ઉત્તર પ્રદેશના પીલીભીતમાં રાઇસ મિલ એસોસિએશનના પૂર્વ અધ્યક્ષ રમેશચંદ્ર ગુપ્તા ઉર્ફે બંગાળી બાબુ સામે એક દલિત યુવતીએ નોકરી અપાવવાના બહાને ગેસ્ટ હાઉસમાં બોલાવીને દુષ્કર્મ આચરવાનો ગંભીર આરોપ લગાવ્યો છે. પીડિત યુવતીની ફરિયાદના આધારે શુક્રવારે પોલીસે આરોપી વિરુદ્ધ ગુનો નોંધીને તપાસ હાથ ધરી છે.
નશીલો પદાર્થ પીવડાવી ફોટા પાડ્યા, ધમકી આપી દબાણ બનાવ્યું
પીડિત દલિત યુવતીના જણાવ્યા અનુસાર, રમેશચંદ્ર ગુપ્તા ઉર્ફે બંગાળી બાબુએ તેની સાથે ફોન પર વાતચીત કરીને તેને સારી નોકરી અપાવવાનો ભરોસો આપ્યો હતો. આ પછી આરોપીએ તેને કસબાના એક ગેસ્ટ હાઉસમાં મળવા માટે બોલાવી હતી. આરોપ છે કે ગેસ્ટ હાઉસમાં આરોપીએ યુવતીને કોઈ નશીલો પદાર્થ પીવડાવી દીધો હતો.
આ પણ વાંચો: ‘ન્યાય આપો અથવા મારી નાખો’, સૂળી પર લટકી આદિવાસીઓનું આંદોલન
યુવતી અર્ધબેભાન અવસ્થામાં આવી જતાં આરોપીએ તેની સાથે દુષ્કર્મ આચર્યું હતું. આટલું જ નહીં, આરોપીએ આ દરમિયાન યુવતીના વાંધાજનક ફોટા પણ પાડી લીધા હતા. ત્યારબાદ ફોટા સોશિયલ મીડિયા પર વાયરલ કરવાની ધમકી આપીને તે યુવતી પર વારંવાર પોતાની પાસે આવવા માટે માનસિક દબાણ બનાવતો હતો.
ગેસ્ટ હાઉસના કર્મચારીની પૂછપરછ અને પોલીસ તપાસ
આ સતત માનસિક પ્રતાડનાથી કંટાળીને બુધવારે પીડિતાએ પોલીસ સ્ટેશન પહોંચીને આરોપી સામે લેખિત ફરિયાદ આપી હતી. ફરિયાદ મળતાં જ પોલીસે ગુરુવારે સંબંધિત ગેસ્ટ હાઉસ પહોંચીને સઘન તપાસ હાથ ધરી હતી. પોલીસે ત્યાંના કર્મચારીઓની પૂછપરછ કરતાં એક કર્મચારીએ પુષ્ટિ કરી હતી કે આરોપી રમેશચંદ્ર ગુપ્તા ઘટનાના દિવસે યુવતીને પોતાની સાથે લઈને ગેસ્ટ હાઉસ આવ્યો હતો. પ્રાથમિક તપાસમાં મહત્વપૂર્ણ પુરાવા મળ્યા બાદ શુક્રવારે પોલીસે રમેશચંદ્ર ગુપ્તા વિરુદ્ધ નામજોગ એફઆઈઆર નોંધાઈ છે.
આ પણ વાંચો: ભાવનગર સિવિલમાં ખોટું લોહી ચડાવતા દલિત પ્રસૂતાનું મોત
મેડિકલ પરીક્ષણ અને આગળની કાર્યવાહી
કેસ દાખલ થયા બાદ પોલીસ અધિકારીએ પોતે આ ઘટનાની ઊંડાણપૂર્વક તપાસ શરૂ કરી દીધી છે. પોલીસે પીડિત યુવતીના વિધિવત નિવેદન પણ નોંધી લીધા છે. શનિવારે પીડિતાને તબીબી પરીક્ષણ માટે જિલ્લા હોસ્પિટલમાં મોકલવાની તજવીજ હાથ ધરવામાં આવી છે. ઉચ્ચ પોલીસ અધિકારીના જણાવ્યા મુજબ, મેડિકલ રિપોર્ટ અને પીડિતાના નિવેદનોના આધારે આગળની કાનૂની કાર્યવાહી ઝડપી બનાવવામાં આવશે.
આ પણ વાંચો: દલિત યુવકે કામ કરવાની ના પાડતા વીજ કરંટ આપી હત્યા
