બનાસકાંઠા જિલ્લાના વાવ તાલુકાના મોરીખા ગામના 27 વર્ષીય દલિત યુવક લખીરામ પરમારના અકાળે થયેલા રહસ્યમય મોતને ત્રણ મહિના જેટલો લાંબો સમય વિતી ગયો હોવા છતાં, આજે પણ તેના મોતનું રહસ્ય અકબંધ રહ્યું છે. શરૂઆતમાં યુવક ગુમ થયા બાદ તેનો મૃતદેહ ગામના તળાવમાંથી મળી આવ્યો હતો. પરિવારજનો અને સ્થાનિક દલિત સમાજ પ્રથમ દિવસથી જ આ ઘટનાને આત્મહત્યા નહીં પરંતુ સુનિયોજિત હત્યા ગણાવી રહ્યા છે. લખીરામને પ્રેમસંબંધને લઈને અગાઉ ગંભીર ધમકીઓ મળી હોવાના આક્ષેપો પણ પરિવારે કર્યા છે. હવે ઘટનાના 3 મહિના બાદ મૃતદેહને કબર ખોદીને બહાર કાઢવામાં આવ્યો છે અને ફોરેન્સિક રી-પોસ્ટમોર્ટમ માટે અમદાવાદ સિવિલ હોસ્પિટલ ખસેડવામાં આવ્યો છે. આ કવાયતે સમગ્ર પોલીસ તપાસ સામે અનેક શંકા-કુશંકાઓ અને ગંભીર પ્રશ્નો ઊભા કર્યા છે.
ત્રણ મહિને કબર ખોદવાની નોબત કેમ આવી?
સામાન્ય રીતે દફનવિધિ થઈ ગયાના ત્રણ મહિના પછી મૃતદેહ બહાર કાઢીને ફરી પીએમ કરાવવું એ કોઈ સામાન્ય ઘટના નથી. આ સ્થિતિ જ દર્શાવે છે કે પ્રાથમિક પોલીસ તપાસમાં ભારે ક્ષતિઓ રહી ગઈ હતી. જો પ્રથમ પીએમ વખતે તમામ તબીબી અને ફોરેન્સિક તપાસ યોગ્ય રીતે કરવામાં આવી હતી, તો પછી ત્રણ મહિના પછી રી-પીએમ કરવાની જરૂર શા માટે પડી? શું અગાઉના પીએમ રિપોર્ટમાં કોઈ મહત્વના પુરાવા છુપાવવામાં આવ્યા હતા કે પછી તપાસ અધિકારીઓ દ્વારા ઘોર બેદરકારી દાખવવામાં આવી હતી? સ્થાનિક દલિત સમાજ અને માનવ અધિકાર કાર્યકર્તાઓ આ મામલે ઉગ્ર વિરોધ નોંધાવી રહ્યા છે. તેમની માંગ છે કે પ્રથમ પીએમ કરનાર તબીબો અને પ્રાથમિક તપાસ કરનાર પોલીસ અધિકારીઓની જવાબદારી પણ તાત્કાલિક નક્કી થવી જોઈએ.
આ પણ વાંચોઃ ગુજરાતમાં 49 ટકા વિદ્યાર્થીઓ ધો. 12 સુધીનો અભ્યાસ પૂર્ણ કરી શકતા નથી
પ્રેમસંબંધ, ધમકીઓ અને ડિજિટલ પુરાવાની તપાસ
લખીરામના પરિવારના જણાવ્યા મુજબ, યુવકના પ્રેમસંબંધને લઈને ગામમાં બેઠકો અને સમાધાનના પ્રયાસો થયા હતા, જેમાં તેને ધમકીઓ આપવામાં આવી હતી. તળાવમાંથી મૃતદેહ મળ્યો તે પહેલાં અને પછી લખીરામ કોના સંપર્કમાં હતો તેની ઊંડાણપૂર્વક તપાસ થવી અત્યંત જરૂરી છે. બનાવ પહેલાં તેના મોબાઈલ પર આવેલા કોલ્સ, સોશિયલ મીડિયા મેસેજ અને ડિજિટલ પુરાવાઓની કાયદેસર ફોરેન્સિક ચકાસણી થવી જોઈએ. આ ઉપરાંત, પ્રેમસંબંધ મુદ્દે યોજાયેલી બેઠકમાં હાજર રહેલા તમામ લોકોની સઘન પૂછપરછ કરવામાં આવે તો જ હત્યા કે આત્મહત્યા પાછળનું સાચું કારણ બહાર આવી શકે તેમ છે. પરંતુ આટલા સંવેદનશીલ પાસાઓ હોવા છતાં સ્થાનિક પોલીસે શરૂઆતમાં આ બાબતોને ગંભીરતાથી ન લીધી હોવાના આક્ષેપો થઈ રહ્યા છે.
આ પણ વાંચોઃ અમરેલીમાં કેન્ટીનમાં ભોજન એઠું મૂકવા બદલ દલિત યુવકની હત્યા!
દલિત સમાજનો આક્રોશ અને વહીવટીતંત્રનું મૌન
લખીરામના પરિવારને ન્યાય અપાવવા માટે સ્થાનિક દલિત સમાજે આવેદનપત્રો આપ્યા, રેલીઓ કાઢી અને વિરોધ પ્રદર્શનો કર્યા ત્યારે માંડ તપાસ ઉચ્ચ અધિકારીઓને સોંપવામાં આવી હતી. દલિત યુવકના મોતનું સત્ય જાણવા માટે પીડિત પરિવારને વારંવાર રસ્તા પર ઉતરવું પડે તે લોકશાહી માટે અત્યંત શરમજનક બાબત છે. પોલીસ અને સ્થાનિક તંત્રનું મૌન હવે અનેક શંકાઓને જન્મ આપી રહ્યું છે. કોઈપણ નિષ્પક્ષ તપાસ સોશિયલ મીડિયાના દબાણ કે રાજકીય પ્રભાવથી મુક્ત હોવી જોઈએ. જો આ કેસમાં કોઈ ગુનાહિત સંડોવણી હોય તો આરોપી ગમે તેટલો પ્રભાવશાળી હોય, તેની સામે કડક કાનૂની કાર્યવાહી થવી જ જોઈએ.
આ પણ વાંચોઃ બાઈક ચોરી મામલે બબાલમાં દલિત યુવકની 5 લોકોએ હત્યા કરી
રી-પીએમ રિપોર્ટ અને પારદર્શિતાની માંગ
અમદાવાદ સિવિલ હોસ્પિટલમાં થઈ રહેલું રી-પોસ્ટમોર્ટમ સંપૂર્ણ પારદર્શિતા સાથે કરવામાં આવે તેવી માંગ ઊઠી રહી છે. જૂના અને નવા પીએમ રિપોર્ટના તારણોની સરખામણી કરીને સાચો અહેવાલ જાહેર કરવો જરૂરી છે. 27 વર્ષીય આશાસ્પદ યુવકનું જીવન અચાનક પૂરું થઈ ગયું છે અને તેનો પરિવાર આજે પણ અસંખ્ય પ્રશ્નોના જવાબો શોધી રહ્યો છે. ન્યાય માંગવો એ કોઈ ગુનો નથી પરંતુ બંધારણીય અધિકાર છે. હવે જ્યારે કબર ખોદીને સત્ય શોધવાનો પ્રયાસ થઈ રહ્યો છે, ત્યારે સરકારે અને પોલીસ તંત્રે ખાતરી કરવી પડશે કે સત્ય કાયમ માટે દાટી ન દેવાય અને લખીરામના પરિવારને ન્યાય મળે.
