જાતિવાદી તત્વોને જાણે કાયદાની કોઈ બીક જ ન હોય તેમ દલિતો પર જીવલેણ હુમલાઓ કરવાની ઘટનાઓ સતત વધતી જઈ રહી છે. આવી જ એક ઘટનામાં એક જાતિવાદી શખ્સે એક નિર્દોષ દલિત બાળકીને ગોળી મારી દીધી હતી.
મામલો ઉત્તર પ્રદેશના બદાયુ જિલ્લાના જગત ગામનો છે. અહીં શુક્રવારે સાંજે જાતિવાદી માનસિકતા અને રસ્તાના સામાન્ય વિવાદમાં આ ગંભીર ગુનો આચરવામાં આવ્યો હતો. રસ્તા વચ્ચે પાર્ક કરેલી કાર હટાવવાનું કહેતા ગામના એક શખ્સે દલિત પિતા-પુત્રી પર હુમલો કર્યો હતો, જેમાં 10 વર્ષીય બાળકીને ગોળી વાગતા તે ગંભીર રીતે ઘાયલ થઈ છે.
રસ્તા વચ્ચેથી કાર હટાવવાનું કહેતા ગોળીબાર કર્યો
મળતી માહિતી મુજબ, જગત ગામના રહેવાસી નંદરામ જાટવ શુક્રવારે પોતાની 10 વર્ષની પુત્રી શિવની સાથે કોઈ કામ અર્થે ઘરની બહાર નીકળ્યા હતા. ગામના રસ્તા પર તે જ ગામના દામોદર નામના શખ્સે પોતાની કાર એવી રીતે ઉભી રાખી હતી કે જેના કારણે રસ્તો સંપૂર્ણપણે બ્લોક થઈ ગયો હતો. નંદરામે જ્યારે દામોદરને રસ્તો આપવા માટે કાર હટાવવાનું કહ્યું, ત્યારે દામોદર ઉશ્કેરાઈ ગયો હતો અને બંને વચ્ચે ઉગ્ર બોલાચાલી શરૂ થઈ હતી.
આ પણ વાંચો: અસામાજિક તત્વોએ ડૉ.આંબેડકરની શોભાયાત્રા રોકી પથ્થરમારો કર્યો
જાતિવાદી શખ્સે દલિત પિતા-પુત્રી પર ફાયરિંગ કર્યું
સામાન્ય બોલાચાલીએ ટૂંક સમયમાં હિંસક વળાંક લીધો હતો. આરોપી દામોદરે આવેશમાં આવીને પોતાની પાસે રહેલી ગેરકાયદેસર તમંચા (દેશી કટ્ટા) વડે નંદરામ પર સીધું ફાયરિંગ કર્યું હતું. આ હુમલામાં નંદરામનો આબાદ બચાવ થયો હતો, પરંતુ ગોળી સીધી તેની માસૂમ પુત્રી શિવનીના પગમાં વાગી હતી. ગોળી વાગતા જ બાળકી લોહીલુહાણ હાલતમાં રસ્તા પર ઢળી પડી હતી.
એટ્રોસિટી એક્ટ હેઠળ ગુનો નોંધાયો
ઘટના બાદ ઈજાગ્રસ્ત બાળકીને લઈને પિતા તાત્કાલિક અલાપુર પોલીસ સ્ટેશન પહોંચ્યા હતા. પરિસ્થિતિની ગંભીરતા જોઈને પોલીસે બાળકીને તાત્કાલિક સારવાર અર્થે જિલ્લા હોસ્પિટલમાં દાખલ કરી છે. એસઓ (SO) એપી સિંહે જણાવ્યું હતું કે, નંદરામની ફરિયાદના આધારે આરોપી દામોદર વિરુદ્ધ આઈપીસીની વિવિધ કલમો હેઠળ ‘હત્યાનો પ્રયાસ’ અને એસસી-એસટી એક્ટની કડક ધારાઓ હેઠળ ગુનો નોંધી વધુ તપાસ હાથ ધરવામાં આવી છે.
આ પણ વાંચો: દલિત યુવતીની હત્યા કરી લાશ ઝાડ પર લટકાવી, ગેંગરેપની આશંકા
ગામમાં ભારેલા અગ્નિ જેવી સ્થિતિ
આ ઘટનાને પગલે ગામમાં ભારેલા અગ્નિ જેવી સ્થિતિ સર્જાઈ છે. દલિત સમાજમાં આક્રોશ જોવા મળી રહ્યો છે. પોલીસે આરોપીની અટકાયત કરવા માટે ચક્રો ગતિમાન કર્યા છે અને ગામમાં શાંતિ જળવાઈ રહે તે માટે પોલીસ બંદોબસ્ત પણ ગોઠવવામાં આવ્યો છે. હોસ્પિટલના સૂત્રોના જણાવ્યા અનુસાર, બાળકીની હાલત હાલ સ્થિર છે, પરંતુ તેને થયેલી ઈજા ગંભીર છે.
આ પણ વાંચો: લાયક હોવા છતાં ગુજરાત સરકારે 3 બહુજન યુવતીઓને નોકરી ન આપી!
