જાતિવાદનો ગઢ ગણાતા યુપીમાં ફરી એકવાર એક દલિત વરરાજાની જાનને જાતિવાદી ગુંડાઓએ ગામ વચ્ચેથી નીકળતા રોકીને દાદાગીરી કરી હતી. સ્થિતિ એ હદે વણસી ગઈ હતી કે 5 પોલીસ સ્ટેશનનો કાફલો ગામમાં ખડકી દેવાયો હતો.
મામલો આગ્રાના ફતેહાબાદના નિબોહરા વિસ્તારનો છે. અહીં સોમવારે સાંજે એક દલિત પરિવારની જાન કાઢવા બાબતે બે પક્ષો વચ્ચે ભારે વિવાદ અને તણાવની સ્થિતિ સર્જાઈ હતી. પરંપરાગત માર્ગના બદલે નવા રૂટ પરથી જાન પસાર કરવાના મુદ્દે ગ્રામજનોએ વિરોધ નોંધાવતા મામલો બિચક્યો હતો.
આ પણ વાંચો: વાવ-થરાદના ગોલપ નેસડામાં 16 પરિવારોએ બૌદ્ધ ધમ્મની દીક્ષા લીધી
પરિસ્થિતિ એટલી હદે વણસી ગઈ હતી કે કાયદો અને વ્યવસ્થા જાળવી રાખવા માટે તાત્કાલિક ધોરણે પાંચ જુદા-જુદા પોલીસ સ્ટેશનનો મોટો પોલીસ કાફલો ઘટનાસ્થળે ખડકી દેવો પડ્યો હતો. પોલીસ વડા અને ઉચ્ચ અધિકારીઓની કડક દેખરેખ અને ચુસ્ત બંદોબસ્ત વચ્ચે આખરે ત્રણ કલાકની ભારે જહેમત બાદ દલિત વરરાજાની જાન સુરક્ષિત રીતે માંડવે પહોંચી શકી હતી અને લગ્ન વિધિ સંપન્ન કરાઈ હતી.
મળતી વિગતો અનુસાર, આ સમગ્ર મામલો રામપુર ગામનો છે. ગામમાં રહેતા ગુરચરણ સિંહ વાલ્મિકીની પુત્રી જસોદાના લગ્ન સોમવારે નિર્ધારિત હતા, જેના માટે ઘરની બહાર જ વિશાળ મંડપ સજાવવામાં આવ્યો હતો. આ લગ્ન માટે બિચપુરીના સૈતા ગામથી વરરાજા જિતેન્દ્ર વાલ્મિકી જાન લઈને રામપુર ગામે આવ્યા હતા.
સોમવારે સાંજે આશરે સાત વાગ્યાના અરસામાં ધામધૂમથી જાન લેવાની અને સામૈયાની તૈયારીઓ ચાલી રહી હતી. આ દરમિયાન જાનને અગાઉથી નક્કી કરાયેલા પરંપરાગત રૂટના બદલે ગામના એક અન્ય નવા માર્ગ પરથી પસાર કરવાનું આયોજન કરવામાં આવ્યું હતું. વરપક્ષના જણાવ્યા મુજબ, જૂના પરંપરાગત માર્ગ પર ગામના એક પરિવારમાં શોક સભા હોવાના કારણે સંવેદનશીલતા દાખવીને જાનનો માર્ગ આખરી સમયે બદલવો પડ્યો હતો.
આ પણ વાંચો: સાવરકરે અંગ્રેજો પાસે 10 વાર માફી માંગી હતી, પૌત્રે ભરી કોર્ટમાં સ્વીકાર્યું
જોકે, જાન નવા માર્ગ પરથી પસાર થવાની હોવાની જાણ થતાં જ ગામના કેટલાક સ્થાનિક લોકો ત્યાં એકત્ર થઈ ગયા હતા અને તેમણે દલિત સમાજની જાન આ નવા રૂટ પરથી કાઢવા સામે સખત વાંધો ઉઠાવી વિરોધ શરૂ કર્યો હતો. ગ્રામજનોના આ વિરોધને પગલે જાનૈયાઓ પણ ભારે આક્રોશમાં આવી ગયા હતા અને બંને પક્ષો સામસામે આવી જતાં ગામમાં ભારે અફડાતફડી અને કોમી તણાવનો માહોલ ઉભો થયો હતો. પરિસ્થિતિ વણસતી જોઈને કન્યા પક્ષના લોકોએ વિલંબ કર્યા વિના તાત્કાલિક સ્થાનિક પોલીસ કંટ્રોલ રૂમને આ અંગે જાણ કરી મદદ માંગી હતી.
ઘટનાની ગંભીરતાને ધ્યાનમાં રાખીને કંટ્રોલ રૂમના આદેશથી માત્ર નિબોહરા પોલીસ જ નહીં, પરંતુ આસપાસના અન્ય ચાર થાણા—મન્સુખપુરા, ફતેહાબાદ, શમસાબાદ અને ઈરાદતનગર પોલીસ સ્ટેશનની હથિયારધારી પોલીસ ફોર્સ તુરંત જ રામપુર ગામે દોડી આવી હતી. પાંચ પોલીસ સ્ટેશનના કાફલાએ ગામને કિલ્લામાં ફેરવી દઈ પરિસ્થિતિ પર કાબૂ મેળવ્યો હતો. ત્યારબાદ વરિષ્ઠ પોલીસ અધિકારીઓએ બંને પક્ષોના આગેવાનો સાથે અલગ-અલગ બેઠક યોજી, કાયદાકીય જોગવાઈઓ સમજાવી મામલો શાંત પાડ્યો હતો.
આ પણ વાંચો: ‘તમારો વરઘોડો રોકે તો અમને કંકોતરી આપજો, ધામધૂમથી લગ્ન કરાવીશું’
આખરે પોલીસની સીધી દેખરેખ અને ચુસ્ત સશસ્ત્ર બંદોબસ્ત હેઠળ જાનને શાંતિપૂર્ણ રીતે નિર્ધારિત માર્ગ પરથી આગળ ધપાવવામાં આવી હતી અને માંડવે પહોંચાડવામાં આવી હતી. નિબોહરાના પ્રભારી નિરીક્ષકે જણાવ્યું કે બંને પક્ષોની સમજાવટ બાદ મામલો થાળે પડ્યો હતો અને લગ્ન સંપન્ન થયા છે. ડીસીપી ઈસ્ટ ઝોન અભિષેક અગ્રવાલે આ અંગે સત્તાવાર નવેસરની સ્થિતિ સ્પષ્ટ કરતા જણાવ્યું હતું કે, નવા માર્ગના વિવાદ અંગે બંને પક્ષો સાથે સફળ વાર્તાલાપ કરાયો હતો. હાલ ગામમાં કોઈ તણાવ નથી, છતાં સાવચેતીના પગરૂપે ગામમાં હજુ પણ પોલીસ ફોર્સ તૈનાત રાખવામાં આવી છે.
આ પણ વાંચો: ડે.કલેક્ટરની હેરાનગતિથી કંટાળી દલિત યુવકે કલેક્ટર કચેરીમાં ગળેફાંસો ખાધો!
