દેશભરમાં આદિવાસી સમાજની મહિલાઓ પર અત્યાચારની કોઈને કોઈ ઘટનાઓ બનતી રહે છે, તેમ છતાં મુખ્યધારાના મીડિયામાં તે સ્થાન નથી પામતી. મિઝોરમની એક જિલ્લા અદાલતે 9 વર્ષ જૂના ગુનામાં બીએસએફના બે જવાનોને કડક સજા સંભળાવી છે.
આઈઝોલના એડિશનલ ડિસ્ટ્રિક્ટ એન્ડ સેશન્સ જજ સિલ્વી જોમુઆનપુઈ રાલ્તેએ ભારત-બાંગ્લાદેશ સરહદ પર તૈનાત બોર્ડર સિક્યોરિટી ફોર્સ (BSF) ના બે જવાનોને એક સ્થાનિક આદિવાસી મહિલા પર સામૂહિક દુષ્કર્મ અને ત્યારબાદ તેના પર એસિડ ફેંકવાના ગુનામાં દોષિત ઠેરવી 42 વર્ષની જેલની સજા ફટકારી છે.
ઘટના શું હતી?
આ મામલો જુલાઈ 2017નો છે. પીડિતા 16 જુલાઈ 2017ના રોજ તેની એક સહેલી સાથે મમિત જિલ્લામાં ભારત-બાંગ્લાદેશ સરહદ નજીક આવેલા ગસ્કાટા નદીના ગીચ જંગલોમાં જંગલી શાકભાજી ભેગી કરવા ગઈ હતી. આ દરમિયાન સ્થાનિક બોર્ડર આઉટપોસ્ટ (BOP) પર તૈનાત BSF જવાન નીલાંજન દાસ અને દિનેશ કુમારે બંને મહિલાઓને ઘેરી લીધી હતી. જવાનોએ એક મહિલા પર બળજબરીપૂર્વક સામૂહિક દુષ્કર્મ ગુજાર્યું હતું.
આ પણ વાંચો: દૂધરેજ વડવાળા મંદિરના પૂજારીએ કરડી નજરે પૂછ્યું, ‘તમે કેવા?’
આ જઘન્ય કૃત્ય કર્યા બાદ, પોતાની ઓળખ છુપાવવા અને પીડિતાને અંધ બનાવવાની ક્રૂર ગણતરી સાથે જવાનોએ તેના ચહેરા પર એસિડ ફેંકી દીધું હતું.
સહેલીનું રહસ્યમય મોત
આ ઘાતક હુમલામાં પીડિતાનો જીવ બચી ગયો હતો, પરંતુ એસિડના કારણે તેનો ચહેરો સંપૂર્ણપણે વિકૃત થઈ ગયો હતો અને તેની આંખોની રોશની કાયમ માટે ચાલી ગઈ હતી. આ ઘટના દરમિયાન તેની સાથે ગયેલી સહેલી રહસ્યમય સંજોગોમાં ગુમ થઈ ગઈ હતી. ઘટનાના 11 દિવસ બાદ સ્થાનિક વિલેજ ડિફેન્સ પાર્ટી અને રાજ્ય પોલીસની સંયુક્ત શોધખોળ દરમિયાન જંગલમાંથી તેની સડેલી લાશ મળી આવી હતી. કોર્ટમાં જવાનો પર તેની હત્યાનો આરોપ સાબિત કરવાનો પ્રયાસ કરાયો હતો, પરંતુ પૂરતા પુરાવાના અભાવે કોર્ટે બંને જવાનોને હત્યાના આરોપમાંથી મુક્ત કર્યા હતા.
આ પણ વાંચો: સૌરાષ્ટ્ર દલિતો માટે ‘ડેન્જર ઝોન’ બન્યું, 7 દિવસમાં 3 દલિતોની હત્યા!
તપાસમાં અવરોધો અને કાયદાકીય કાર્યવાહી
આ કેસમાં ગુનેગારો સુધી પહોંચવું પોલીસ માટે પડકારજનક હતું. શરૂઆતની તપાસ દરમિયાન BSFના કેટલાક વરિષ્ઠ અધિકારીઓએ આરોપી જવાનોની ધરપકડ અને ડીએનએ ટેસ્ટ માટે બાયોલોજિકલ સેમ્પલ આપવાનો વિરોધ કર્યો હતો. જોકે, વિવિધ સ્થાનિક સંગઠનો અને રાષ્ટ્રીય માનવાધિકાર આયોગ (NHRC) ના હસ્તક્ષેપ બાદ સૈન્ય અધિકારીઓ તપાસ માટે સંમત થયા હતા.
તપાસ દરમિયાન પોલીસે મજબૂત પુરાવાઓ એકત્ર કર્યા હતા, જેમાં બોર્ડર આઉટપોસ્ટના સત્તાવાર ડ્યુટી રોસ્ટરની તપાસથી સાબિત થયું કે ઘટના સમયે બંને જવાનો તે જ વિસ્તારમાં હાજર હતા. આ ઉપરાંત આઈઝોલમાં ન્યાયિક મેજિસ્ટ્રેટની હાજરીમાં યોજાયેલી ટેસ્ટ આઇડેન્ટિફિકેશન પરેડ દરમિયાન પીડિતાએ બંને દોષિતોને સ્પષ્ટપણે ઓળખી કાઢ્યા હતા. આ કેસના નક્કર મૂલ્યાંકન માટે ફુલદુંગસેઈ પ્રાથમિક આરોગ્ય કેન્દ્રના તબીબી અહેવાલો અને 18 સાક્ષીઓના નિવેદનો કોર્ટ સમક્ષ રજૂ કરવામાં આવ્યા હતા.
આ પણ વાંચો: સુનાવણી વિના 8 વર્ષ જેલ ભોગવનાર સુરેન્દ્ર ગાડલિંગને જામીન મળ્યાં
કોર્ટનો આખરી ચૂકાદો અને સજા
કોર્ટે તમામ પુરાવા અને સાક્ષીઓની જુબાનીને આધારે બંને જવાનોને ભારતીય દંડ સંહિતા (IPC) ની વિવિધ કલમો હેઠળ દોષિત જાહેર કર્યા હતા. કોર્ટે બંને ગુનેગારોને અલગ-અલગ કલમો હેઠળ કુલ 42 વર્ષની સખત કેદની સજા ફટકારી છે.
અદાલતે ગેંગરેપના ગુના માટે 20 વર્ષની સખત કેદ, એસિડ એટેક માટે 12 વર્ષની સખત કેદ અને ગંભીર શારીરિક ઈજા પહોંચાડવા બદલ 10 વર્ષની સખત કેદની સજા સંભળાવી છે. આ ઉપરાંત અદાલતે બંને દોષિતો પર પ્રત્યેક ગુના માટે 60-60 હજાર રૂપિયાનો આર્થિક દંડ પણ ફટકાર્યો છે. લાંબી કાનૂની લડત અને 9 વર્ષના સમયગાળા બાદ પીડિતાને આખરે ન્યાય મળ્યો છે.
આ પણ વાંચો: ડે.કલેક્ટરની હેરાનગતિથી કંટાળી દલિત યુવકે કલેક્ટર કચેરીમાં ગળેફાંસો ખાધો!
