દેશભરમાં NEET-UG પરીક્ષામાં કથિત ગેરરીતિઓ, પેપર લીક અને પરિણામોની અનિયમિતતાઓને લઈને ભારે આક્રોશનો માહોલ જોવા મળી રહ્યો છે. નેશનલ ટેસ્ટિંગ એજન્સી (NTA) દ્વારા આયોજિત આ મહત્વપૂર્ણ પ્રવેશ પરીક્ષામાં સામે આવેલી ખામીઓ અને વિસંગતતાઓને કારણે લાખો વિદ્યાર્થીઓ અને તેમના વાલીઓ અનિશ્ચિતતા અને તણાવના વાદળો વચ્ચે જીવી રહ્યા છે.
આ જ વિવાદ વચ્ચે મહારાષ્ટ્રના અહિલ્યાનગર (અહમદનગર) જિલ્લાના કરજત તાલુકામાં આવેલા જલાલપુર ગામની 19 વર્ષીય વિદ્યાર્થિની અંકિતા સાંગલેએ NEETની પુનઃ પરીક્ષામાં ધાર્યા મુજબના ગુણ ન મળતા પોતાના જ ઘરે ગળે ફાંસો ખાઈને જીવન ટૂંકાવી લીધું છે. આ ઘટનાએ દેશની પરીક્ષા પ્રણાલી, પારદર્શિતા અને વિદ્યાર્થીઓ પર સતત વધી રહેલા અસહ્ય માનસિક તણાવ સામે અત્યંત ગંભીર સવાલો ખડા કરી દીધા છે.
અપેક્ષિત પરિણામ ન મળતા ઘેરા ડિપ્રેશનમાં સરી પડી
અંકિતા સાંગલેના પરિવારે જણાવ્યા મુજબ, તેણીએ 21 જૂને યોજાયેલી NEETની પુનઃ પરીક્ષામાં ભાગ લીધો હતો. પરીક્ષા આપ્યા બાદ પ્રારંભિક આન્સર કીના મૂલ્યાંકન આધારે તેણીને આશરે 350 જેટલા ગુણ મળવાની મજબૂત અપેક્ષા હતી. આ માર્ક્સ આધારે તે તબીબી અભ્યાસક્રમમાં પ્રવેશ મેળવવા માટે આશાવાદી હતી. જોકે, જ્યારે આખરી પરિણામ જાહેર થયું ત્યારે તેને માત્ર 166 માર્ક્સ જ મળ્યા હતા. જ્યારે પાત્રતા માટે લઘુત્તમ કટ-ઓફ 177 માર્ક્સ નક્કી કરવામાં આવ્યું હતું. ડૉક્ટર બનવાનું પોતાનું વર્ષો જૂનું સપનું રોળાઈ જતાં અંકિતા પર અસહ્ય આઘાત લાગ્યો હતો અને તે ઘેરા ડિપ્રેશનમાં સરી પડી હતી.
આ પણ વાંચો: ડૉ.આંબેડકર મધરાતે કોની યાદમાં વાયોલિન વગાડતા હતા?
શુક્રવારે (25 જુલાઈ) ના રોજ જ્યારે તેના પિતા અને ભાઈ પંઢરપુર યાત્રા માટે ગયા હતા અને માતા ઘરમાં કામકાજ કરી રહી હતી, ત્યારે અંકિતાએ પોતાના અભ્યાસ માટે ફાળવેલા અલગ રૂમમાં જઈને આત્યંતિક પગલું ભરી લીધું હતું. મોડે સુધી રૂમમાંથી કોઈ હલચલ ન દેખાતાં માતાએ દરવાજો ખોલીને જોયું તો અંકિતા મૃત હાલતમાં મળી આવી હતી. આ દ્રશ્ય જોઈને પરિવારજનો અને પડોશીઓ સ્તબ્ધ થઈ ગયા હતા. ઘટનાસ્થળેથી પોલીસને મરાઠી ભાષામાં લખાયેલી એક સ્યૂસાઈડ નોટ પણ મળી આવી છે. આ સ્યૂસાઈડ નોટમાં અંકિતાએ પોતાના પરિવાર પ્રત્યેનો ગાઢ પ્રેમ અને પરીક્ષામાં નિષ્ફળતા મળતાં અનુભવેલું અસહ્ય દુઃખ વ્યક્ત કર્યું હતું.
