બેટી બચાવો બેટી પઢાઓનો નારો આપતી ભાજપની સરકારના રાજમાં દલિત દીકરીઓ હવે હોસ્પિટલમાં પણ સુરક્ષિત નથી. યુપીના લખનૌના બક્ષીના તળાવ (બીકેટી) વિસ્તારમાંથી તબીબી ક્ષેત્રને કલંકિત કરતી એક ગંભીર ઘટના સામે આવી છે.
અહીં એક ખાનગી હોસ્પિટલના ડોક્ટર પર સારવાર માટે આવેલી 12માં ધોરણની દલિત વિદ્યાર્થીનીને નશીલું ઈન્જેક્શન આપી બેભાન કરી દુષ્કર્મ આચરવાનો આરોપ લાગ્યો છે. આ મામલાની ગંભીરતાને ધ્યાનમાં લઈને ઉત્તર પ્રદેશના નાયબ મુખ્યમંત્રી અને આરોગ્ય મંત્રી બ્રજેશ પાઠકે સંબંધિત હોસ્પિટલને તાત્કાલિક અસરે સીલ કરવા અને આરોપી ડોક્ટરનું મેડિકલ લાયસન્સ કાયમી ધોરણે સસ્પેન્ડ કરવાના કડક નિર્દેશ જાહેર કર્યા છે.
પોલીસના સત્તાવાર નિવેદન અનુસાર, પીડિત વિદ્યાર્થીનીને સ્વાસ્થ્ય સંબંધી સમસ્યાના કારણે ગત 18 મેના રોજ ઈન્દૌરાબાગ સ્થિત ‘તેજસ હોસ્પિટલ’માં દાખલ કરવામાં આવી હતી. સારવાર દરમિયાન હોસ્પિટલના સંચાલક અને આરોપી ડોક્ટર વિજયગિરી વિદ્યાર્થીનીને ઓપરેશન થિયેટર (OT)માં લઈ ગયો હતો. આરોપ છે કે ડોક્ટરે ત્યાં હાજર મહિલા કર્મચારીઓ અને બહાર ઉભેલા વિદ્યાર્થીનીના પિતાને કોઈ બહાને ઓપરેશન થિયેટરની બહાર મોકલી દીધા હતા.
આ પણ વાંચો: ભાજપની રાજપૂત મહિલા નેતા નકલી SC સર્ટિફિકેટ પર મંત્રી બની ગઈ?
ત્યારબાદ, આરોપી ડોક્ટરે સગીરાને એક નશીલું ઈન્જેક્શન આપ્યું હતું, જેના કારણે તે અર્ધબેભાન અવસ્થામાં આવી ગઈ હતી. પીડિતાએ પોલીસને આપેલા નિવેદનમાં જણાવ્યું છે કે હોશ આવ્યા બાદ તેને પોતાની સાથે થયેલા કથિત દુષ્કર્મનો અહેસાસ થયો હતો. આ અંગે તેણે તુરંત પોતાના પરિવારજનોને જાણ કરી હતી, જેના આધારે પરિવારે સ્થાનિક પોલીસ સ્ટેશનમાં સત્તાવાર ફરિયાદ નોંધાવી હતી. પોલીસે ત્વરિત કાર્યવાહી કરીને આરોપી તબીબ વિજય ગિરીને કસ્ટડીમાં લઈ લીધો છે.
ડેપ્યુટી કમિશનર ઓફ પોલીસ (નોર્થ) ટ્વિંકલ જૈને પત્રકારોને જણાવ્યું કે પીડિતાને તબીબી પરીક્ષણ (મેડિકલ તપાસ) માટે મોકલવામાં આવી છે. મેડિકલ રિપોર્ટના પરિણામો અને પુરાવાઓના આધારે આગળની કાયદાકીય કાર્યવાહીને વધુ મજબૂત કરવામાં આવશે.
આ પણ વાંચો: રિસેપ્શનમાં પાણી પીવા બદલ બે દલિત યુવકો પર છરીથી હુમલો
પોલીસે સંબંધિત કલમો હેઠળ ગુનો નોંધીને ઘટનાસ્થળ એટલે કે હોસ્પિટલ પરિસરનું ઝીણવટભર્યું નિરીક્ષણ કર્યું છે અને ત્યાં હાજર સ્ટાફની પૂછપરછ શરૂ કરી દીધી છે. અધિકારીઓના જણાવ્યા મુજબ, કેસના તમામ પાસાઓની તટસ્થતાથી તપાસ ચાલી રહી છે.
બીજી તરફ, આ ઘટનાના રાજકીય અને સામાજિક ઘેરા પ્રત્યાઘાતો પડ્યા છે. નાયબ મુખ્યમંત્રી બ્રજેશ પાઠકે સોશિયલ મીડિયા પ્લેટફોર્મ ‘એક્સ’ (ટ્વિટર) પર આ અંગેની કડક કાર્યવાહીની માહિતી આપતા લખ્યું કે, તેજસ હોસ્પિટલમાં બનેલી આ ઘટના અત્યંત નિંદનીય છે.
આરોપી ડોક્ટર વિજયગિરી ભવિષ્યમાં ક્યારેય પણ કોઈ પણ પ્રકારની તબીબી સેવાઓ કે ફરજો બજાવી ન શકે તે માટે તેનું લાયસન્સ તાત્કાલિક રદ કરવાનો આદેશ આપવામાં આવ્યો છે. સરકાર પીડિત દીકરી અને તેના પરિવારની સાથે છે અને ફાસ્ટ ટ્રેક તપાસ કરાવીને આરોપીને કડક સજા અપાવાશે. તંત્ર દ્વારા હોસ્પિટલને સીલ કરવાની પ્રક્રિયા પૂર્ણ કરવામાં આવી રહી છે.
આ પણ વાંચો: GPSC કે ‘પટેલ સેવા આયોગ’? હસમુખ પટેલે ફરી SC-OBCના હકો છીનવ્યા?
