મુંબઈના શિવાજી પાર્ક નજીકની એક રસ્તા પર 22 જુલાઈ 2026 ના રોજ એક ચોંકાવનારો નજારો જોવા મળ્યો હતો. દેશભરમાં NEET પેપર લીક અને ગેરરીતિઓ સામે વિરોધ પ્રદર્શન ચાલી રહ્યું હતું, ત્યારે આંદોલનકારી વિદ્યાર્થીઓને કસ્ટડીમાં લઈને જઈ રહેલી પોલીસ વાન સામે એક 27 વર્ષની યુવતી એકલી આવીને ઊભી રહી ગઈ. કોઈ હથિયાર કે મોટી ભીડના ટેકા વગર, ફક્ત એક હાથ ફેલાવીને અને આંખોમાં આક્રોશ સાથે તે પોલીસ વાનની આગળ ઢાલ બનીને રસ્તો રોકીને ઊભી રહી ગઈ હતી.
મિનિટોમાં આ બનાવનો વીડિયો સોશિયલ મીડિયા પર વાયરલ થઈ ગયો અને #RiyaAhir હેશટેગ ટ્રેન્ડ કરવા લાગ્યો. કોકરોચ જનતા પાર્ટી (CJP) ના NEET પેપર લીક વિરોધી આંદોલનમાં રિયા આહિર અચાનક જ દેશભરમાં સૌથી વધુ ચર્ચામાં આવેલો ચહેરો બની ગઈ. પરંતુ સવાલ એ થાય છે કે રિયા આહિર કોણ છે અને તેનો આ આંદોલન સાથે શું સંબંધ છે?
કોણ છે 27 વર્ષીય રિયા આહિર?
રિયા આહિર મૂળ મુંબઈની રહેવાસી છે અને તે વ્યવસાયે મોડેલ, અભિનેત્રી, ડાન્સર અને એક ઉદ્યોગસાહસિક (Entrepreneur) છે. તેણે હિન્દી થિયેટરમાં આશરે 13 વર્ષ વિતાવ્યા છે અને ફેબ્રુઆરી 2025 માં રિલિઝ થયેલા ‘Dilbara’ જેવા કેટલાક જાણીતા મ્યુઝિક વીડિયોમાં પણ કામ કર્યું છે.
આ પણ વાંચો: ઉના કાંડના 10 વર્ષે અમદાવાદમાં યોજાયેલી સભામાં શું નિર્ણય લેવાયો?
અભિનય ક્ષેત્ર સિવાય, રિયાએ પોતાનો એક લક્ઝરી હેન્ડમેડ ક્લોથિંગ બ્રાન્ડ ‘Riyasat’ (Rhiyasat) શરૂ કર્યો છે, જે સ્થાનિક કારીગરો અને આર્ટિઝન્સને મુખ્યધારા સાથે જોડવાનું મહત્વનું કામ કરે છે. પ્રાદા-કોલ્હાપુરી વિવાદ (Prada-Kolhapuri Dispute) થી પ્રેરણા લઈને તેણે આ સ્થાનિક કલાકારોને પ્લેટફોર્મ આપવા માટે બ્રાન્ડની સ્થાપના કરી હતી.
શિક્ષણની વાત કરીએ તો, તે સાયકોલોજીની વિદ્યાર્થી રહી ચૂકી છે, પરંતુ પ્રોફેશનલ કામની વ્યસ્તતાના કારણે ડિગ્રી પૂરી ન થઈ શકતા હાલમાં તે મુંબઈ યુનિવર્સિટીમાંથી ડિસ્ટન્સ મોડમાં ઇંગ્લિશ લિટરેચરનો અભ્યાસ કરી રહી છે.
રિયા આર્મી પરિવારમાંથી આવે છે
રિયા આહિર એક શિસ્તબદ્ધ સૈન્ય (Defense) પરિવારમાંથી આવે છે. તેના પિતા ઈન્ડો-તિબેટિયન બોર્ડર પોલીસ (ITBP) માં સેવા આપી ચૂક્યા છે અને પરિવારના અન્ય સભ્યો પણ દેશના સશસ્ત્ર દળો સાથે જોડાયેલા રહ્યા છે. દેશભક્તિ અને અન્યાય સામે અવાજ ઉઠાવવાનો વારસો તેને પરિવારમાંથી મળ્યો છે. સોશિયલ મીડિયા પર પોતાના મજબૂત સામાજિક અને રાજકીય વિચારો વ્યક્ત કરવા માટે તે અગાઉથી જાણીતી છે.
