દિલ્હીના રામલીલા મેદાન ખાતે આજે મુખ્ય ચૂંટણી કમિશનર (CEC) જ્ઞાનેશ કુમાર અને મતદાર યાદીના વિશેષ ગહન પુનરીક્ષણ (SIR) માં ગરબડોના વિરોધમાં ઇન્ડિયા બ્લોક દ્વારા એક વિશાળ રેલીનું આયોજન કરવામાં આવ્યું છે. ‘વોટ બચાવો, દેશ બચાવો’ અભિયાન અંતર્ગત યોજાનારી આ રેલીને લઈને સમગ્ર મધ્ય દિલ્હીમાં સુરક્ષાના અત્યંત કડક અને વ્યાપક બંદોબસ્ત ગોઠવવામાં આવ્યા છે. વિપક્ષ છેલ્લા એક મહિનાથી ચાલી રહેલા વિરોધ પ્રદર્શન બાદ આ રેલીને પોતાની તાકાત બતાવવાના એક મોટા અવસર તરીકે જોઈ રહ્યો છે, જેમાં દેશભરમાંથી લાખો લોકોના જોડાવાનો દાવો કરવામાં આવી રહ્યો છે.
ચુસ્ત સુરક્ષા વ્યવસ્થા અને 10 હજાર જવાનો તૈનાત
આજની આ રેલી અને માર્ચને ધ્યાનમાં રાખીને મધ્ય દિલ્હીમાં આશરે 10 હજાર પોલીસ અને અર્ધલશ્કરી દળોના જવાનોને તૈનાત કરવામાં આવ્યા છે. આ સુરક્ષા કાફલામાં આશરે 3 હજાર દિલ્હી પોલીસના જવાનો અને 7 હજાર અર્ધલશ્કરી દળોના જવાનો સામેલ છે, જ્યારે સુરક્ષાના ભાગરૂપે 10 કંપનીઓને રિઝર્વમાં પણ રાખવામાં આવી છે. રામલીલા મેદાન અને તેની આસપાસના તમામ રસ્તાઓ પર ચુસ્ત બેરિકેડિંગ કરવામાં આવ્યું છે. સુરક્ષા વ્યવસ્થાને આઠ અલગ-અલગ હિસ્સાઓમાં અને 14 ઝોનમાં વહેંચવામાં આવી છે, જેના પર વરિષ્ઠ ડીસીપી અને એસીપી સ્તરના અધિકારીઓ સીધી નજર રાખી રહ્યા છે. ખાસ કરીને લોકસભામાં વિપક્ષના નેતા રાહુલ ગાંધી સહિતના દિગ્ગજ નેતાઓની સુરક્ષા અને કટોકટીની સ્થિતિ માટે મેદાનના એક ગેટને ખાસ સુરક્ષિત રાખવામાં આવ્યો છે.
AI કેમેરા અને ડ્રોન દ્વારા હાઇ-ટેક નિરીક્ષણ
ભીડ અને સુરક્ષાનું સંચાલન કરવા માટે રામલીલા મેદાન અને તેના આસપાસના માર્ગો પર આશરે 250 હાઇ-ડેફિનેશન AI-સક્ષમ CCTV કેમેરા લગાવવામાં આવ્યા છે, જેનું લાઈવ ફીડ કંટ્રોલ રૂમ સુધી પહોંચી રહ્યું છે. આ ઉપરાંત, આકાશમાંથી નજર રાખવા માટે ડ્રોન કેમેરા અને જવાનોના શરીર પર બોડી-વોર્ન કેમેરા પણ તૈનાત કરવામાં આવ્યા છે. ભીડ નિયંત્રણ માટેના સાધનો સાથે પોલીસ કોઈપણ સ્થિતિને પહોંચી વળવા માટે સંપૂર્ણપણે તૈયાર છે.
