ઉના કાંડના 11 વર્ષ : ગુજરાતના ગીર સોમનાથ જિલ્લાના ઉનામાં દલિત યુવાનો પર થયેલા અમાનવીય અત્યાચારની ઘટનાને એક દાયકો પૂર્ણ થઈ રહ્યો છે. આ હ્રદયદ્રાવક ઘટનાની યાદમાં આજે 11 જુલાઈ, 2026ના રોજ અમદાવાદ ખાતે “ઉના કાંડના 10 વર્ષ – હવે મૌન નહીં, સંકલ્પનો સમય” વિષય હેઠળ એક વિશાળ રાજ્ય કક્ષાના કાર્યક્રમનું આયોજન કરવામાં આવ્યું છે. સામાજિક અગ્રણીઓ દ્વારા રાજ્યના તમામ નાગરિકો, માનવ અધિકાર કાર્યકરો, ભીમસૈનિકો, બંધારણપ્રેમીઓ, વિદ્યાર્થીઓ અને સામાજિક ન્યાયમાં અડગ વિશ્વાસ ધરાવતા તમામ વર્ગોને આ કાર્યક્રમમાં મોટી સંખ્યામાં એકત્રિત થવા માટે સત્તાવાર અપીલ કરવામાં આવી છે. કાર્યક્રમમાં વડગામના ધારાસભ્ય જિગ્નેશ મેવાણી ખાસ ઉપસ્થિત રહીને કાર્યક્રમને સંબોધન કરશે.
આ પણ વાંચોઃ ઉનાકાંડના ચૂકાદાને સરકાર ઉપલી કોર્ટમાં પડકારે, નહીંતર અમે પડકારીશું’
ઉનાકાંડની ગોઝારી ઘટનાના 10 વર્ષ થયા
ઉલ્લેખનીય છે કે, 11 જુલાઈ, 2016ના રોજ ઉના ખાતે બનેલી દલિત યુવાનો પરના અત્યાચારની ઘટના માત્ર વ્યક્તિગત હુમલો નહોતી, પરંતુ તે ભારતના બંધારણીય મૂલ્યો, માનવ ગૌરવ અને સામાજિક સમાનતા પર થયેલો ગંભીર પ્રહાર હતો. આ ઘટનાએ રાષ્ટ્રીય સ્તરે માનવ અધિકારો અને સમાનતા માટેના સંઘર્ષને એક નવી દિશા આપી હતી. આ ઘટનાના 10 વર્ષ પૂર્ણ થવાના અવસરે યોજાનારો આ રાજ્ય કક્ષાનો કાર્યક્રમ માત્ર ભૂતકાળના સ્મરણ પૂરતો મર્યાદિત નથી, પરંતુ વર્તમાન સમયમાં બંધારણીય મૂલ્યો, સમાનતા અને સામાજિક ન્યાય માટે નવી પ્રતિબદ્ધતા અને એકતા વ્યક્ત કરવાનો ઐતિહાસિક મંચ બનશે.
કાર્યક્રમનું સમયપત્રક અને આયોજન
આ કાર્યક્રમનું આયોજન 11 જુલાઈ, 2026 (શનિવાર) ના રોજ બપોરે 2.00 વાગ્યાથી સાંજે 7.00 વાગ્યા સુધી કરવામાં આવ્યું છે. આ કાર્યક્રમ અમદાવાદના નિકોલ વિસ્તારમાં આવેલા ‘શહીદ વીર મંગળ પાંડે ઓડિટોરિયમ હોલ’ ખાતે યોજાશે. આયોજકો દ્વારા કાર્યક્રમની તમામ વહીવટી અને સંગઠનાત્મક તૈયારીઓને આખરી ઓપ આપી દેવામાં આવ્યો છે અને સમગ્ર રાજ્યમાંથી વિવિધ સંગઠનોના પ્રતિનિધિઓ આમાં સહભાગી થવા પહોંચશે.
સામાજિક જાગૃતિ અને એકતાની હાકલ
સામાજિક કાર્યકર કાંતિલાલ પરમારે મીડિયા સમક્ષ જણાવ્યું છે કે, વર્તમાન સમયમાં પણ દેશ અને રાજ્યના જુદા-જુદા ભાગોમાં દલિતો તેમજ વંચિત વર્ગો સામે થતા ભેદભાવ અને અત્યાચારના બનાવો ચિંતાનો વિષય છે. આ પરિસ્થિતિ સામે લડવા માટે સમાજમાં સંવેદનશીલતા, સંગઠિત એકતા અને બંધારણીય જાગૃતિ અનિવાર્ય છે. લોકશાહી ઢબે ન્યાય, સમાનતા અને માનવ ગૌરવની પુનઃસ્થાપના માટે સમાજના પ્રત્યેક નાગરિકે એક મંચ પર આવવું જરૂરી છે.
આ હેતુસર સામાજિક આગેવાનો દ્વારા ખાસ કરીને યુવાનો, શૈક્ષણિક સંસ્થાઓના વિદ્યાર્થીઓ, મહિલા શક્તિ, વિવિધ સામાજિક સંગઠનો, કાનૂની વકીલો, પત્રકારો, માનવ અધિકાર માટે લડતા કાર્યકરો તેમજ તમામ ન્યાયપ્રેમી નાગરિકોને પોતાના પરિવાર અને મિત્ર મંડળ સાથે આ રાજ્ય કક્ષાના કાર્યક્રમમાં ઉપસ્થિત રહી સામાજિક ન્યાયના આ સંકલ્પને સફળ બનાવવા ભારપૂર્વક આહવાન કરવામાં આવ્યું છે.
આ પણ વાંચોઃ ન્યાય કે મજાક? ઉના કાંડમાં 10 વર્ષ બાદ 5 આરોપીને માત્ર 5 વર્ષની સજા!
