ગાંધીનગર: ગુજરાત વિધાનસભાના બજેટ સત્રની આજની કાર્યવાહીની શરૂઆત જ ભારે રાજકીય ગરમાગરમી અને આક્ષેપ-પ્રતિઆક્ષેપ સાથે થઈ હતી. રાજ્યના અનુસૂચિત જાતિ (SC), અનુસૂચિત જનજાતિ (ST) અને અન્ય પછાત વર્ગો (OBC) ના કલ્યાણ માટે કાર્યરત વિવિધ નિગમોને ફાળવવામાં આવતી રકમ અને આર્થિક ગ્રાન્ટના મુદ્દે વિરોધ પક્ષે ગૃહમાં આક્રમક વલણ અપનાવ્યું હતું. પ્રશ્નોત્તરી કાળ દરમિયાન જ્યારે આ નિગમોની આર્થિક સ્થિતિ અને લોન વિતરણની પ્રક્રિયા અંગે ચર્ચા છેડાઈ, ત્યારે શાસક અને વિપક્ષ સામસામે આવી ગયા હતા.
મંત્રી મનીષાબેન વકીલના જવાબથી અસંતોષ
ગૃહમાં ચર્ચા દરમિયાન સામાજિક ન્યાય અને અધિકારીતા વિભાગના રાજ્ય મંત્રી મનીષા વકીલે સરકારનો પક્ષ મજબૂતીથી રજૂ કર્યો હતો. તેમણે આંકડાકીય વિગતો આપતા દાવો કર્યો હતો કે, રાજ્ય સરકાર દ્વારા આ ત્રણેય વર્ગોના સર્વાંગી વિકાસ માટે પૂરતા પ્રમાણમાં બજેટની ફાળવણી કરવામાં આવી રહી છે. મંત્રીએ ગૃહને ખાતરી આપી હતી કે નિગમો દ્વારા છેવાડાના માનવી સુધી લોન અને સહાય પહોંચાડવાની કામગીરી સુચારૂ રીતે ચાલી રહી છે. જોકે, વિપક્ષ કોંગ્રેસના ધારાસભ્યોએ આ દાવાઓને પોકળ ગણાવીને તીવ્ર વિરોધ નોંધાવ્યો હતો.
આ પણ વાંચો: આ રીતે ‘ભણશે ગુજરાત?’ નર્મદા જિલ્લાની 145 શાળાઓમાં માત્ર એક શિક્ષક
વિપક્ષના આકરા પ્રહારો
કોંગ્રેસના સભ્યોએ આક્ષેપ કર્યો હતો કે, સરકાર માત્ર કાગળ પર મોટી રકમોની જાહેરાત કરે છે, પરંતુ વાસ્તવિકતામાં આ નિગમો પાસે લોન આપવા માટે પૂરતું ભંડોળ ઉપલબ્ધ નથી. અનેક અરજદારો વર્ષોથી લોન માટે રાહ જોઈ રહ્યા છે પરંતુ નિગમોમાં નાણાંના અભાવે તેમની ફાઈલો અટકી પડી છે. વિપક્ષે એવો પણ મુદ્દો ઉઠાવ્યો હતો કે કેન્દ્ર અને રાજ્ય સરકારના બજેટમાં કરવામાં આવેલી જોગવાઈઓ મુજબની રકમ સમયસર નિગમોના ખાતામાં જમા થતી નથી, જેના કારણે પછાત વર્ગના યુવાનો અને મહિલાઓ સ્વરોજગારીથી વંચિત રહી જાય છે.
ગૃહમાં સર્જાયો તંગદિલીનો માહોલ
ચર્ચા દરમિયાન જ્યારે વિપક્ષના સભ્યોને પૂરક પ્રશ્નો પૂછવાની તક આપવામાં આવી ત્યારે વાતાવરણ વધુ ઉગ્ર બન્યું હતું. કોંગ્રેસના ધારાસભ્યો પોતાની બેઠક પરથી ઊભા થઈને વેલમાં આવી ગયા હતા અને ‘પછાત વર્ગો સાથે અન્યાય બંધ કરો’ જેવા સૂત્રોચ્ચાર કરવા લાગ્યા હતા. આ આક્રોશને જોતા વિધાનસભા અધ્યક્ષ શંકરભાઈ ચૌધરીએ સભ્યોને શાંત પાડવા માટે વારંવાર ટકોર કરી હતી. અધ્યક્ષે સૂચના આપી હતી કે ગૃહની ગરિમા જાળવી સભ્યો પોતાની જગ્યાએ બેસી જાય, પરંતુ વિપક્ષી સભ્યો નમતું જોખવા તૈયાર નહોતા.
આ પણ વાંચો: ગુજરાત સરકારે નોકરીના કલાકો 9 થી વધારીને 10 કરી દીધાં
વિપક્ષે સરકાર પર પ્રહાર કરી વૉકઆઉટ કર્યો
જ્યારે મંત્રીના જવાબથી કોઈ જ સમાધાન ન નીકળ્યું અને સરકાર દ્વારા ગ્રાન્ટના વિતરણ મુદ્દે કોઈ સ્પષ્ટ ખાતરી ન મળી, ત્યારે કોંગ્રેસના તમામ સભ્યોએ એકસાથે ગૃહ છોડીને વોકઆઉટ કર્યો હતો. ગૃહની બહાર મીડિયા સાથે વાતચીત કરતા વિપક્ષી નેતાઓએ જણાવ્યું કે, “આ સરકાર પછાત અને શોષિત વર્ગના નામે માત્ર રાજકારણ કરે છે, પરંતુ જ્યારે તેમના આર્થિક હિતોની રક્ષા કરવાની વાત આવે છે ત્યારે પીછેહઠ કરે છે.”
SC, ST, OBC અને Minority સમાજને વસ્તી પ્રમાણે હકનુ બજેટ મળવુ જોઈએ.
જે સમાજોની વસ્તી જેટલી છે, તેમના વિકાસ માટેનુ બજેટ પણ એટલા જ પ્રમાણમાં ફાળવાવુ જોઈએ.
SC/ST,OBC અને Minority સમાજના આ પ્રશ્નો પર સરકાર પાસે કોઈ જવાબ નહોતો.
SC/ST,OBC અને Minority સમાજ સાથેના આ અન્યાય સામે વિરોધ… pic.twitter.com/JYDyC7nWU8
— Gujarat Congress (@INCGujarat) February 26, 2026
રાજકીય ગરમાગરમી વધવાની શક્યતા
આ વોકઆઉટ બાદ રાજકીય વર્તુળોમાં એવી ચર્ચા છે કે આગામી દિવસોમાં આ મુદ્દો વધુ જોર પકડશે. આગામી ચૂંટણીઓના સમીકરણોને જોતા પછાત વર્ગોની નારાજગી સરકારને ભારે પડી શકે છે, તેથી શાસક પક્ષ પણ હવે આ નિગમોની કાર્યક્ષમતા વધારવા માટે આક્રમક પગલાં ભરે તેવી શક્યતા છે.
આ પણ વાંચો: ગુજરાતમાં SC-ST-OBC ને 20,000 એકર જમીનનો કબજો ક્યારે?
