રાજધાની દિલ્હીમાં જંતર-મંતર ખાતે શિક્ષણ મંત્રી ધર્મેન્દ્ર પ્રધાનના રાજીનામા અને NEET પેપર લીક મુદ્દે વિરોધ કરી રહેલા વિદ્યાર્થીઓ પર પોલીસે કરેલી કાર્યવાહી બાદ દેશભરમાં ભારે આક્રોશ વ્યાપી ગયો છે. 20 જુલાઈના રોજ સંસદ માર્ચ કરી રહેલા નિર્દોષ વિદ્યાર્થીઓ પર સુરક્ષા દળોએ કરેલા લાઠીચાર્જ અને ટીયર ગેસના ઉપયોગ સામે નગીનાના સાંસદ અને ભીમ આર્મી પ્રમુખ ચંદ્રશેખર આઝાદ મેદાને આવ્યા છે. પીડિત વિદ્યાર્થીઓને ન્યાય અપાવવા માટે તેઓ ખુદ સંસદ ભવનમાં સ્થિત બાબા સાહેબ ડૉ. ભીમરાવ આંબેડકરની પ્રતિમા નીચે ધરણાં પર બેસી ગયા છે. દિલ્હીમાં સતત વરસી રહેલા ભારે વરસાદ વચ્ચે પણ તેઓ પોતાની માંગ પર અડગ રહીને શાંતિપૂર્ણ વિરોધ નોંધાવી રહ્યા છે.
25 જુલાઈએ દેશવ્યાપી વિરોધ અને આવેદનપત્ર
પોલીસની બર્બરતા અને સરકારના વલણ સામે આંદોલનને વધુ ઉગ્ર બનાવતા ચંદ્રશેખર આઝાદે એક વીડિયો સંદેશ જાહેર કરીને મોટા વિરોધ પ્રદર્શનનું આહ્વાન કર્યું છે. તેમણે જાહેરાત કરી છે કે 25 જુલાઈના રોજ તેમની પાર્ટી આઝાદ સમાજ પાર્ટી (ASP) અને ભીમ આર્મી દ્વારા દેશના તમામ જિલ્લા મુખ્યાલયો પર એક વિશાળ જનઆંદોલન કરવામાં આવશે. આ દરમિયાન NEET પેપર લીક કેસની યોગ્ય તપાસ, દોષિતો સામે કાર્યવાહી અને વિદ્યાર્થીઓ પર થયેલા લાઠીચાર્જ વિરુદ્ધ તમામ જિલ્લા મુખ્યાલયો પર તંત્રને દેશવ્યાપી આવેદનપત્ર સુપરત કરવામાં આવશે.
આ પણ વાંચો: CJP ના આંદોલને વિખરાયેલા વિપક્ષને આપી તક, સરકાર ટેન્શનમાં?
ધરણાંથી લઈને અત્યાર સુધી શું-શું બન્યું?
ઘટનાક્રમની શરૂઆત 20 જુલાઈએ થઈ હતી જ્યારે હજારો યુવાનો સંસદ ભવન તરફ માર્ચ કરી રહ્યા હતા. પોલીસે ભારે બળપ્રયોગ કરીને વિદ્યાર્થીઓને રોક્યા હતા. આ બનાવ બાદ તરત જ ચંદ્રશેખર આઝાદ આંદોલનને સમર્થન આપવા જંતર-મંતર પહોંચ્યા હતા, પરંતુ પોલીસે તેમને સંસદ તરફ આગળ વધતા અટકાવ્યા હતા.
ત્યારબાદ 21 જુલાઈના રોજ (જે દિવસે ભીમ આર્મીનો સ્થાપના દિવસ પણ હતો) આઝાદે આંદોલનકારી વિદ્યાર્થીઓને સંબોધિત કર્યા હતા. તેમણે વિદ્યાર્થીઓનો ઉત્સાહ વધારતા આકરા શબ્દોમાં કહ્યું હતું કે, “જો કોઈ તમારા પર લાકડીઓ વરસાવશે તો તમારે પણ સામે જવાબ આપવો પડશે, હવે સહન કરવાનો સમય જતો રહ્યો છે પરંતુ ઇંટનો જવાબ પથ્થરથી આપવાનો સમય આવી ગયો છે.” આ સંબોધન બાદ જંતર-મંતર પર યુવાનોની ભારે ભીડ એકઠી થવા લાગી હતી. આઝાદે ત્યાં જ તંબુ તાણીને બાબા સાહેબની પ્રતિમા નીચે કાયમી ધરણાં શરૂ કરી દીધા હતા, જેથી સાબિત થઈ શકે કે આ લડાઈ લાંબી ચાલશે.
આ પણ વાંચો: જીતનરામ માંઝીએ SC-ST માટે અલગ મતદાર મંડળની માંગ કરી
જોહર યુનિવર્સિટી અને સરકાર પર આકરા પ્રહારો
ધરણા સ્થળ પરથી જ ચંદ્રશેખર આઝાદે માત્ર વિદ્યાર્થીઓના પ્રશ્નો જ નહીં, પરંતુ અન્ય મુદ્દાઓ પર પણ સરકારને ઘેરી હતી. તેમણે સંદેશ આપ્યો હતો કે સરકાર દ્વારા જોહર યુનિવર્સિટી પર બુલડોઝર ચલાવવાનો આદેશ અત્યંત ક્રૂર, ગેરકાયદેસર અને અન્યાયી છે, જેના પર તાત્કાલિક ધોરણે રોક લગાવવી જોઈએ.
बारिश की हर बूँद स्वीकार है, मगर मासूमों पर अन्याय स्वीकार नहीं, जिन्होंने अन्याय किया वो कितने ही ताकतवर क्यों ना हो, उनके पीछे कितनी बड़ी शक्ति क्यों ना हो, लेकिन जवाब देना ही होगा।
महापुरुषों के विचार ही मेरे संघर्ष की ताक़त हैं। जय भीम, जय भारत। pic.twitter.com/14uRLsh41v— Chandra Shekhar Aazad (@BhimArmyChief) July 22, 2026
વરસતા વરસાદ વચ્ચે પણ બાબા સાહેબની પ્રતિમા નીચે ડટેલા આઝાદે સ્પષ્ટ ચેતવણી આપી છે કે શિક્ષણ મંત્રી ધર્મેન્દ્ર પ્રધાને રાજીનામું આપવું જ પડશે અને સરકારે યુવાનો પર કરેલા અત્યાચારનો હિસાબ આપવો પડશે. આટલું વિશાળ આંદોલન ઊભું થવા છતાં સરકાર તરફથી હજુ સુધી વાટાઘાટો માટે કોઈ પ્રતિનિધિ ન આવતાં આઝાદ અને વિદ્યાર્થીઓનો રોષ વધુ તીવ્ર બન્યો છે.
આ પણ વાંચો: કોક્રોચ જનતા પાર્ટીની સંસદ માર્ચના સમર્થનમાં હજારો લોકો ઉતર્યા