આ પણ વાંચો: દલિત મહિલાને ઘરે બોલાવી બંદૂક બતાવી ધર્મ પરિવર્તન કરાવાયું!
રિયાએ મીડિયા સાથે વાત કરતા સ્પષ્ટ કર્યું હતું કે તે પોતે NEET ની પરીક્ષાર્થી નથી, છતાં પણ એક જવાબદાર નાગરિક તરીકે સિસ્ટમની ખામીઓ અને વિદ્યાર્થીઓ પર થતા અત્યાચાર સામે તેણે નિડરતાથી અવાજ ઉઠાવ્યો છે.
22 જુલાઈનો એ વાયરલ કિસ્સો
22 જુલાઈ 2026 ના રોજ મુંબઈના દાદર-શિવાજી પાર્ક વિસ્તારમાં CJP ના આહ્વાન પર વિદ્યાર્થીઓ અને સામાન્ય નાગરિકો NEET-UG 2026 ના કથિત પેપર લીક અને ગેરરીતિઓ સામે વિરોધ કરવા એકઠા થયા હતા. પોલીસે સ્થિતિ કાબૂમાં લેવા કેટલાક વિરોધકર્તાઓને બળજબરીપૂર્વક કસ્ટડીમાં લઈને વાનમાં બેસાડ્યા.
આ પણ વાંચો: જામ ખંભાળિયા પાલિકામાં ડૉ.આંબેડકરના હટાવેલા ફોટા ભીમ આર્મીએ ફરી લગાવ્યા
તે જ સમયે રિયા ત્યાં હાજર હતી અને તેણે જોયું કે નિર્દોષ વિદ્યાર્થીઓને ગુનેગારોની જેમ લઈ જવામાં આવી રહ્યા છે. તે તરત જ ચાલતી વાન સામે આવીને ઊભી રહી ગઈ અને વિદ્યાર્થીઓને મુક્ત કરવાની માંગ કરી. વાન ડ્રાઇવરે તેને હટાવવાનો પ્રયાસ કર્યો છતાં તે ડગી નહીં.
રિયાએ મીડિયાને જણાવતા કહ્યું કે, “પોલીસ પોતાનું કામ કરી રહી છે, પણ તે જવાબદારીપૂર્વક નથી કરી રહી.
જો અધિકારીઓ જવાબદારીથી વર્તન નહીં કરે તો નાગરિકોએ પોતે જવાબદારી લેવી પડશે. દિલ્હીમાં વિદ્યાર્થીઓ સાથે જે થયું તે ખોટું હતું. કેન્દ્રીય શિક્ષણ મંત્રી ધર્મેન્દ્ર પ્રધાને રાજીનામું આપવું જોઈએ અથવા જંતર-મંતર જઈને વિદ્યાર્થીઓ સાથે સીધી વાત કરવી જોઈએ.” તેણે ઉમેર્યું કે, “હું શહીદ થઈને મરવાનું પસંદ કરીશ, પણ લાચાર થઈને નહીં.”
CJP અને NEET આંદોલન શું છે?
કોકરોચ જનતા પાર્ટી (CJP) શરૂઆતમાં એક ઓનલાઈન સેટાયર ચળવળ તરીકે શરૂ થઈ હતી, પરંતુ સમય જતાં તે એક વિશાળ અને મજબૂત વિદ્યાર્થી આંદોલન બની ચૂકી છે. આ સંગઠન NEET-UG 2026 ની પરીક્ષામાં થયેલા પેપર લીક, ટેકનિકલ ગેરરીતિઓ અને NTA (National Testing Agency) ની જવાબદેહી સામે દેશવ્યાપી લડત ચલાવી રહ્યું છે. તેમની મુખ્ય માંગણીઓમાં શિક્ષણ મંત્રીનું રાજીનામું, NEET પરીક્ષા રદ કરવી અને NEET ના માનસિક તણાવ તેમજ અન્યાયના કારણે જીવ ગુમાવનારા વિદ્યાર્થીઓના પરિવારોને 1 કરોડ રૂપિયાનું વળતર આપવાનો સમાવેશ થાય છે. રિયા આહિર આ આંદોલનનો મુંબઈમાં ચહેરો બની ચૂકી છે.
આ પણ વાંચો: દલિત મહિલાને PSIએ પોલીસ સ્ટેશનમાં 5 થપ્પડ મારી