दिल्ली के रामलीला मैदान का यह नज़ारा देखो👇🏻
लेफ्ट छात्र संगठनों के हजारों की छात्र पहुंच चुके हैं। मैदान का काफी हिस्सा भर चुका है
आज की इस रैली में छात्र संगठनों की ऐतिहासिक भूमिका रहने वाली है…!! https://t.co/KF5fLY1l9i
— Priyanshu Kumar (@priyanshu__63) November 1, 2026
અનેક માર્ગોને ડાયવર્ઝન અપાયું
આ રેલી બપોરે 12 વાગ્યે મિન્ટો રોડ બ્રિજ પાસેથી શરૂ થઈને જવાહરલાલ નેહરૂ માર્ગ અને ચમન લાલ માર્ગ થઈને રામલીલા મેદાન પહોંચશે. આ રેલીને લઈને સવારના 10 વાગ્યાથી સાંજે 5 વાગ્યા સુધી ટ્રાફિક પ્રતિબંધો અને ડાયવર્ઝન લાગુ કરવામાં આવ્યા છે. આશરે 10 થી 11 મુખ્ય માર્ગો પર વાહનોની અવરજવર પ્રભાવિત થવાની સંભાવના છે, જેમાં બહાદુર શાહ જફર માર્ગ, જવાહરલાલ નેહરૂ માર્ગ, આઈટીઓ, દિલ્હી ગેટ અને અજમેરી ગેટ જેવા વિસ્તારો સામેલ છે. જોકે, લોક નાયક જયપ્રકાશ (LNJP) અને જીબી પંત હોસ્પિટલ તરફ જતી એમ્બ્યુલન્સ માટે સ્પેશિયલ કોરિડોર ખુલ્લો રાખવામાં આવ્યો છે, અને લોકોને મેટ્રો દ્વારા મુસાફરી કરવા અપીલ કરાઈ છે.
‘જનતાનો મહાભિયોગ’ અને વિપક્ષનું આક્રમક વલણ
રામલીલા મેદાનની આ રેલી પહેલાં શનિવારે કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને મુખ્ય ચૂંટણી કમિશનર જ્ઞાનેશ કુમાર સામે પ્રતીકાત્મક ‘જનતાનો મહાભિયોગ’ કાર્યક્રમ યોજવામાં આવ્યો હતો. આ કાર્યક્રમમાં સોનિયા ગાંધી, રાહુલ ગાંધી, પ્રિયંકા ગાંધી વાડ્રા સહિતના અનેક નેતાઓ ઉપસ્થિત રહ્યા હતા. વિપક્ષનો આરોપ છે કે SIR પ્રક્રિયા અને મતદાર યાદીમાં ગરબડ કરીને સત્તાધારી પક્ષ દ્વારા લોકશાહીની હત્યા કરવામાં આવી રહી છે. આ રેલી પૂર્ણ થયા બાદ વિપક્ષી નેતાઓનું પ્રતિનિધિમંડળ રાષ્ટ્રપતિ દ્રૌપદી મુર્મુને મળીને પુરાવા સાથે પોતાની રજૂઆત કરશે.
ભાજપનો પલટવાર અને શાબ્દિક હુમલા
વિપક્ષના આ આક્રમક અભિયાન સામે ભારતીય જનતા પાર્ટી (BJP) એ પણ વળતો પ્રહાર કર્યો છે. ભાજપના પ્રવક્તા સંબિત પાત્રાએ વિપક્ષના આ આયોજનને ‘સંસદ અને લોકશાહીની મજાક’ ગણાવ્યું છે અને કટાક્ષ કર્યો છે કે જનતાનો વિશ્વાસ ગુમાવ્યા બાદ વિપક્ષ આ પ્રકારે સસ્તી લોકપ્રિયતા મેળવવા નાટક કરી રહ્યો છે. કેન્દ્રીય ગૃહ મંત્રી અમિત શાહે પણ વિપક્ષના આ આરોપોને ફગાવી દેતાં કહ્યું છે કે સરકાર દરેક મુદ્દા પર સંસદમાં ચર્ચા કરવા માટે તૈયાર છે.
આ પણ વાંચોઃ ABVP કાર્યકરોએ હિજાબ પહેરેલી વિદ્યાર્થીનીઓને ફટકારી!
