયો દલિત હોવાથી સવર્ણોએ બાળકોને આંગણવાડીમાં મોકલવાનું બંધ કર્યું