રાજકીય આક્રોશ અને પરીક્ષા પદ્ધતિ સામે પ્રશ્નાર્થ
આ કરૂણ ઘટનાના સમાચાર વાયુવેગે પ્રસરતા સ્થાનિક સાંસદ નિલેશ લંકેએ પીડિત પરિવારની રૂબરૂ મુલાકાત લઈને તેમને સાંત્વના પાઠવી હતી. ત્યારબાદ માધ્યમો સાથેની વાતચીતમાં તેમણે સરકાર અને પરીક્ષા એજન્સીઓ પર અત્યંત આકરા પ્રહારો કર્યા હતા. લંકેએ ગંભીર આરોપ લગાવતા કહ્યું કે, NEET પરીક્ષામાં થતી ગેરરીતિઓ, પેપર લીક અને ગડબડોને કારણે સમગ્ર દેશભરમાં વિદ્યાર્થીઓનું ભવિષ્ય અંધકારમય બન્યું છે. તેમણે દાવો કર્યો હતો કે કૌભાંડો અને માનસિક તણાવના કારણે અત્યાર સુધીમાં દેશભરના 23 જેટલા વિદ્યાર્થીઓએ આત્મહત્યા કરી લીધી છે.
આ પણ વાંચો: ગાંધીનગરમાં આવતી કાલે ‘ગ્રંથ-પ્રત્યક્ષ’ સાહિત્ય ઉત્સવ યોજાશે
તેમણે માગ કરી હતી કે પેપર લીક અને પરીક્ષા કૌભાંડ માટે જવાબદાર તમામ લોકો સામે ગેરવાજબી હત્યા એટલે કે સાપરાધ મનુષ્યવધનો ગુનો નોંધવામાં આવે. સાંસદે ભારપૂર્વક જણાવ્યું કે અંકિતાનો આપઘાત એ માત્ર એક વ્યક્તિગત નિરાશાનું પરિણામ નથી, પરંતુ આખી શૈક્ષણિક અને પરીક્ષા પદ્ધતિની નિષ્ફળતાનું ભયાનક ઉદાહરણ છે. તેમણે આત્મહત્યા કરનારા વિદ્યાર્થીઓના પરિવારોને નાણાકીય સહાય પૂરી પાડવાની પણ સરકારને વિનંતી કરી છે અને જાહેરાત કરી છે કે તેઓ આગામી સંસદીય સત્ર દરમિયાન સંસદમાં આ ગંભીર મુદ્દો ઉઠાવશે.
પોલીસ તપાસ અને સિસ્ટમ સામે ઘેરા સવાલો
ઘટનાની જાણ થતાં જ કરજત પોલીસ સ્ટેશનના પોલીસ ઇન્સ્પેક્ટર હનુમાન ગાયકવાડે ઘટનાસ્થળની મુલાકાત લઈને પ્રાથમિક નિરીક્ષણ અને ઔપચારિક પંચનામું કર્યું હતું. ત્યારબાદ મૃતદેહને પોસ્ટમોર્ટમ તપાસ માટે મોકલી આપવામાં આવ્યો હતો. હાલમાં પોલીસ દ્વારા આ મામલે આગળની કાનૂની તપાસ હાથ ધરવામાં આવી રહી છે. 19 વર્ષીય અંકિતાના અકાળે અવસાનથી સમગ્ર જલાલપુર ગામ અને કરજત વિસ્તારમાં ભારે શોક અને અરેરાટી વ્યાપી ગઈ છે.
આ પણ વાંચો: કોક્રોચ જનતા પાર્ટીની સંસદ માર્ચ પર પોલીસનો લાઠીચાર્જ
