પશ્ચિમ બંગાળના સિલીગુડી સબ-ડિવિઝનલ કોર્ટરૂમમાં ન્યાયપાલિકાની ગરિમાને લજવતી એક અત્યંત ચોંકાવનારી ઘટના સામે આવી છે. વર્ષ 2018 ના એક વિવાદાસ્પદ કેસની સુનાવણી દરમિયાન કોર્ટ નંબર 4 માં હાજર એક આરોપીએ પીઠાસીન મહિલા જ્યુડિશિયલ મેજિસ્ટ્રેટને હિજાબ પહેરેલા જોઈને કોર્ટમાં જ ખૂલ્લેઆમ ‘જય શ્રી રામ’ નો નારો લગાવી વિરોધ કર્યો હતો. આ ઘટનાને પગલે કોર્ટરૂમમાં ભારે અફડાતફડી મચી ગઈ હતી. વકીલોના વિવિધ મંડળો અને કાનૂની નિષ્ણાતોએ આ ઘટનાની સખત શબ્દોમાં નિંદા કરીને તેને ન્યાયતંત્ર પર ધાર્મિક કટ્ટરતા લાદવાનો પ્રયાસ ગણાવ્યો છે.
2018 ના લવ જેહાદ વિવાદના કેસમાં સુનાવણી હતી
આ સમગ્ર મામલાની પૃષ્ઠભૂમિ વર્ષ 2018 માં બનેલી એક આંતર-ધાર્મિક લગ્નની ઘટના સાથે જોડાયેલી છે. તે સમયે કેટલાક સવર્ણ અને કટ્ટરપંથી જૂથો દ્વારા આ લગ્નને ‘લવ જેહાદ’નો રંગ આપીને વ્યાપક વિરોધ પ્રદર્શન કરવામાં આવ્યું હતું. આ જૂથોએ સિલીગુડીના બાગહાજતિન પાર્કથી હિલ કાર્ટ રોડ પર આવેલા સબ-ડિવિઝનલ મેજિસ્ટ્રેટની કચેરી સુધી માર્ચ કાઢીને આવેદનપત્ર આપ્યું હતું. આ ઘટનામાં કાયદો અને વ્યવસ્થાનો ભંગ કરવા બદલ પોલીસે કુલ 24 લોકો વિરુદ્ધ નામજોગ ગુનો દાખલ કર્યો હતો.
આ પણ વાંચો: રામ મંદિરમાં દાન ગણતા અનુકલ્પ મિશ્રાએ 3 વર્ષમાં ફાર્મહાઉસ-ઘર ખરીદ્યા
આ કેસના સંદર્ભમાં બુધવારે કોર્ટ નંબર 4 દ્વારા તમામ 24 આરોપીઓને અદાલતમાં રૂબરૂ હાજર રહેવા માટે આદેશ કરવામાં આવ્યો હતો. જેમાંના કેટલાક આરોપીઓ અગાઉ જામીન પર હતા, જ્યારે અન્ય સામે બિનજામીનપાત્ર વોરંટ જારી કરાયા હતા.
હિજાબ જોઈને નારો લગાવતા જ કોર્ટરૂમમાં સન્નાટો
બુધવારે જ્યારે તમામ 24 આરોપીઓ કોર્ટરૂમમાં લાઇનસર ઊભા હતા અને મેજિસ્ટ્રેટ દ્વારા તેમની હાજરી પૂરવામાં આવી રહી હતી, ત્યારે જ આ શરમજનક બનાવ બન્યો હતો. બોલાવવામાં આવેલા નામો દરમિયાન એક આરોપીએ સામે પીઠાસીન મહિલા જ્યુડિશિયલ મેજિસ્ટ્રેટ તરફ જોયું હતું. મહિલા જજને હિજાબમાં સજ્જ જોઈને તે ઉશ્કેરાયો હતો અને અદાલતની મર્યાદા નેવે મૂકીને મોટેથી ‘જય શ્રી રામ’ નો નારો પોકાર્યો હતો. આ ઘટનાથી કોર્ટમાં ઉપસ્થિત તમામ વકીલો અને જજ ચોંકી ગયા હતા અને ક્ષણભર માટે કામગીરી થંભી ગઈ હતી.
