મુન્દ્રામાં જય ભીમ ટ્રસ્ટ દ્વારા ડૉ.આંબેડકર જયંતીની ભવ્ય ઉજવણી કરાઈ

મુન્દ્રા: ભારતીય બંધારણના શિલ્પી, મહાન સમાજ સુધારક અને ‘ભારત રત્ન’ ડૉ. બાબાસાહેબ આંબેડકરની 135મી જન્મજયંતીના પાવન અવસરે આજે મુન્દ્રા શહેર ખાતે જય ભીમ ચેરીટેબલ ટ્રસ્ટ દ્વારા ભવ્ય અને ગરિમાપૂર્ણ ઉજવણી કરવામાં આવી હતી. આ મહોત્સવમાં સમાજના તમામ વર્ગોએ એકત્રિત થઈને બાબા સાહેબના સમાનતા અને શિક્ષિત બનવાના સંદેશને વાગોળ્યો હતો.

વહેલી સવારે બાબાસાહેબની પ્રતિમાને વંદન કરાયા

ઉજવણીનો વિધિવત પ્રારંભ વહેલી સવારે મુન્દ્રા શહેરના મુખ્ય ચોકમાં સ્થિત ડૉ. બાબાસાહેબ આંબેડકરની પ્રતિમા પાસે થયો હતો. જય ભીમ ચેરીટેબલ ટ્રસ્ટના સભ્યો અને મોટી સંખ્યામાં ઉપસ્થિત નગરજનો દ્વારા બાબા સાહેબની પ્રતિમાને હાર પહેરાવી પુષ્પાંજલિ અર્પણ કરવામાં આવી હતી. આ સમયે ‘જય ભીમ’ના નાદથી સમગ્ર વાતાવરણ ગુંજી ઉઠ્યું હતું. પ્રતિમા પૂજન બાદ સૌ ઉપસ્થિતો દરજી સમાજ વાડી ખાતે એકત્રિત થયા હતા, જ્યાં કાર્યક્રમનો મુખ્ય મંચ તૈયાર કરવામાં આવ્યો હતો.

આ પણ વાંચો: દલિત મતો મેળવવા ભાજપ ડો.આંબેડકરની પ્રતિમાઓ માથે છત્રી લગાવશે

દીપ પ્રાગટ્ય અને સન્માન સમારોહ યોજાયો

કાર્યક્રમના મુખ્ય તબક્કાની શરૂઆત આમંત્રિત મહેમાનોના હસ્તે દીપ પ્રાગટ્ય કરીને કરવામાં આવી હતી. આ પ્રસંગે ટ્રસ્ટ દ્વારા સામાજિક જવાબદારીના ભાગરૂપે વિવિધ ક્ષેત્રના પ્રતિભાઓનું વિશેષ સન્માન કરવામાં આવ્યું હતું. જેમાં સમાજ માટે દીર્ઘકાળ સુધી સેવા આપનાર નિવૃત કર્મચારીઓ અને સરકારી સેવામાં નવી નિમણૂક પામેલા યુવાન કર્મચારીઓને પ્રોત્સાહિત કરવામાં આવ્યા હતા.
વધુમાં, શિક્ષણના મહત્વને સમજાવતા ‘તેજસ્વી તારલાઓ’ એટલે કે તેજસ્વી વિદ્યાર્થીઓનું બહુમાન કરવામાં આવ્યું હતું. દેશની રક્ષા કાજે સેવા આપી નિવૃત થયેલા સેનાના જવાનોનું પણ હૃદયપૂર્વક અભિવાદન કરવામાં આવ્યું હતું, જે કાર્યક્રમનું મુખ્ય આકર્ષણ રહ્યું હતું.

સાંસ્કૃતિક કાર્યક્રમ અને વૈચારિક ગોષ્ઠી યોજાઈ

બપોરના સત્રમાં બાળકો દ્વારા ડૉ. બાબાસાહેબ આંબેડકરની વિચારધારાને કેન્દ્રમાં રાખીને વિવિધ પ્રવચનો રજૂ કરવામાં આવ્યા હતા. નાનકડા બાળકોએ નાટક દ્વારા બાબા સાહેબના સંઘર્ષમય જીવન અને બંધારણ ઘડતરની પ્રક્રિયાના જીવંત દ્રશ્યો પ્રસ્તુત કર્યા હતા. આ પ્રસ્તુતિઓએ ઉપસ્થિત શ્રોતાઓને મંત્રમુગ્ધ કર્યા હતા અને બાબા સાહેબના વિચારોને જીવનમાં ઉતારવાની પ્રેરણા આપી હતી.

આ પણ વાંચો: બહેરામપુરામાં જય ભીમ યુથ સર્કલ દ્વારા નિઃશુલ્ક મેડિકલ કેમ્પ યોજાયો

મહાનુભાવો ખાસ ઉપસ્થિત રહ્યાં

આ કાર્યક્રમમાં અધ્યક્ષ સ્થાને ડૉ. એલ. વી. ફફલ સાહેબ હાજર રહ્યા હતા. મહેમાનોની યાદીમાં કિશોરભાઈ પીગોલ, ડૉ. નરેશ કેન્યા, ડૉ. બીનાબેન કેન્યા, અને ભુજપુર ગ્રામ પંચાયતના સરપંચ લક્ષ્મીબેન નંજારનો સમાવેશ થતો હતો. ઉપરાંત દિનેશભાઈ સોલંકી, હરિભાઈ ગોહિલ, ડાયાભાઈ ગોહિલ, સંત રોહીદાસ સેવા ટ્રસ્ટના ટ્રસ્ટીઓ ખેમચંદભાઈ પરમાર, અનિલભાઈ સોલંકી, ડૉ. મોહનભાઈ પરમાર, રાજેશભાઈ સીજુ અને અલ્પેશભાઈ સેનમા સાહેબે ખાસ હાજરી આપી હતી.

કાર્યક્રમના અંતે તમામ મહેમાનો અને ભાઈ-બહેનો માટે સમૂહ ભોજનનું સુંદર આયોજન કરવામાં આવ્યું હતું. આ સમગ્ર મહોત્સવને સફળ બનાવવા માટે જય ભીમ ચેરીટેબલ ટ્રસ્ટના પ્રમુખ નિકુંજભાઈ સોલંકી, ઉપ પ્રમુખ યોગેશભાઈ મકવાણા, મંત્રી જગદીશભાઈ પરમાર અને ખજાનચી દેવશીભાઈ વિકમાએ દિવસ-રાત જહેમત ઉઠાવી હતી. ટ્રસ્ટના તમામ ટ્રસ્ટીઓ અને સભ્યોના પરિવારોએ પણ આ કાર્યમાં મહત્વનું યોગદાન આપ્યું હતું. હાજર રહેલા તમામ મહેમાનો અને કાર્યકર્તાઓનો ટ્રસ્ટ દ્વારા આભાર વ્યક્ત કરવામાં આવ્યો હતો.

આ પણ વાંચો: દક્ષિણ કોરિયામાં દૂતાવાસ ખાતે ડૉ.આંબેડકરની જન્મજયંતી ઉજવાઈ