આ પણ વાંચો: ધોળકાના સરોડામાં દલિતોએ મંત્રી, MLA ને એક કલાક સુધી ઘેર્યા
વકીલે માફી માગી બચાવ કરવાનો પ્રયાસ કર્યો
ઘટનાની ગંભીરતા અને કોર્ટરૂમમાં ઊભા થયેલા વિવાદને જોતાં આરોપીના વકીલ ત્રિદીપ સાહાએ તાત્કાલિક મધ્યસ્થી કરીને અદાલત સમક્ષ બિનશરતી માફી માગી લીધી હતી. વકીલે આ ઘટનાને ‘અજાણતા થયેલી ભૂલ’ ગણાવીને દાવો કર્યો હતો કે આ નારો જજને લક્ષ્ય બનાવીને લગાવવામાં આવ્યો નહોતો.
વકીલ ત્રિદીપ સાહાએ બચાવ કરતા જણાવ્યું કે, “અમારા અસીલે કોઈ ગેરઈરાદાથી આ શબ્દો નહોતા કહ્યા. સામાન્ય વ્યવહારમાં લોકો એકબીજાને અભિવાદન કરવા માટે ‘જય શ્રી રામ’ કે ‘રાધે-રાધે’ જેવા શબ્દો વાપરતા હોય છે. નામ બોલતી વખતે તેણે વિચાર્યા વગર આ બોલી દીધું હતું. છતાં કાનૂની મર્યાદાનું ભંગ થયું હોવાનો અહેસાસ થતાં જ અમે તરત જ કોર્ટની માફી માંગી લીધી છે.”
આ પણ વાંચો: દલિત કેબ ડ્રાઈવરની આત્મસન્માન માટેની લડાઈ
બાર એસોસિએશને લીધો આકરો વાંધો
જોકે, કાનૂની આલમ આ સ્પષ્ટતાથી સંતૃપ્ત થઈ નથી. સિલીગુડી બાર એસોસિએશનના પ્રમુખ ઉદય શંકર માલાકારે આ ઘટનાને ‘સંપૂર્ણપણે અયોગ્ય અને બિનવ્યાવસાયિક’ ગણાવી હતી. તેમણે મીડિયા સાથેની વાતચીતમાં જણાવ્યું હતું કે, “અદાલતની અંદર આવી ધાર્મિક કે રાજકીય પ્રવૃત્તિઓ માટે કોઈ જ જગ્યા હોઈ શકે નહીં. જો કોર્ટે ઈચ્છ્યું હોત તો તે આ આરોપી સામે સુઓ મોટો લઈને અદાલતની અવમાનનાનો કેસ ચલાવી શકત.”
આ ઉપરાંત, ઓલ ઈન્ડિયા લોયર્સ એસોસિએશનના દાર્જિલિંગ જિલ્લા સચિવ દિવાકર રોયે પણ અદાલતની ગરિમા જાળવવાની જરૂરિયાત પર ભાર મૂક્યો હતો. તેમણે સ્પષ્ટ શબ્દોમાં કહ્યું કે કોર્ટરૂમ એ માત્ર અને માત્ર નિષ્પક્ષ ન્યાય તોળવાનું સ્થળ છે. તેને ધાર્મિક કે રાજકીય વિવાદો અને નારાબાજીથી મુક્ત રાખવું એ દરેક નાગરિકની પ્રાથમિક ફરજ છે.
આ પણ વાંચો: દલિતો-પછાતોને 75% અનામત મળવી જોઈએઃ સિદ્ધારમૈયા
